Read Mizo Lushai BU HNIHNA CHRONICLES 28 Bible Online

BU HNIHNA CHRONICLES 28 - Mizo Lushai bible

BU HNIHNA CHRONICLES 28

¹Ahaza chu kum sawmhnih a nihin a lal ṭan a, Jerusalem-ah kum sâwm leh paruk a lal a. A pu Davida tih dân ang zâwm duh lovin LALPA duh loh zâwng a ti a.

²Israel lalte tih dân a la a, Baal lim a chhûntîr a.

³Hinom ruamah rimtui a hâl a, Israel mite hmaa LALPA hnawh chhuah hnam dang tih dân tenawm tak takte chu a chîng ve a, a fapate ngei pawh milem hmaah hâlral thilhlan atân a hlân a.

⁴Tlânga hnam dang pathian biakna hmunsângah te, thingbuk ṭha deuh hlim hnuaiah te Ahaza chu a inthawi ṭhîn a, rimtuite a hâl ṭhîn.

⁵Ahaza chuan thil sual a tih avângin Suria lal kutah LALPA, Pathian chuan a pe a; Damaska khuaah Juda mi tam tak Suria lal chuan a hâwn a.

⁶Israel lal Remalia fapa Peka pawhin Ahaza chu a bei a, a hneh a, Juda sipai huai ṭha ṭha mi nuaikhat leh sînghnih a that a. Judai ram mite chuan an thlahtute Pathian, LALPA chu an kalsan avângin LALPA chuan chûng thil chu an chungah a thlentîr a ni.

⁷Israel sipai Efraim pasalṭha Zikria chuan Ahaza fapa Maaseia chu a that a, lal in enkawltu Azrikama a that bawk a; lal dawttu Elkana pawh a that a.

⁸Juda-te chu an unaute an ni na a, Israel sipaite chuan hmeichhia leh naupang nuaihnih salah an man a. Samaria khuaah an khalh khâwm a, râllâk sum tam tak an hâwn bawk a.

⁹Samaria khuaah chuan LALPA zâwlnei pakhat Odeda a awm a, Israel sipai ruala Judai rama an sal mante Samaria khua an lût tûr chu a lo hmu a, an hnênah, “In thlahtute Pathian, LALPA chu Juda-ho chungah a thinur a, a hnehtîr ta che u a ni; mahse, in that a, an chunga in nun a râwn lutukzia a hmu reng asin.

¹⁰Jerusalem leh Judai rama awm mipa pawh, hmeichhia pawh bawiha siam in tum leh zêl a nih hi. Nangni pawhin LALPA, in Pathian lakah thil sual in ti tih in hre na nge?

¹¹Ka thu hi ngaithla teh u, hêng in sal mante hi in unau, in farnute an ni asin; chhuah vek rawh u, chutilo chu LALPA a thinur ang a, a sawisa ang che u,” a ti a.

¹²Hmâr lam lalrama hotu lian, Jehohanana fapa Azaria te, Mesilemota fapa Berekia te, Saluma fapa Zehiskia te, Hadlaia fapa Amasa te pawhin sipaiho thiltih chu ṭha an ti lo va.

¹³An hnênah, “In sal mante hetah han hruai suh u, LALPA lakah thil sual kan ti dêr tawh a, min hrem duh hial khawpin kan tithinur a ni. Kan thil sual tih tawh bâkah la tih belh leh zêl in tum em ni?” an ti a.

¹⁴Tichuan, sipaite chuan an sal man leh râllâk sum an hawnte chu mipui leh an hotute kutah an hlân ta a.

¹⁵Chûng hming sawi tâkte chu an râllâk sum aṭanga sal an mante hnêna thawmhnaw pe tûrin an ruat a. Silhfên te, pheikhawk bun tûr te an pe a; an hliam chulh tûr oliv hriak an sem bawk a. Mahni kea kal thei lo khawpa chaute chu sabengtung chungah an chuantîr a; an sal man zawng zawng chu Judai ram Jeriko, tûm khua an tihah chuan an hruai kîr leh ta vek a. Tin, Israel-ho chu Samaria lamah an haw ta a.

¹⁶Chûng lai chuan lal Ahaza chuan amah ṭanpui tûrin Asuria lalte a ko va,

¹⁷Edom-hovin Judai ram an rawn rûn a, an hneh a, mi tam tak an man a ni.

¹⁸Filistia-ho lahin thlang lam tlâng ṭhut phai khua te leh Judai ram Negeb te an rawn bei bawk a. Anni phei chuan Beth-semes te, Aijalon te, Gederot te, Soko leh a chhehvêl khua te, Timna leh a chhehvêl khua te, Gimzo leh a chhehvêl khua te an la a, an luah ta tlat a.

¹⁹Juda lal Ahaza chuan a mite ṭhatna tûr a ngaihtuah miah lo va, LALPA chu a pawisak dêr loh avângin Juda-ho chu a titlâwm a ni.

²⁰Asuria lal Tiglat-Pilesera chuan Ahaza chu puih ahnêkin harsatna a siamsak ta zâwk a.

²¹Ahaza chuan Tempula rangkachak te, lal ina mite leh mi hausa deuh ina mi te chu a la a, Asuria lal chu a pe a; mahse, a sâwt lo.

²²A mangan vânglai tak pawh chuan Ahaza chu LALPA lakah a sual sauh va.

²³Amah hnehtu Suria-ho pathiante chu chibai a bûk ve ta mai a, ‘Suria pathiante hian Suria lal an ṭanpui a; chuvângin, an hnênah thilhlan hlân ila min pui ve ngei ang,’ a ti a ni. Chu chu a mite nên chuan chhiat zual phah sauhna a ni.

²⁴Chûng bâkah, Tempula hmanrua a la chhuak a, a tichhia a. Tempul chu a khâr a; Jerusalem khuaah maichâm a siam thliah thluah a;

²⁵Judai ram khawpuiah leh khuaahte chuan hnam dang pathian biakna hmunsâng, rimtui hâlna tûr a siam fer fur a. Hetiang hian a thlahtute Pathian, LALPA chu a tithinur a ni.

²⁶A rorêl chhûng chanchin dangte chu a bul aṭanga a tâwp thlengin ‘Juda leh Israel lalte chanchin’ ziakna bu-ah a chuang.

²⁷Ahaza chu a thi a, lal thlânah ni lo, Jerusalem-ah an phûm a, a fapa Hezekia chu a lal ta a.