Read Mizo Lushai BU HNIHNA CHRONICLES 3 Bible Online

BU HNIHNA CHRONICLES 3 - Mizo Lushai bible

BU HNIHNA CHRONICLES 3

¹Solomona pa, Lal Davida khân, Jerusalem khaw chhûng Moria tlânga Jebus mi Ornana hruihzâwlah Tempul sakna tûr hmun a lo buatsaih diam tawh a, chutah chuan Solomonan

²a lal kum lina thla hnihnaah Tempul chu a sa ṭan ta a.

³Solomonan Pathian tâna Tempul a rel chu a dung tawng sawmruk, a vang tawng sawmhnih a ni.

⁴A pindan hmasa chu tawng sawmhnih bial a ni; a chung chu tawng za leh sawmhniha sâng a ni, a chhûng lam chu rangkachaka chei a ni.

⁵A pindan laita chu Sidar thinga thuah vek a ni; tûm thing leh khaidiat lem, rangkachak ṭha chia siam a bel chhuak vek a, chutah chuan tûm thing leh khaidiat lem a chuantîr a.

⁶Lal chuan lungmantam mawi tak tak leh Parvaim ram rangkachakin Tempul chu a chei a.

⁷A bang te, a khanchhuk te, a pindan hmasa leh a kawngkhâr te chu rangkachakin a luan a, bangahte chuan themthiamho chuan Cherub lemte an ker bawk,

⁸Pindan chhûngril, Hmun Thianghlim Ber an tih chu tawng sawmhnih bial a ni, Tempul vâng lam tiat a nih chu. He Hmun Thianghlim Ber bang thuah nân hian rangkachak kg. sânghnih an hmang a,

⁹rangkachak thîrkilhna zanga leh sawmsarih an hmang a, pindan chhûng lam pawh rangkachaka tuam chhuah vek a ni.

¹⁰Lalin themthiamho chu dârin Cherub pahnih lem a siamtîr a, rangkachakin an tuam a, Hmun Thianghlim Berah chuan a dahtîr a.

¹¹Pindan luhna lam hnungchhawnin a dahtîr a, thla pahnih an nei a, pakhat thla zâr chu tawng sâwm a ni.

¹²Pakhat dang thla zâr pawh chu tawng sâwm a ni a, an thla hmawr chu a inkhawih a, a hmawr lehlam chuan bang a khawih ve ve a.

¹³Tichuan, Cherub thla zâr chu tawng sawmhnih a ni a, a luhna lam hnungchhawnin an ding a.

¹⁴Hmun Thianghlim Ber luhna puanzâr chu puan zai sîn a ni a, a dumpâwl te, a senduk te leh a senlâr tea tah a ni; Cherub lem an zep thluah bawk a.

¹⁵Lal chuan dâr ban mûm pahnih, tawng sawmthum leh pangaa sâng, hma lamah a phun a, a ban lu bâwk chu tawng nga hawlh tlanga lian a ni.

¹⁶A ban lu bâwk chu khaidiat anga chei kual a ni, khaidiat lem chhûngah chuan theibuhfai lem a chuang a, a vaiin za a awm.

¹⁷Bante chu Tempul luhna bula phun a ni a, chhim lama ban chu Jakina ban an ti a, hmâr lama mi chu Boaza ban an ti a.