Read Mizo Lushai BU HNIHNA CHRONICLES 34 Bible Online

BU HNIHNA CHRONICLES 34 - Mizo Lushai bible

BU HNIHNA CHRONICLES 34

¹Kum riat a nihin Josia chu Judai ramah a lal ṭan a, kum sawmthum leh pakhat Jerusalem-ah a lal a.

²LALPA lawmzâwng a ti ṭhîn a, a thlahtu Davida awm dân angin a awm a. Pathian dânte chu uluk takin a zâwm a.

³Josia chuan kum riat a lal kumin, la naupang hle mah se, a thlahtu Davida Pathian chu a be ve ṭan ta a; kum li hnuah phei chuan hnam dang pathian biakna hmunsâng te, Aseri lim te leh milim dang te chu a tichhe vek a.

⁴A thuin a hote chuan Baal biakna maichâmte chu an chhu chhia a, a bula rimtui hâlna maichâmte pawh an tichhia a; Aseri limte leh milim dangte chu an chhu dip vek a, chûng betute thlânah chuan an phul a.

⁵Hnam dang puithiamho ruhte chu an pathian biakna maichâmah chuan an hâl a. Tichuan, Judai ram leh Jerusalem-ah khua chu an thian thianghlim ta a.

⁶Chutiang bawkin Manase leh Efraim te, Simeon leh hmâr lama Naftali ram thlengin an khawpuia mi leh an khaw ram tawh hnua mite chu a thian fai a.

⁷Hmâr lam bial Israel chhûnga maichâmte leh Aseri limte a tichhia a, milimte chu a chhu dip a, rimtui an hâlna maichâmte pawh chu a tichhe vek a, Jerusalem-ah a haw leh ta a.

⁸Hnam dang pathian biak a tihtâwpa, ram leh Tempul a tihthianghlim hnu kum sâwm leh pariat a lal kum chuan Josia chuan Tempul chhûng siam ṭha tûrin mi pathum, Azalia fapa Safana te, Jerusalem khaw awptu Maaseia te, Joahaza fapa hotu lal tak Joa te a tîr a.

⁹Levia chi, kawngka vêngtuten Tempul sum tûr an khawn ṭhin kha puithiam lalber Hilkia hnênah an hlân zêl a. Efraim mi te, Manase mi te leh Israel hmâr lam ram mite hnên aṭang leh Judai ram te, Benjamin ram te leh Jerusalem mite hnên aṭangin an khawn ṭhîn a ni.

¹⁰He tangka hi, he mite pathum kutah hian an pe a, anni chuan

¹¹mistirite leh in sa mite kutah lung leh thing lei nân te, thil lo tlabal tawh, Juda lalten an lo ngaihsak loh, bangrel te, khanchhuk te siam ṭhat nân an pe a.

¹²Hnathawktute chuan uluk takin hna an thawk a, Levia chi, mi pali Meraria thlah Jahata leh Obadia te, Kohata thlah Zekaria leh Mesulama te chuan an ho va. Hêng Levia chite hi thil tum thiam tak vek an ni.

¹³Levia chia mi ṭhenkhat chuan thil thiartute an vêng a, hna hrang hrang thawktu an ho va. Ṭhenkhatin senso lam an lo chhinchhiah fel a, ṭhenkhatin vên hna an thawk a.

¹⁴Sum dahkhâwmna ata tangka an lâk chhuah chuan LALPA dân bu, Mosia hnêna Pathian pêk kha, Hilkia chuan a chhar a.

¹⁵Safana hnênah, “Hei Tempul chhûngah, Dân bu ka chhar e,” a ti a, a pe a.

¹⁶Safana chuan lal hnênah a kalpui a, “I sawi ang zawng zawng chu kan ti zo ta.

¹⁷Tempula kawl ṭhat tangka chu kan la a, hnathawktute leh a enkawltute hlawhah kan pe tawh a.

¹⁸Hei Hilkia mi pêk, lehkhabu ka rawn keng e,” a ti a. Lal hriat tûr chuan a chhiar ta a.

¹⁹Lalin Dân thu an chhiar a han ngaihthlâk chuan a puan a pawtthlêr a,

²⁰Hilkia te, Safana fapa Ahikama te, Mika fapa Abdona te, lehkha ziaktu Safana te, lal enkawltu Asaia te chu a ko va.

²¹“He Dân bu chungchâng thu-ah hian ka tân te, Israel leh Judai rama la dam chhun tân te LALPA chu min va râwnsak teh u, min thlahtute chuan LALPA thu an zâwm duh lo va, he lehkhabua tih tûr sawite chu an tih duh loh avângin kan chungah LALPA a thinur a ni,” tiin a tîr a.

²²Hilkia leh lal mi tirh dangte chu Tokhata fapa Saluma nupui zâwlnei Huldaii hnênah chuan an kal a, Tokhata hi Hasra fapa a ni, Saluma hi Tempula puithiam thawmhnaw enkawltu Jerusalem vêng thara awm a ni a, thil awm dân chu Huldaii an hrilh a.

²³Ani chuan an hnênah, “LALPA Israel-te Pathian chuan heti hian a ti. Ka hnêna nangmahni rawn tîrtu chu hrilh rawh u.

²⁴LALPA chuan, ‘Lal hriata an chhiar chhuah lehkhabu ziala ânchhia zawng zawng kha Jerusalem leh a chhûnga chêngte chungah ka tlâktîr dâwn.

²⁵Min hnâwl a, pathian dang hnênah thilhlante an hlân a, an thiltih chuan min tithinur ta a ni. Jerusalem chungah ka thin a ur êm êm a, a dai mai lo vang.

²⁶Lal chungchâng erawh chu, kei, LALPA, Israel-te Pathian hian heti hian ka ti a ni: Lehkhabu thu ziak chu i ngaithla a,

²⁷i sim a, i inphahhniam ta a. Jerusalem leh a chhûnga mi ka hrem dâwn ka tih khân pawi tiin i puan i pawtthlêr a, i ṭap a.

²⁸Jerusalem chu i thih hnuah chauh a ni ka hrem dâwn ni, thlamuang takin ka thihtîr ang che a, he hmun leh a chhûnga awmte chunga ka rawn thlentîr tûr thil ṭha lo zawng zawngte chu i hmu lo vang,’ a ti,” a lo ti a. Chu thu keng chuan mite chu lal hnênah an lo kîr leh a.

²⁹Lal Josia chuan Judai ram leh Jerusalem-a upate chu a ko khâwm a.

³⁰Puithiamte leh Levia chite nên Tempulah an kal a, mi rethei leh mi hausate pawhin an zui a. Lal chuan Tempul chhûnga Thuthlung bu an chhar chu mipui hmaah chuan a chhiar chhuak a.

³¹Lal dinna tûra ruat ban bulah chuan a ding a, LALPA hnênah thu a thlung a, a thu awiha, rilru taka tihtakzetin a dânte leh a thupêkte chu zawm a tiam a, lehkhabua thu chuang zawng zawng pawisak vek a tiam a ni.

³²Benjamin-ho leh Jerusalem-a awm tawh phawt chu thuthlung zâwm tûrin thu a tiamtîr a. An pute Pathian nêna thuthlung lo siam tawha tih tûr awmte chu Jerusalem mite chuan an ti a.

³³Lal Josia chuan Israel mite ram chhûnga milem tenawm tak tak chu a tichhe vek a, a dam chhûng chuan mite chu an thlahtute Pathian, LALPA rawng a bâwltîr a. LALPA, an pi leh pute Pathian an zui chu a pênsan lo.