Read Mizo Lushai BU HNIHNA CHRONICLES 21 Bible Online

BU HNIHNA CHRONICLES 21 - Mizo Lushai bible

BU HNIHNA CHRONICLES 21

¹Jehosafata chu a thi a, Davida khawpuiah an phûm a, a fapa Jehorama chu a lo lal ta a.

²Judai ram lal Jehosafata fapa Jehorama chuan nau paruk - Azaria te, Jehiela te, Zekaria te, Azaria te, Mikaela te, Sefatia te a nei a.

³An pa chuan rangkachakte leh ro hlu tam tâwk tak a pe ṭheuh va, Judai ram khawpui kulh nei, an enkawl tûr a ruatsak vek bawk a. Jehorama chu a fapa upa ber a nih avângin Jehosafata chuan a aiah a laltîr a.

⁴Jehorama chu a han lal ngheh chuan, a naute chu a thahtîr vek a. Israel zînga hotu ṭhenkhat pawh a thahtîr bawk a.

⁵Kum sawmthum leh pahnih a nihin Jehorama chu a lal ṭan a, Jerusalem-ah kum riat a lal a.

⁶Israel lal Ahaba leh lal dang sual tak tak angin a awm ve a, Ahaba fanu pawh nupuiah a nei a ni. LALPA chungah thil sual a ti a.

⁷Mahse, LALPA chuan Davida hnêna a thuthlung avâng leh a thlahte chu laltîr reng a tiam tlat avângin Davida thlahte chu a tiral mai hreh a ni.

⁸Jehorama lal laiin Juda-ho lakah Edom-ho chu an hel a, lal an nei hrang ta a.

⁹Jehorama leh a hote chuan sakawr-tawlailîr nên Edom chu an va rûn a. Edom sipaite chuan an lo hual a; mahse, zân khaw thimah an pût ru thei hrâm a.

¹⁰Chuta chin chu Edom chuan Juda-ho hnuaia awm lovin tûn thlengin lal hran an nei ta reng a ni. Jehorama chuan, LALPA, a thlahtute Pathian chu a ngaihsak loh avângin chutih hun lai vêl bawk chuan Libna khua chu an hel a.

¹¹Judai ram tlângramah pathian dang biakna hmunsâng a siam thluah nghe nghe a. Judai ram leh Jerusalem mite chu LALPA laka hela, thil sual ti tûrin a kaihruai a.

¹²Zâwlnei Eliza chuan lehkha a thawn a, “I thlahtu Davida Pathian, LALPA chuan i pa Jehosafata leh i pu Juda lal Asa te awm dân ang khân i awm ve loh avângin a thiam lo che a ni.

¹³Israel lalte khawsak dân angin i khawsa zâwk hlauh va, Ahaban Israel mite pathian dang hnêna a uirepui ang khân nang pawhin Judai ram mi leh Jerusalem mite chu i uirepui a. Nang aia ṭha ṭha, i naute lah i that vek bawk a.

¹⁴Hemi avâng hian LALPA chuan i mite, i fa te, i nupui te hripuiin a hrem dâwn, i neih zawng zawng a tihchhiatsak ang che.

¹⁵Nangmah ngei pawhin rîl natna benvawn na tak i tuar ang a, ni tin a zual tulh tulh ang,” tiin.

¹⁶Filistia mi leh Arab mi ṭhenkhat, tuipui kama Ethiopia mi lo awmte bulah an awm a. LALPA chuan chûngho chu Jehorama bei tûrin a chawk tho va.

¹⁷Judai ram chu an han rûn ta a. Lal inte chu an rawk a, lal nupuite leh a fapate chu salah an man vek a. A fa tlum Ahazia erawh chu an man ve lo.

¹⁸Chumi hnu chuan LALPA chuan an lal pum chu a tina chiam a,

¹⁹kum hnih dâwn lai chu a ni têlin a na tulh tulh a, a rîl a tla ta a, na tak tuarin lal chu a thi ta a. A pute thiha an tih angin a thih chuan a mite chuan amah sûn nân meipui an chhep ve lo.

²⁰Jehorama chu kum sawmthum leh pahnih a nihin a lal ṭan a, Jerusalem-ah kum riat a lal a, a thihin pawi an ti lo. Davida khawpuiah chuan an phûm a, lal thlânah erawh chuan an phûm lo.