Read Mizo Lushai BU HNIHNA CHRONICLES 24 Bible Online

BU HNIHNA CHRONICLES 24 - Mizo Lushai bible

BU HNIHNA CHRONICLES 24

¹Joasa chu kum sarih a nihin Judai ramah a lal ṭan a, Jerusalem-ah kum sawmli a lal a, a nu chu Zibi, Beer-seba mi a ni,

²Puithiam Jehoiada dam chhûng chuan Joasa chuan LALPA lawmzâwng hlîr a ti ṭhîn.

³Jehoiada chuan lal Joasa chu nupui pahnih a neihsak a, fanu leh fapa an hrinsak ṭeuh va.

⁴Chûng hnuah chuan Joasa chuan Tempul chei ṭhat zai a rêl ta a.

⁵Puithiam leh Levia chite chu Judai ram khawpuite a fantîr a, kum tina Tempul chei ṭhatna daih tûr thawhlâwm a khawntîr a. Hmanhmawh tûrin a ti a; mahse, Levia chite chu an vuaicha hle a.

⁶Tichuan, Jehoiada chu a ko va, “Levia chite hian Judai ram leh Jerusalem mite hnên aṭangin ‘Biakbûk’ enkawlna tûr LALPA chhiahhlawh Mosia tuk kha an khawn ṭhat leh ṭhat loh engati nge i enpui loh?” a ti a.

⁷Mi sualnu Athali zuitute kha Tempulah an lût lui a, thil thianghlim tam tak Baal biaknaa hmanah an la chhuak a ni.

⁸Lal chuan Levia chite chu thawhlâwm bâwm siama, Tempul luhna kawngkhâr bula dah tûrin a ti a.

⁹Jerusalem leh Judai ram zawng zawngah Pathian chhiahhlawh Mosian thlalêra mipui thawh tûr bi a ruat ang kha rawn keng zêl tûrin thu an than a.

¹⁰Mipuite leh an hruaitute chuan lâwm takin thawh tûr bituk zât chu an rawn keng a, bâwm chu an thlâk khat ta hial a.

¹¹Levia chite chuan bâwm chu ni tin, a enkawltu tûra lalin a ruat hnênah chuan an rawn dah ṭhîn a; bâwm chu a khah veleh puithiam lalber Jehoiada aiawhtu leh lal mi ruat ziaktu chuan an lo la chhuak a, bâwm chu a dahnaah an dah kîr leh ṭhîn. Tangka tam tâwk tak an thawh khâwm ta a.

¹²Lal leh Jehoiada chuan Tempul chei ṭhat hna enkawltute hnênah pawisa chu an pe chhuak ṭhîn a; annin lung chher mi te, thing dek thiam te, thîrdêng te Tempul chei ṭha tûr chuan an ruai a.

¹³Ngawrh takin mistiri te chuan hna an thawk a, Tempul chu a tîra mi anga nghet khân an chei ṭha leh ta a.

¹⁴Hna thawh tûr an tih zawh chuan rangkachak leh tangkarua an hman bâng chu lal Joasa leh puithiam lalber Jehoiada an pe a; anni chuan Tempula rawngbâwl nân leh hâlral thil hlanna atân bungbêl te, rimtui hâlna thlêng te, rangkachak leh tangkarua a siam bungbêl te siam nân an lo hmang a. Jehoiada dam chhûng chu ni tin Tempulah chuan thilhlan an hlân ziah ṭhîn a.

¹⁵Tarkûnin a dam a, kum za leh sawmthum a tlinin a thi ta a.

¹⁶Israel mite zîngah Pathian tân leh Tempul tân thil a tih ṭhat êm avângin Davida khawpuia lal thlânah an phûm ve ta a.

¹⁷Jehoiada a thih tâk hnu chuan Judai ram mipui hruaitute chuan an thu ngaithla zâwk tûrin lal chu an hmin ta a.

¹⁸Mipui chuan an thlahtute Pathian, LALPA chu Tempulah chuan an be duh ta lo va, milem te, pathiannu Aseri lemte an be ta zâwk a. An sualna avângin Judai ram mite leh Jerusalem mite chungah LALPA chu a thinur ta hle a.

¹⁹LALPA chuan anni chu hruai kîr tûrin zâwlneite a tîr a; mahse, mite chuan an thu an lo ngaithla duh lo.

²⁰Puithiam lalber Jehoiada fapa Zekaria hnênah Pathian thlarau a lo thleng a, mipuiin an hmuh theihna tûrah chuan a ding a, ring takin a au va, “LALPA Pathian chuan heti hian a ti: ‘Engtizia nge ka thupêkte zâwm duh lovin mahni chungah chhiatna in thlentîr dâwn le? LALPA chu in kalsan avângin ani pawhin a kalsan che u a ni,” a ti a.

²¹Zekaria chu an er hle a, lal thupêkin Tempul tualah chuan lungin an dêng hlum ta a.

²²Lal chuan Zekaria pa Jehoiada kha a tân a ṭangkaizia kha a theihnghilh a, Zekaria chu a tihhlumtîr ta mai a ni. Zekaria thi tûr chuan, “I thil tih hi LALPA chuan hmu sela, phuba la teh se,” a ti a.

²³Kum a lo thar chuan Suria sipaite chuan Judai ram leh Jerusalem an rawn rûn a, hotu tam tak an that a, râllâk sum tam tak Damaska khuaah an hâwn a.

²⁴Suria sipaite chu an tlêm hle nâ a, an aia tam daih Juda sipaite chu an hneh a ni. An thlahtute Pathian, LALPA chu an kalsan avângin an chak lo va, Lal Joasa pawhin a tuar phah ta a ni.

²⁵Joasa chuan hliam na tak a tuar a, hmêlmate chuan an kalsan ta a, a hote pahnih an inthurual a, puithiam lalber Jehoiada fapate a thah phuba chu an la a, khuma a mu chu an that a; lal thlânah ni lo, Davida khawpuiah an phûm ta a.

²⁶Inthuruala thattute kha Amon mi Simeata fapa Zabada leh Moab mi Simriti fapa Jehozabada te an ni.

²⁷Lalte lehkhabu hrilhfiahna bu-ah Joasa chanchin te, a chungchânga zâwlnei thu hril lâwk te, Tempul a chei ṭhat thu te a chuang. A fapa Amazia chu a lo lal ta a.