Read Mizo Lushai BU HNIHNA CHRONICLES 29 Bible Online

BU HNIHNA CHRONICLES 29 - Mizo Lushai bible

BU HNIHNA CHRONICLES 29

¹Hezekia chu kum sawmhnih leh panga a nihin Judai ramah a lal ṭan a, Jerusalem-ah kum sawmhnih leh pakua a lal a. A nu chu Zekaria fanu Abijai a ni.

²A pu Davida angin LALPA lâwmzâwng a ti ṭhîn.

³A lal tirh kum, thla hmasa berah Hezekia chuan Tempul kawngkhârte chu a hawng leh a, a chhiate chu a siam ṭhattîr a.

⁴Tempul khawchhak lam tualah chuan puithiamte leh Levia chite chu a ko khâwm a,

⁵an hnênah, “Nangni Levia chite u, inthian thianghlim ula, in pate Pathian, LALPA in hi thian thianghlim rawh u; Tempul aṭang hian thil bawlhhlawh zawng zawng paih chhuak vek rawh u.

⁶Kan pate chu LALPA, kan Pathian lakah an rinawm lo va, a duh loh zâwng an ti a. An helsan a, a awmna in chu hawisanin an hnuchhawn ta a.

⁷Tempul kawngkhâr chu an kalh a, khâwnvâr an timit a, rimtui an hâl lo va, Hmun Thianghlimah Israel-te Pathian tân hâlral thilhlan an hlân hek lo.

⁸Hei vâng hian LALPA chu Juda leh Jerusalem mite chungah a thinur a, mi tin mak tih leh chekkhum hial khawpin a sawisa ta a ni; chu chu nangni pawhin in hmu reng a.

⁹Kan pate chu khandaiha sah hlum an ni a, kan fanu kan fapa, kan nupuite nên salah an man kha.

¹⁰Kan chunga a thinur hi a tihkian beiseiin Israel-te Pathian, LALPA nên thu thlun ka tum ta a ni.

¹¹Ka fate u, awm mai mai teh suh u, LALPA chuan a hmaa dinga, a rawngbâwl atân a thlang che u a; chuvângin, a rawng bâwl ula, thilhlante hlân rawh u,” a ti a.

¹²Chûng zîngah chuan Levia chi hêngte hi an tel: Kohata thlahte zînga mi Amasaia fapa Mahata leh Azaria fapa Joela. Meraria thlah zînga mi Abdia fapa Kisa leh Jahalelela fapa Azaria; Gersona thlahte zînga mi Zima fapa Joa leh Joa fapa Edena.

¹³Elizafana thlah zînga mi Simria leh Jeuela; Asafa thlah zînga mi Zekaria leh Matania;

¹⁴Hemana thlah zînga mi Jehuela leh Simeia; Jeduthuna thlah zînga mi Semaia leh Uziela.

¹⁵Hêng mite hian an chipui Levia chite chu an pun khâwm a, an inthian thianghlim a; lal thupêk ang chuan Tempul chu an thian a. LALPA Dân bu-a sawi angin an thian fai ta a.

¹⁶LALPA Tempul chhûngah puithiamho chu an lût a, thil bawlhhlawh an hmuh rêng rêng chu LALPA in tualah chuan an rawn dah chhuak a; Levia chite chuan chûng chu Kidron luiah an paih a.

¹⁷Thla khatna, ni hmasa berah Tempul chu an thian ṭan a, ni riat ni chuan Tempul pindan hmasa thlengin an thian zo va. Ni riat dang, ni sâwm leh paruk thlengin Tempul chhûng chu Pathian biakna tlâk tûrin an thian leh a, an tithianghlim ta a.

¹⁸Levia chite chu lal Hezekia hnênah an kal a, “Tempul chhûng chu kan thian thianghlim ta. Hâlral thilhlan hâlna maichâm te, chhang serh dahna dawhkân te leh hmanrua zawng zawng pawh kan tithianghlim ta.

¹⁹Ahazan LALPA laka suahsual a bâwl laia Tempul bungbêl a lâk chhuahte kha kan dah kîr a, kan tithianghlim vek tawh a, LALPA maichâm bulah engkim dah fel a ni tawh,” an rawn ti a.

²⁰Lal Hezekia chuan Jerusalem-a hotu deuh deuh chu a ko khâwm rum rum a, LALPA Tempulah chuan an kal a.

²¹Bâwngpa pasarih, berâmchal pasarih, berâmno pasarih leh sual thawina thilhlanah kêlpa pasarih an rawn dah a; Arona thlah puithiamte chu LALPA maichâma hlân tûrin a ti a.

²²Bâwngte chu an talh a, an thisen chu maichâmah an theh a, berâmte pawh chu an talh a, an thisen chu maichâmah an theh bawk a.

²³Lal leh pungkhâwmho hmaah chuan sual thawina thilhlan atân kêlpate chu an rawn kai a, an lu-ah an kut an nghat a;

²⁴Puithiamte chuan an talh a, an thisen chu sual thawi nân an hlân a, Israel mi zawng zawng sual thawi nân an hlân a ni. Lal thu angin hâlral thilhlan leh sual thawina thilhlan chu Israel mi zawng zawng tân an hlân a ni.

²⁵Lal zâwlnei Gada leh zâwlnei Nathana hmanga Davida hnêna LALPA sawi ang khân Levia chite chu perhkhuang te, dârbenthek leh ṭingṭang te nên Tempulah chuan a dah a.

²⁶Davida tum ṭhin ang thiltum chite an keng bawk a. Puithiamte pawh tawtawrâwt kengin an ding a,

²⁷Lal Hezekia chuan hâlral thilhlan chu hlân tawh tûrin a hrilh a; an han hlan chuan mipuiin LALPA fak hla an sa a, tawtawrâwt te an hâm a, tum rîk chi dangte pawh chu an tum ta a.

²⁸Chuta awm apiang chuan Pathian chibai an bûk a, hla an sa a, an thilhlan a kan zawh hma chu rimawi an tum zui zêl a.

²⁹Lal Hezekia leh mipuite chu an ṭhingṭhi a, Pathian chibai an bûk a.

³⁰Lal leh hotute chuan Davida leh zâwlnei Asafa hla phuah, LALPA fakna hla kha, Levia chite chu an saktîr a. Ṭhingṭhia Pathian chibai bûkin an za chuan hlim takin an awm zui ta a.

³¹Hezekia chuan mipui hnênah, “LALPA tân in inthian thianghlim ta bawk a; thilhlan te, lâwmthu sawina te LALPA Tempulah han la rawh u le,” a ti a.

³²Pungkhâwmho chuan thilhlan te, lâwmthu sawina te an rawn hlân a, a duh apiangin hâlral thilhlan tûr te an rawn keng bawk a. Pungkhâwmhovin hâlral thilhlan tûr an rawn lâkte chu bâwngpa sawmsarih, berâmno zahnih leh berâm za a ni.

³³Bâwng zaruk leh berâm sângthum pawh thilhlan chi dangah an hlân a.

³⁴A talhtu tûr puithiam an indaih loh avângin an talh zawh hma chu Levia chiten an pui a. A tâwp lamah chuan puithiam tam zâwk pawh an inthian thianghlim hman a; Levia chite hi puithiamho ai chuan an lo invawng thianghlim thei zâwk a lo ni.

³⁵Mipui thilhlan hâl hi puithiam tih tûr a ni a. An ran talh mipui ei thaute pawh an hâl tûr a ni; hâlral thilhlan ruala uain an rawn hlante pawh puithiamin an bun chhuak tûr a ni. Tichuan, Tempul rawngbâwlna chu an ṭan leh ta a.

³⁶Lal Hezekia leh mipuite chu Pathianin hetianga ti leh thei mai tûra a ṭanpui avângin an hlim ta êm êm a.