Read Mizo Lushai BU HNIHNA CHRONICLES 23 Bible Online

BU HNIHNA CHRONICLES 23 - Mizo Lushai bible

BU HNIHNA CHRONICLES 23

¹A kum sarihnaah chuan puithiam Jehoiada leh sipai za hotu pangate chu an inrâwn ngam ta a. Chûng mite chu Jehorama fapa Azaria te, Jehohanana fapa Ismaela te, Obeda fapa Azaria te, Adaia fapa Maaseia te, Zikria fapa Elisafata te an ni.

²Judai ram an fang kual a, Levia chite leh hnam hruaitute chu Jerusalem-ah an hruai khâwm a.

³Tempulah chuan an kal khâwm a, Joasa, lal fapa nên chuan thu an intiam a. Jehoiada chuan an hnênah, “LALPA chuan Davida thlahte chu lal tûrin a ruat a, hei hi lal thi ta-a fapa, lal tûra chu a ni.

⁴Hetiang hian thil kan ti ang: Sabat nia lo kal ṭhîn puithiamte leh Levia chi hmun thuma ṭhena hmun khat chuan Tempul kawngkhârte an vêng ang a.

⁵Hmun thuma ṭhena hmun khat chuan lal in an vêng ang a, a dang zawng zawng chu ‘Lungphûm’ kawngkhâr bulah an awm tûr a ni. Mipui chu Tempul tualah an lo kal khâwm tûr a ni.

⁶Tempul chhûngah puithiam leh Levia chi, rawngbâwl lai tih loh chu, tu mah an lût tûr a ni lo. Anni chu serh hran an ni a, an lût thei ang; mi dang erawh chu LALPA thu awihin an lût tûr a ni lo.

⁷Levia chite chuan lal hi an din hual ang a, khandaih phawi sa kengin an vêng tûr a ni, lal kalna apiangah an zui zêl tûr a ni. Tempula luh tum tawh phawt chu thah tûr an ni,” a ti a.

⁸Jehoiada chuan châwl tûrte chu a la chawlhtîr loh avângin, Sabat nia rawngbâwl tûrte leh châwl tûrte pawh chu an rawn hruai vek a,

⁹Davidan Tempula a dah, fei leh phawte chu Jehoiada chuan sipai hotute hnênah a sem a.

¹⁰Tempul kawtah khandaih phawi sa kengin mi a din kualtîr a, lal chu a vêntîr tlat a.

¹¹Jehoiada chuan Joasa chu a hruai chhuak a, lal tih tûr dân bu chu a pe a, lalah an siam ta a. Puithiam Jehoiada leh a hote chuan Joasa chu hriak an thih a, “Lal hi dam reng rawh se,” tiin an au va.

¹²Athali chuan lal an chawimawi thâwm chu a han hriat chuan mipui punkhâwmna Tempul lam chu a pan a.

¹³Lal thar chu lal dinna tûra an ruat Tempul chhûng luhna kiang ban bula a ding chu a han hmu a, sipai hotute leh tawtawrâwtpute chuan an din hual a. Mipui chu hlim takin an au dual dual a, tawtawrâwt an hâm a, Tempul zaipâwlte chuan an thil tum rîkte nên zai an hruai a. Chûng chu a han hmuhin mangangin a puan a pawtthlêr a, “Min phiarru a lo nih hi,” tiin a au va.

¹⁴Jehoiada chuan Tempula thah a duh lo va, sipai hotute chu a ko va, “Vêngtu sipai kârah rawn hruai chhuak ula, chhan tum apiang chu lo that zêl ang che u,” a ti a.

¹⁵Athali chu an man a, lal in lamah an hruai a, Sakawr kawngkhâr an tih bulah chuan an that ta a.

¹⁶ LALPA mi ni ngei tûrin puithiam Jehoiada chuan lal Joasa leh mipui chu thu a thlunpui a.

¹⁷Baal an biakna hmunah chuan an za-in an kal a, an ṭhiat ta a. Maichâm chu an tichim a, milemte chu an chhu keh a, Baal puithiam Matana chu maichâm bulah an that a.

¹⁸Jehoiada chuan puithiamte leh Levia chite chu Tempula an hna tûr a thawhtîr a, lal Davida remruat angin tih tûr an semsak a, Mosia dân bu-a ziak angin LALPA hnênah hâlral thilhlante an hlân a. Rimawi tum te, zai te leh zai hruai te pawh an tih tûr a ni.

¹⁹Jehoiada chuan Tempul kawngkhârte pawh a vêntîr a, mi bawlhhlawh tu mah an luhtîr tûr a ni lo.

²⁰Sipai hotute, ram hruaitute leh mipuite chuan Jehoiada hovin kawng an zawh a. Lal chu Tempul aṭangin lal inah an hruai a, kawngkapuiah an luhpui a, lalṭhutthlêngah chuan lal chu a ṭhu ta a.

²¹Mi zawng zawng chu an hlim hle a ni. Athali chu khandaiha an thah tâk avângin khuaah chuan buaina a reh ta a.