Read Mizo Lushai BU HNIHNA CHRONICLES 31 Bible Online

BU HNIHNA CHRONICLES 31 - Mizo Lushai bible

BU HNIHNA CHRONICLES 31

¹Kût an ṭiak chuan Israel mi zawng zawng chu Judai ram khaw tinah an kal darh a, an lungphun te, an pathiannu Aseri lim an phun te chu an nam tlu a, maichâmte leh hmunsâng, hnam dang pathian an biakna hmunte chu an tichim a. Judai ram bâkah Benjamin te, Efraim te leh Manase biala mi te pawh an tichhia a, mahni in lamah an haw leh ta hlawm a.

²Lal Hezekia chuan puithiam te leh Levia chi te chu hna an insem thliah ṭhîn ang khân an thawh dân tûr a remfelsak leh a. An hna tûr chu hâlral thilhlan hlan te, remna thilhlan hlan te, Tempula Pathian biak hruai te, Tempul kawngkhâr bula LALPA fak hla saa lâwmthu sawi te a ni.

³Hezekia chuan ama bâwng leh berâm rual aṭangin tûk tin zan tin hâlral thilhlan tûr te, sabat ni te, thla thar ni te leh kût huna hâlral thilhlan LALPA dân bu-a hlan tûr tih te chu a tum vek a.

⁴ LALPA Dânin a phût ang chuan, an hun zawng zawng an hman theih nân, puithiamte leh Levia chite chanvo thilhlan chu pe ṭhîn tûrin Jerusalem mite chu Hezekia chuan a hrilh a.

⁵Chutianga thu a pêk veleh Israel mite chuan an thilpêk chhangphut ṭha chi te, uain te, oliv hriak te, khawizu te leh an thil thar te leh an neih apiang an sâwma pakhat nên an rawn la a.

⁶Judai ram khawpuia awm zawng zawng chuan an ran sâwma pakhat te, an Pathian, LALPA hnênah thil tam tak an pêkte chu an rawn keng a.

⁷A thla thumna aṭangin an rawn pe ṭan a, thla sarihna thlengin an rawn pêk chu a vûm thûr mai a ni.

⁸Lal Hezekia leh hruaituten thilpêk tling khâwm tamzia an hmuh chuan LALPA an chawimawi a. Israel mipuite pawh an fak a.

⁹Lal chuan puithiamte leh Levia chite hnênah thilpêk tling khâwm chu an khawpkham leh kham loh a zâwt a.

¹⁰Zadoka thlaha puithiam lalber Azaria chuan, “Miten an thilpêkte Tempula an rawn ken tâk hnu hi chuan ei tûr kan nei ta a, ei sên loh tam tak a bâng bawk a ni. LALPA chuan a mite mal a sâwm a, hetiang hi kan nei thei ta a ni,” a ti a.

¹¹Lal thupêk angin Tempul ram chhûngah chuan kudâm an sa a.

¹²An thilpêk leh sâwma pakhat chu a bothlau loh nân an dah ṭha a. A enkawl tûrin Levia chi Konania an ruat a, a nau Simeian a ṭanpui a.

¹³An kaihhruaia thawk tûrin Levia chi Jehiela te, Azazia te, Nahata te, Asahela te, Jerimota te, Jozabada te, Eliela te, Ismakia te, Mahata te, Benaia te chu lal Hezekia leh puithiam lalber Azaria chuan an ruat a.

¹⁴Imna fapa Korea, Tempul khawchhak lam kawngka vêngtu hotu chu LALPA hnênah anmahni duh thua thilhlan leh thil serh hran bîkte dawnga sem ṭhîn tûrin an ruat a.

¹⁵Khaw dang, puithiam awmnaah chuan hêng Levia chi Edena te, Miniamina te, Jesua te, Semaia te, Amaria te, Sekania te chuan ei tûr chu ṭha takin an sempui a, an Levia chipuite pawh, a pawimawh leh pawimawh lo deuh sawi lovin an sem thliah thliah ṭhîn.

¹⁶Mipa, kum sawmthum chung lam, Tempula rawngbâwl theite chuan an dinhmun azirin an dawng a.

¹⁷Puithiamho chu a chi chia inchhâwk tûr hna an sem a; Levia chi kum sawmhnih chung lamte erawh chu a pâwl pâwlin hna thawk tûrin an ruat ṭhîn a ni.

¹⁸An hming chu an nupui te, an fate leh an awmpui nghette nên an ziak vek a, eng lai pawha an hna thawk tûrin koh mai theih an ni.

¹⁹Arona thlahte awmna tûr, thingtlâng khua leh a chhehvêl ran tlatna ram ruata awm puithiamte hnêna ei leh bar tûr semtu tûr an ruat bawk a, Levia chi chhiarnaa hming chuangte pawh an pe ṭhîn.

²⁰Judai ram pumah lal Hezekia chuan a Pathian, LALPA hmuha ṭha leh dik chu rinawm takin a ti ṭhîn.

²¹Tihtakzetin a Pathian rawng a bâwl a, Tempul a ngaihsaka, dânte a zawm êm avângin, kawng engkimah a hmuingîl a ni.