Read Mizo Lushai BU HNIHNA CHRONICLES 32 Bible Online

BU HNIHNA CHRONICLES 32 - Mizo Lushai bible

BU HNIHNA CHRONICLES 32

¹Hezekia chuan LALPA rawng ṭha takin a bâwl tâk hnu chuan Asuria lal Senakeriba chuan Judai ram a rawn rûn a. Kulh nei khuate chu a sipaite chuan an hual a, kulh bangte chu a tihchhiattîr a.

²Hezekia chuan Jerusalem pawh rawn beih zêl a tum tih a hriat chuan,

³a hote nên an inrâwn tlâng a, Asuria-hovin Jerusalem an rawn hnaih hnua tui in tûr an neih loh nân khaw pâwn hnaia tuikhur zawng zawng chu hnawh zai an rêl a.

⁴Hotute chuan mi tam tak an hruai a, tuikhur zawng zawng chu luang chhuak tûr awm lovin an hnawh ta vek a.

⁵Lal chuan khaw kulh bang derdêp laite chu a thuam ṭha a, in sângte a sak belh a, Jerusalem khaw hlui Milo an tih, lei an chhûn khahna lai kulh bangte pawh chu a siam ṭha a. Fei leh phaw tam tak a siamtîr bawk a.

⁶Khaw mite chu sipai hotuten an ho va, khawpui luhna kawngkhâr tualzâwl zau laiah chuan mite chu an rawn hruai khâwm a, a lo fuih a.

⁷An hnênah chuan, “Huai takin awm ula, ṭan la sauh sauh rawh u: Asuria leh a sipai zozaite hi hlau suh ula, zâm hek suh u, an aia ropui kan zîngah a awm a ni;

⁸ani zawng mihring chaknaah a innghat a, keini zawng LALPA, kan Pathianin min pui dâwn a, râl chu min dosak dâwn a ni,” a ti a. Mipui chu Juda lal Hezekia thu avâng chuan an thlamuang ta hle a.

⁹Senakeriba leh a sipaite Lakis khuaa an awm hnu chuan Hezekia leh Judai ram mi, Jerusalem-a awm zawng zawngte hnênah chuan palai a rawn tîr a,

¹⁰“Asuria lal Senakeriba chuan heti hian a ti: ‘Eng nge maw in beiseia, Jerusalem hual in tuar dâwn le? LALPA, kan Pathian chuan Asuria lal kut ata min chhan dâwn’ tiin.

¹¹Hezekia hian tuihâl leh rilṭâma thi tûrin a bum che u elo maw?

¹²In Pathian biakna hmunsângte leh maichâmte ṭhiatin Jerusalem leh Judai ram mite chu, ‘maichâm pakhatah Pathian chu chibai in bûk ang a, chutah chuan thil in hlân tûr a ni,’ titu kha he Hezekia hi a ni lâwm ni?

¹³Kei leh ka pate chuan ram tina hnam tinrêng kan sawisak ṭhin dân kha in hria em? Chûngho pathiante chuan an mite chu kan kut aṭangin an chhan thei ngai em ni?

¹⁴Ka pa chuan chûngho pathiante chu a titlâwm vek a, Pathian pawh hian a kut ata a chhan che uin in ring elo?

¹⁵Chuvângin, Hezekia hian bum che u suh se, bual â che u hek suh sela, a thu ring suh u. Asuria lal laka a betute chhan theitu hnam pathian pakhat mah an awm lo. In Pathian pawh hian a va chhan rua lo che u êm!” a ti a.

¹⁶Asuria sipai hotu chuan LALPA, Pathian leh a chhiahhlawh Hezekia chu a sâwt lehzual a.

¹⁷Asuria lal chuan a lehkhaah chuan Israel-te Pathian, LALPA chu thamlo takin, “Hnam dang pathiante pawh ka kut ata an mite chhan thei rêng an awm lo, Hezekia Pathian pawhin a mite chu ka lakah a chhan thei bîk dâwn em ni?” tiin a ziak bawk a.

¹⁸Khaw lâk a awlsam zâwk beiseiin Jerusalem kulh bula awmte tihzâm a tum a, Hebrai ṭawngin thu a sawi a ni.

¹⁹Jerusalem Pathian chu hnam dang pathian, mihring siam ang lekin a sawi a ni.

²⁰Lal Hezekia leh Amoza fapa zâwlnei Isaia chu an ṭawngṭai a, Pathian an au va.

²¹LALPA chuan Vântirhkoh a rawn tîr a, Asuria sipaite leh an hotute chu an riahhmunah chuan a rawn tihlum a. Asuria lal chu mualpho takin an khaw lamah a haw ta a. Ni khat chu an pathian biak ina a awm laiin a fate zînga mi ngeiin khandaihin an sât hlum a.

²²Lal Hezekia leh Jerusalem mite chu chutiang chuan Asuria lal Senakeriba leh an hmêlmate kut ata LALPA chuan a chhan chhuak a. An chhehvêl ramte nên inrem ṭha takin a awmtîr a.

²³LALPA hnêna thilhlan hlân tûrin Jerusalem-ah mi tam tak an lo kal a. Hezekia hnênah pawh thilpêk an rawn pe zut zut a, hnam tinin Hezekia chu an ngaisâng hle a ni.

²⁴Hetih hun lai vêl hian Hezekia chu thih ngamin a na a. A ṭawngṭai a, a dam leh tûr thu chhinchhiahna LALPA chuan a siamsak a.

²⁵LALPA thiltihsak avâng chuan lâwm nachâng a hre lo va, a chapo avâng chuan Judai ram leh Jerusalem chuan an tuar ta a.

²⁶A tâwpah erawh zawng Hezekia leh Jerusalem mite chu an inchhîr a, an inngaitlâwm a, Hezekia dam chhûng chuan LALPA thinurna chu an chungah a thleng ta lo.

²⁷Lal Hezekia chu a hausa ta hle a, tu pawhin an ngaisâng a, a rangkachak te, tangkarua te, lungmantam te, thil rimtui te, phaw te leh thil dang hlu tak tak te dahna tûr in te a sa a.

²⁸A buh te, uain te, oliv hriak te dahna tûr chhêk in a saktîr a; bâwng in te, berâm huangte a siam bawk a.

²⁹Hêng bâkah hian Pathianin berâm te, sum leh pai chi tinrêng a pe a, khua te a siam thluah a.

³⁰Hezekia hian Gihon tuiluanna chhakta zâwk chu a tiping a, tui kawng a siam a, Jerusalem khaw chhûng thlang lam pangah a luan luhtîr a ni. Hezekia chu a thil tih engkimah a hmuingîl zêl a.

³¹A chunga thil mak thleng zâwt fiah tûrin Babulon lalin palai a rawn tirh lai kha chuan mi eng ang nge a nih fiah nân Pathianin a thlahfâl a nih kha.

³²Lal Hezekia thil tih dang te, a thil tih ṭhat te chu, Amoza fapa zâwlnei Isaia lehkhabu-ah leh Israel leh Judai lalte chanchin ziakna bu-ah a chuang.

³³Hezekia chu a thi a, lal thlânmual chuanchungah an phûm a. A thih chuan Judai ram leh Jerusalem-in an chawimawi nasa hle a. A fapa Manasea chu a lo lal ta a.