Read Mizo Lushai BU HNIHNA CHRONICLES 33 Bible Online

BU HNIHNA CHRONICLES 33 - Mizo Lushai bible

BU HNIHNA CHRONICLES 33

¹Kum sâwm leh pahnih a nihin Manasea chu Judai ramah a lal ṭan a, Jerusalem-ah kum sawmnga leh panga a lal a.

²Israela thlahte hmaa LALPAN a hnawh chhuah hnamte thil tenawm tak an tih ang chu a ti ve ṭhîn a.

³A pain a tihchhiat, hnam dang pathian biakna hmunsângte kha a siam ṭha leh a. Baal hnêna inthawina hlanna tûr maichâmte a siam a, pathiannu Aseri lim te a siam a, arsi te chibai a bûk a.

⁴Kumkhuaa LALPA biakna tûr Tempul a ruatah chuan hnam dang pathian maichâm a siam a.

⁵Tempul pindan pahnihah chuan arsi biakna tûr maichâm te a siam a.

⁶Hinom ruamah hâlral thilhlanah a fapa te a hlân a; aien te, kutze en te, arsi biak te a chîng a, mitthi thlûk thiam te, aisân chîng te a râwn ṭhîn a. LALPA ṭha tih loh zâwng a ti a, a tithinur ta a ni.

⁷A milem chhûn chu tempulah a dah a, Pathianin Davida leh Solomona hnênah, “Israel hnam zawng zawng ram zîngah Jerusalem leh he in hi ka hming lamna hmun tûra ka thlan a ni.

⁸Kumkhuaa ka thupêk zawng zawng an zawma, ka thuruatte leh ka dânte, ka chhiahhlawh Mosian a hrilhte kha an zawm chuan Israel-ho hi engtikah mah an pate hnêna ka pêk tawh ram aṭang hian ka hnawt chhuak lo vang,” a ti si a.

⁹Manasea chuan Judai ram leh Jerusalem mite chu thil dik lo a tihtîr a, Israel-te hmaa a hnawh chhuah hnamte tih ṭhin aia sual nasa zâwk an ti ta a ni.

¹⁰ LALPA chuan Manasea leh a mite hnênah chuan thu a sawi ṭhîn a, an ngaithla duh si lo va. Chuvâng chuan Asuria sipai hotute chu LALPA chuan Judai ram chu a rûntîr a.

¹¹Manasea chu an man a, khaidiatin an hlîng a, a hnârah thîr kawm an vuah a, Babulon-ah an hruai ta a.

¹²A mangan êm avâng chuan LALPA a Pathian hmaah chuan nasa takin a intitlâwm a, ṭanpui a dîl ta a.

¹³Manasea ṭawngṭai chu a lo ngaihthlâksak ta a, a dîlna chu chhângin Jerusalem-ah a hâwntîr leh ta a. Manasea chuan LALPA chu Pathian a lo ni ngei tih a hre chiang ta a.

¹⁴Chumi hnu chuan Davida khawpui, khawchhak lam panga kulh bang pâwn zâwk chu Manasea chuan a zawm sâng a, Gihon tui awmna ruam hmâr lam Sangha Kawngkhâr bul ‘Ofel’ an tih hmun thlengin a siam a. Judai rama kulh nei khaw tinah sipai pâwl khat, hotu pakhat nên a dah vek a.

¹⁵Hnam dang pathian lem leh milim chhûn amahin Tempula a dahte chu a paih bo va. Tempul mual leh Jerusalem khuaa hnam dang pathian biakna maichâm awmte pawh chu a la a, khawpui ata a paih chhuak a.

¹⁶LALPA biakna maichâm chu a siam ṭha a, remna thilhlan te, lâwmthu sawina thilhlan te a hlân a, Judai ram mi zawng zawng chu Israel-te Pathian, LALPA a biaktîr a.

¹⁷Mipuite chu an inthawina hmun pangngaiah la inthawi reng mah se, LALPA hnênah chauh an inthawi ta a ni.

¹⁸Manasea thil tih dang zawng zawng, Pathian hnêna a ṭawngṭaina te, Israel-te Pathian, LALPA hminga zâwlneiten a hnêna thu an sawi te chu Israel lalte chanchin ziakna bu-ah a chuang.

¹⁹Lal Manasea ṭawngṭaina leh Pathian chhânna te, a sim hmaa thil sual a tih chanchin te, hnam dang pathian biakna hmunsâng te siama, Aseri lim siama, a milem chhûn a biak thu te, zâwlneiho chanchin ziakna bu-ah a chuang vek bawk a ni.

²⁰Manasea chu a thi a, lal inah an phûm a, a fapa Amona chu a lo lal ta a.

²¹Amona chu kum sawmhnih leh pahnih a nihin Judai ramah a lal ṭan a, Jerusalem-ah kum hnih a lal a.

²²A pa Manasea ang bawkin LALPA chungah thil sual a ti a, a pa milem chhûnte chu chibai a bûk ta mai a.

²³A pa ang khân a inngaitlâwm ve duh lo va, LALPA lam a hawi duh hek lo, a pa ai mah khân a sual a ni.

²⁴A hoten an phiar a, a inah an that a,

²⁵Judai ram mite chuan Amona thattute chu an that ve a, a fapa Josia chu lalah an siam a.