Read Mizo Lushai BU HNIHNA CHRONICLES 20 Bible Online

BU HNIHNA CHRONICLES 20 - Mizo Lushai bible

BU HNIHNA CHRONICLES 20

¹Nakin deuhvah chuan Moab leh Amon-ho chuan an kawppui Meun-ho nên Jehosafata ram chu rûn tûrin an lo thawk a.

²Mi ṭhenkhat an lo kal a, Jehosafata hnênah, “Tuipui Thi râla, Edom ram aṭangin sipai tam takin an rawn bei dâwn a che, Hazazon-tamar khua pawh an la dêr tawh,” an ti a (Chu khua chu Engedi tih a ni bawk).

³Jehosafata chu a thlaphâng hle a, thil tih dân tûrah LALPA chu a râwn a. Ram pumah chaw nghei tûr a ti a.

⁴Judai ram khaw tin aṭangin LALPA râwn tûrin Jerusalem-ah mi an lo kal zut zut a.

⁵Chûngho leh Jerusalem-a mite chu Tempul tual siam tharah chuan an pung khâwm a, lal Jehosafata chu an hmaah a va ding a.

⁶Ring takin a ṭawngṭai a, “Aw LALPA, min thlahtute Pathian, thiltithei tak i ni, tu ma chelh rual i ni lo.

⁷He rama lo awm ṭhînte kha i mi Israel-te hmaah i hnawt chhuak a, i ṭhian, Abrahama thlahte neih kumkhua atân i pe a ni lâwm ni kha, aw kan Pathian?

⁸He ramah hian an awm ta a, nangmah biakna tûr Hmun Thianghlim an sa a.

⁹Min hrem nân indona te, hri te, ṭâm te, thil ṭha lo tinrêng te lo thleng mah se, nangmah biakna tûra i ruat he in kawtah hian kan ding ang a, kan mangannaah chuan kan au vang che a, nangin min ngaihthlâksakin min chhanhim ang,’ an ti a.

¹⁰Min thlahtute Aigupta ram ata an lo chhuah pawh khân Amon-ho te, Moab-ho te, Edom-ho te kha rûn i phal lo va, an rama kal i phalsak lo va. Kan pute chuan an ram chu an kal hual a, an tichhe lo a nih kha.

¹¹Ngai teh, tûnah hian ro atâna ram min pêk ata min hnawh chhuah tumin an lo thawh tâk thung hi.

¹²Aw kan Pathian, an chungah ro han rêl teh; min bei tûr sipaite hi an tam êm a, kan chêt theih tâk hlek lah hi. Tihngaihna rêng kan hre ta lo va, i hmaah kan rawn thlen ngawt mai a nih hi,” a ti a.

¹³Judai ram mi zawng zawng chu an nupui fanaute nên Tempul kawtah chuan an ding a.

¹⁴Chuta awm ve Levia chi mi pakhat, Zekaria fapa Jahaziela chungah LALPA thlarau a lo thleng a. Ani chu Asafa thlaha mi a ni a, Zekaria chu Benaia fa a ni a. Benaia chu Jeiela fa a ni a, Jeiela chu Matania fa a ni.

¹⁵Jahaziela chuan, “Judai ram mi zawng zawng leh Jerusalem-a chêngte leh nang, Jehosafat, LALPA chuan heti hian a ti, ‘Sipai an tam avângin zâm suh ula, huphurh hek suh u. Indona chu Pathian kuta awm a ni, in kuta awm a ni lo.

¹⁶Naktûkah Zif kalkhâna an lo chho chu lo bei ang che u. Phaizâwl thlen hmaa Jeruel bul, ram chhengchhe laiah lo châng ang che u.

¹⁷In beih a ṭûl lo vang. In awmna tûrah chuan lo châng ringawt mai rawh u. LALPA chuan a hnehsak dâwn che u a ni. Judai ram leh Jerusalem mite u, zâm suh ula, huphurh hek suh u, bei tûrin thawk chhuak rawh u, LALPA chu in lamah a ṭang e,” a ti a.

¹⁸Lal Jehosafata chu a bawkkhup a, mipui pawh an kûn a; LALPA chibai an bûk a.

¹⁹Levia chi, Kohata leh Kora pâwlte chu an ding a, Israel-te Pathian LALPA chu fakin ring takin an zai a.

²⁰A tûkah chuan zîng takah an tho va, Tekoa khaw bul ram chhengchhe lam an pan a. Chutia an kal chhuah dâwn lai chuan Jehosafatan an hnênah, “Juda leh Jerusalem tlangvâlte u, LALPA, in Pathian chu rinchhan ula, in dingchang ang. A zâwlnei thu sawi kha ring ula, in hlawhtling ang,” a ti a.

²¹Lal chuan mite chu a berâwn a, Levia chi zaipâwlte chu hun serha an hâk tûr thawmhnawte inbela sipaiho hma hruai tûrin a ti a; ‘LALPA chu fak rawh u, kumkhuain ngil a nei si a,’ ti rawh u,” a ti a.

²²Chutia Pathian faka hla an han sak lai chuan Juda-te bei tûra lo thawk Amon-ho te, Moab-ho te, Edom-ho te châng ru tûrin LALPAN a dah a; tichuan, an hmaah chuan an hmelmate chu an tlâwm ta a.

²³Amon-ho leh Moab-ho chuan Edom-ho chu an bei a, an that phiar a; anmahni leh anmahni pawh chu intiboral tûrin an inbei ve leh ta chiam a.

²⁴Judai ram sipaiten thlalêr in sâng an va thlen chuan, an hmêlmate lam chu an han thlîr a. An za chuan leiah an tlu thal phung a, an lo thi vek mai a, pakhat mah tlân chhuak an awm lo va ni.

²⁵Jehosafata leh a hote chu râllâk sum la tûrin an kal a. Chûng zîngah chuan bâwng tam tak te, ei tûr te, thawmhnaw te leh thil hlu tak tak an hmu ṭeuh va. Râllâk sum lâk tûr a tam khawp a, ni thum chhûng ngawt an la khâwm a, an phurh sên loh khawp an la a ni.

²⁶A ni li ni chuan ‘Beraka’ ruamah an pung khâwm a, an tâna a thiltih zawng zawng avângin LALPA chu an fak a; chuvâng chuan chu hmun chu ‘Beraka’’ an ti ta a ni.

²⁷LALPA chuan an hmêlmate a hnehsak tâk avâng chuan Jehosafata leh a hote chu hlim takin Jerusalem-ah an haw ta a.

²⁸Jerusalem an thlen dâwn chuan ṭingṭang te, perhkhuang te leh tawtawrâwt ri te nên Tempul an pan a.

²⁹LALPA Pathianin Israel-te chu an hmêlmate a dosak tih an chhehvêl hnamte chuan an lo hriatin Pathian chu an hlau ta a.

³⁰Jehosafata chu râlmuang takin a lal a, LALPA chuan kil tinah a vêng tlat a ni.

³¹Kum sawmthum leh panga a nihin Jehosafata chu Judai ramah a lo lal a, Jerusalem-ah kum sawmhnih leh panga a lal a. A nu chu Azubai, Silhia fanu a ni.

³²A pa Asa ang bawk khân LALPA hmaah thil ṭha a ti a.

³³Amaherawhchu, hnam dang pathian biakna hmunsâng a tichhe vek lo va, mipuite pawhin an thlahtute Pathian biak an la uar tehchiam hek lo.

³⁴Jehosafata thil tih dang zawng zawng, a lal tirh aṭanga a thih thleng thu chu Hanania fapa ‘Jehua chanchin’ tih bu-ah ziak vek a ni. Israel lalte chanchin ziakna bu zîngah a tel.

³⁵Chumi hnuah chuan Judai ram lal Jehosafata leh Israel lal Ahazia, thil dik lo ti ṭhîntu chu ṭhianah an insiam a.

³⁶Ezion-geberah Tarsis khuaa kal tûr lawng rual an tuk a.

³⁷Maresa khaw mi, Dodavahua fapa Eliezara chuan Jehosafata hnênah, “Israel lal Ahazia te i thurualpui avângin LALPA chuan i thil tih a tichhia ang,” a ti a. An lawng rual chu a keh zo va, Tarsis khuaa kal tûr awzâwng a awm ta lo va.