Read Mizo Lushai BU HNIHNA CHRONICLES 22 Bible Online

BU HNIHNA CHRONICLES 22 - Mizo Lushai bible

BU HNIHNA CHRONICLES 22

¹Arab mi ṭhenkhatin Jehorama chu an rûn a, a fa tlum Ahazia tih loh a fapa dang zawng zawng chu an thahsak avângin Jerusalem mite chuan a pa aiawh tûrin Ahazia chu lalah an siam a.

²Ahazia chu kum sawmhnih leh pahnih mi a nihin a lal ṭan a, Jerusalem-ah kum khat a lal a. A nu chu Athali, Israel lal Ahaba fanu, Omria tunu a ni.

³Ani pawh a nu thurâwn ṭha lo tak a zawm ṭhîn avângin Ahaba chhûngte khawsak angin a khawsa ve ṭhîn a ni.

⁴LALPA hmuha thil sual a ti ṭhîn. A pa thih hnu chuan Ahaba chhûngte zînga mi ṭhenkhat chu a thu lâkna ber an ni ta a, a chhiat phah ta nghe nghe a ni.

⁵An thurâwn angin Suria lal Hazaela do tûrin Israel lal Ahaba fapa Jorama a thurualpui a, Gilead biala Ramot khua an beih a, an inbeihnaah lal Jorama chu an hliam a.

⁶Ramoth-gilead-a Suria lal Hazaela a va beihnaa a hliam enkawl dam tûrin Jezreel-ah chuan a lo kîr a. Tichuan, Juda lal Jehorama fapa Ahazia chu Ahaba fapa Jorama dam lo tlawh tûrin Jezreel-ah a zu kal a.

⁷Jorama a va tlawh chu Pathianin Ahazia chhiatna tûra a thil ruat a ni. An awm dun lai chuan mi pakhat Nimsia fapa Jehua a lo kal a; ani hi Ahaba chi timang tûra LALPA mi tirh a ni.

⁸Jehua chuan Ahaba thlahte chunga kut a thlâk lai chuan Jorama dam lo en tûr Ahazia ho - Juda hotute leh Ahazia laichînte chu Jehua chuan a hmu a, a that ve ta vek a.

⁹Ahazia chu a han zawng a, Samaria khuaah a lo biru a, Jehua hnênah an hruai a, a lo that ta a. Theihtâwp chhuaha LALPA zawng ṭhîntu a pu Jehosafata chu an zah avângin a ruang chu ṭha takin an phûm a. Ahazia chhûng zînga mi lal tûr rêng an awm ta lo.

¹⁰A nu Athali chuan Ahazia tualthih thu a hriat veleh Judai lal chhûngte zawng zawng a thahtîr a.

¹¹Ahazia khân farnu Jehosebi a nei a, puithiam Jehoiada chu pasalah a nei a. Ahazia fapa pakhat, Joasa chu, a rûkin a hum a, lal fa dang, tualthi mai tûrte zîng ata chu a la chhuak a, Tempula mutna pindan pakhatah a thukru a, a enkawl ta a. A thuhrûk tlat avângin Athali chuan a that ve lo.

¹²Chutah chuan kum ruk a thukru a, Athali chu lalah a ṭang ta a.