Read Mizo Lushai BU HNIHNA CHRONICLES 30 Bible Online

BU HNIHNA CHRONICLES 30 - Mizo Lushai bible

BU HNIHNA CHRONICLES 30

¹Puithiam tam tak an inthian thianghlim hman lo va, mipui lah Jerusalem-ah an pung khâwm hman hek lo; chuvângin, Kalhlên Kût chu a hun takah an hmang thei ta lo va.

²Lal Hezekia leh a hote leh Jerusalem mite chu an inrâwn khâwm a, Kalhlên Kût chu a thla hnihnaah hman an rêl ta a. Lal chuan Israel ram leh Judai ramah thu a thawn darh ta chiam a.

³Efraim leh Manase-ho te phei chu Jerusalem Tempula lo kala, LALPA chawimawia Kalhlên kût hmang tûrin lehkhain a sâwm nghe nghe a.

⁴Lal leh mipuite chuan an thil rawt chu tifuh an inti hle a.

⁵Hmâr lam, Dan aṭanga chhim lam Beer-seba inkâra Israel mi zawng zawng chu Jerusalem-ah a tam thei ang ber lo kala, Kalhlên kût rawn hmang tûrin an sâwm a.

⁶Lal leh a hote chuan Judai ram leh Israel ramah lamkal an tlântîr a, ngenna lehkha hetiang hi an thawn darh a: “Israel mite u, Abrahama te, Isaka te, Jakoba te Pathian, LALPA lam hi hawi teh u; keini, Asuria kut tuar lova, nungdama la awmte lam hi a lo hawi ve dâwn nia.

⁷In pate leh in unau te, in thlahtute Pathian, LALPA laka an che khawlo ang khân che ve suh u, in hmuh angin a hrem nat êm kha.

⁸Anni angin luhlul suh u, LALPA thu chu zâwm zâwk rawh u. In Pathian LALPA tihthianghlim tawh Jerusalem-a a Tempulah hian lo kal ula; hetah hian amah chu chibai han bûk rawh u, in laka a thinur a reh dâwn nia.

⁹LALPA lam in lo hawi phawt chuan in hmêlmaten sala an man in lainate kha an lo khawngaih ang a, an rawn hâwntîr ngei ang. LALPA, in Pathian hi Pathian ngilnei a ni asin, a lam in lo hawi chuan a hawisan tawp lo vang che u,” tiin an ziak a.

¹⁰An mi tirhte chu Efraim leh Manasea thlahte awmna ram khaw tinah an kal a, Zebulun ram pawh an thleng a; mahse, mite chuan an lo nuihsawh a.

¹¹Chuti chung pawh chuan Aser-ho te, Manase-ho te, Zebulun-ho te Jerusalem-a lo kal duh an awm nual a.

¹²Judai ramah pawh Pathian chuan hna a thawk a, lal leh a hote thu angin lungrual taka Pathian duhzâwng tih an châk ta hle hlawm a.

¹³Thla hnihnaah chuan chhang dawidim telh loh kût hmang tûrin Jerusalem khuaah chuan mi tam tak an lo kal khâwm a.

¹⁴Jerusalem-a pathian dang biakna maichâm awm zawng zawng, rimtui an hâlna maichâmte nên an la a, Kidron luiah an paih a.

¹⁵Ni sâwm leh pali ni chuan Kalhlên kûta thilhlan berâmno chu an talh a. Puithiam leh Levia chi te pawh kha, an zah êm êm avângin LALPA tân an lo inthian thianghlim fel vek tawh a, hâlral thilhlan pawh Tempulah an hlân ve thei tawh a ni.

¹⁶Pathian mi Mosia Dân bu-a sawi ang khân an awmna tûr hmun ruatah an awm ṭhap a. Levia chite chuan thilhlan thisen chu puithiamho an pe a, anni chuan maichâmah an lo theh a.

¹⁷Mi tam tak chu an bawlhhlawh avângin Kalhlên kût berâmno an talh a thiang lo va, Levia chite khân an talhsak a, LALPA hnênah an hlân a.

¹⁸Efraim-ho te, Manase-ho te, Isakar-ho te, Zebulun-ho te zînga mi tam tak phei chu an inthen thianghlim loh avângin dân ang lovin Kalhlên kût chu an hmang a ni.

¹⁹Lal Hezekia chu chûngho tân chuan a ṭawngṭai a, “Aw LALPA, min thlahtute Pathian, bawlhhlawh kai an ni chung pawhin thinlung taka chibai bûktu che chu i ṭhat avângin ngaidam ang che,” a ti a.

²⁰LALPA chuan Hezekia ṭawngṭai chu a ngaithla a, mite chu a ngaidam a, engtin mah a khawih lo.

²¹Hlim takin ni sarih chhûng chu Jerusalem-a lo kalte chuan chhang dawidim telh loh kût chu an hmang a, ni tin mai Levia chite leh puithiamte chuan awrâwl tâwp chhuahin LALPA fak hla an sa a.

²²LALPA biaknaa an tumrîk neihte nên inkhâwm kaihhruai an thiam êm avâng chuan Levia chite chu lal Hezekia chuan a fak a. An thlahtute Pathian, LALPA chu an fak a, remna thilhlante hlânin ni sarih kût ruai an ṭheh a.

²³Tin, mipui chuan ni sarih dang kût nawn an rawt a; tichuan, hlim takin ni sarih an kût leh ta a.

²⁴Lal Hezekia chuan bâwngpa sângkhat leh berâm sângsarih, mipui thilhlana ruai ṭheh nân a thawh a, an hotute chuan bâwngpa sângkhat leh berâm sîngkhat an thawh bawk a. Puithiam tam tak an lo inthian thianghlim tawh a.

²⁵Judai rama mi lo pung khâwm te, Levia chi te, puithiam te, Israel ram aṭanga lo kal te, Judai ram leh Israel rama hnam dang chêng lo kal vete nên an vaiin an hlim êm êm a.

²⁶Jerusalem khuaah chuan mi tin an lâwm a, Davida fapa Solomona thih hnuah chutiang khawpa hlimna a la awm lo.

²⁷Levia chite leh puithiamte chuan mipui tân malsâwmna an sawi a, LALPA chuan a lo ngaithla a, an ṭawngṭaina chuan Hmun Thianghlim vân a thleng a ni.