Read Mizo Lushai BU HNIHNA CHRONICLES 25 Bible Online

BU HNIHNA CHRONICLES 25 - Mizo Lushai bible

BU HNIHNA CHRONICLES 25

¹Kum sawmhnih leh panga a nihin Amazia chu a lal ṭan a, Jerusalem-ah kum sawmhnih leh pakua a lal a, a nu chu Jerusalem chhuak Jehoadini a ni.

²LALPA duhzâwng a ti ṭhîn; mahse, hreh tak chungin a ni a tih ṭhin ni.

³Lala a ṭhut ngheh veleh a pa thattute kha a that ve a.

⁴An fate erawh chu a khawih lo, Mosia Dân bu-a LALPA thu, ‘Nu leh pate chu an fate sualna avânga tihhlum tûr an ni lo; fate pawh an pate sualna avânga tihhlum tûr an ni lo; anmahni sualna avâng chauhvin mi tihhlum tûr an ni,’ tih kha a zâwm a ni.

⁵Lal Amazia chuan Juda mite leh Benjamin mite chu a chi chiin sipai pâwl hrang hrangah a siam a; sâng rual te, za rual te hotu tûr a ruat thliah bawk a. Mipa kum sawmhnih chin chung lam chu an tel vek a ni, an vaiin nuaithum an tling.

⁶Hêngho bâkah hmâr lam Israel-ho, mi nuai khat, tangkarua kg. sângthum leh zali bûk laiin a ruai bawk a.

⁷Nimahsela, lal hnênah chuan zâwlnei pakhat a lo kal a, “Israel sipaite hi hruai ve suh. Hêng Hmâr lam ram mite lamah hian LALPA chu a ṭang lo ve.

⁸Indonaah i chak phah i inbeisei a ni ang e. Indonaa chak leh chak loh hi Pathian thu thu a ni asin; hmêlmaten an hneh phah zâwk ang che,” a rawn ti a.

⁹Amazia chuan zâwlnei hnênah, “Tangka ka pêk tawh zozai kha engtin nge ni ta ang?” a ti a. Zâwlnei chuan, “LALPA chuan a aia tam zâwk a pe leh thei che alâwm,” a ti a.

¹⁰Amazia chuan a sipai rawih, Efraim ram aṭanga lo kalte chu a bân a, a hawtîr ta a; Juda-ho chunga thinrim engphiarin an haw ta a.

¹¹Amazia chuan huphurh lo deuhvin a sipaite chu Chi Ruamah a kalpui a. Edom sipaite nên chuan an inbei a, mi sîngkhat an that a.

¹²Mi sîngkhat an man bawk a; Sela khaw khâm kovah chuan an hruai a, an nam thla a, an tlahlum ta vek a.

¹³Amazian indonaa kal ve a phal loh sipai a tirh hâwnte khân Samaria leh Beth-horon inkâra Juda khawpuite chu an bei a, mi sângthum zet an that a, râllâk sum tam tak an la a.

¹⁴Amazian Edom-ho a hneh a, a lo haw chuan, an milemte a rawn hâwn a, a dahna a siam a, chibai a bûk a, an hmaah rimtui a hâl ta a.

¹⁵Hei vâng hian LALPA chu a thinur a, Amazia hnênah zâwlnei a tîr a. Zâwlnei chuan, “I laka an mite pawh chhan thei hlei lo hnam dang pathiante chu engtizia nge i biak tâk mai?” a ti a.

¹⁶Lal chuan, “Engtik lai khân nge lal thurâwntu atân ka ruat che le? Ngawi mai rawh, ka that mai tûr che a nia,” a ti a. Zâwlnei chuan, “Ka thurâwn ngaithla lova hêng hi i tih avângin Pathianin tihboral che a tum tih ka hre ta,” a ti a, a ngawihsan ta a.

¹⁷Judai lal Amazia leh a upate chuan Israel beih an rawt a, Jehua fapa, Jehoahaza fa Israel lal Jehoasa hnênah, “Pa leh pa, i han inbei teh ang,” tia cho tûrin mi a tîr a.

¹⁸Jehoasa chuan hetiang hian a chhâng a, “ ‘Vawi khat chu Lebanon tlânga lenhlîng hian Lebanon sidar thing hnênah, ‘ka fapa nupuiah i fanu min pe rawh,’ a ti a. Ramsa veivâkin lenhlîng chu a pal thlu ta mai a.’

¹⁹Amazia, Edom mite i zu hneh hi i chhuang a nih vei hi; inah tawm hle hle mai rawh. Nang leh i mite tâna pawi tûr thil chawkchhuak mah ta che,” a lo ti a.

²⁰Amazia chuan a thu chu a pawisa lo va, Edom mite pathian lem a biak avângin Pathianin Israel-ho kuta pêk a lo tum a ni.

²¹Israel lal Jehoasa leh Juda lal Amazia chu inbei tûrin an thawkchhuak a; Judai ram Beth-semes khaw bulah an inbei ta a.

²²Juda sipaite chu an chak lo ta zâwk a, mahni in lam panin an tlânchhia a.

²³Israel lal Jehoasa chuan Juda lal Amazia, Joasa fapa, Ahazia tupa chu a man a, Jerusalem-ah a hruai a; khawpui kulh bang chu ‘Efraim kawngkhâr aṭanga bangkil kawngkhâr’ an tih thlengin kulh bang tawng zali chu a ṭhiat a.

²⁴Râllâk sumah Tempula rangkachak leh tangkaruate, Obed-edoma thlahten an vên ṭhin Tempul bungbêl leh lal ina sum dah ṭhatte chu a hâwn a, dahkhama hrên tûr mi a hruai hâwng bawk a.

²⁵Juda lal Amazia chu Israel lal Jehoasa ai chuan kum sâwm leh pangain a dam rei zâwk a.

²⁶A lal tirh aṭanga a lal tâwp thlenga Amazia thil tihte chu ‘Israel leh Juda lalte chanchin’ tih ziakna bu-ah a chuang.

²⁷LALPA laka a hel chinah kha chuan amah thah tum Jerusalem khaw mi an awm zeuh zeuh reng a ni. A tâwpah phei chuan Lakis khuaah a tlân a; mahse, a hmêlmate chuan an ûmzui a, an va that ta tho va.

²⁸A ruang chu sakawr an phurhtîr a, Davida khawpuiah lal thlânah an phûm ta a.