Read Mizo Lushai BU HNIHNA CHRONICLES 35 Bible Online

BU HNIHNA CHRONICLES 35 - Mizo Lushai bible

BU HNIHNA CHRONICLES 35

¹Lal Josia chuan LALPA hmingin Jerusalem-ah Kalhlên kût a hmang a. Thla khatna, ni sâwm leh pali ni chuan kûtna tûr ran a talh a.

²Puithiamho chu Tempula an thawh tûr hna a sem a, ṭha taka thawk tûrin a fuih a,

³LALPA tâna serh hran, Dân zirtîrtu Levia chite pawh hetiang hian a hrilh a: “Davida fapa Solomona in sak chhûngah Thuthlung Bâwm hi dah rawh u, zâwn sawn chhên a ngai tawh lo. In Pathian, LALPA leh a mi Israel-te rawng in bâwl tûr a ni.

⁴A chi chi-in Tempula in awmna tûrah awm ula, in tih tûr lal Davida leh a fapa Solomonan an ruat ang kha ti ang che u.

⁵Hna in insem hunah Israel chhûngkawho ṭanpuitu tûr Levia mite ruat ṭhîn ang che u.

⁶Kalhlên Kût sa tûr berâm leh kêl in talh tûr a ni. Tûnah inthian thianghlim rawh u, an thilhlan tûrte hlanpui ula, Mosia hnêna LALPA thupêk ang kha in unau Israel-te chuan an zawm theih nân,” a ti a.

⁷Kalhlên Kûta mipui hman atân Josia chuan ama ran rual zînga mi ngei berâm te, berâmno te leh keltê sîngthum, bâwngpa sângthum a thawh a.

⁸A miliante pawh chuan mipui te, puithiam te leh Levia chi te ei tûr an thawh bawk a. Tempul hotu puithiam lalber Hilkia te, Zekaria te leh Jehiela te chuan berâmno leh keltê sanghnih leh zaruk leh bâwngpa zathum, kût chhûnga thilhlana an hlan tûrin puithiamte chu an pe a.

⁹Levia chi hotu Konania te, Semaia te leh a unau Nethanela te, Hasabia te, Jeiela te, Jozabada te chuan berâmno leh keltê sângnga leh bâwngpa zanga, Levia chiten thilhlana an hman tûr an thawh bawk a.

¹⁰Kalhlên Kût hmanna tûr engkim an tihfel hnu chuan lal thu angin puithiamte leh Levia chite chu an hmun ṭheuh tûrah an awm a.

¹¹Kêl leh berâm an talh zawh chuan Levia chite chuan a vun an lip a, puithiamten a thisen chu maichâmah an theh a.

¹²Hâlral thilhlana hman tûr chu chhûng tin tân Mosia Dân bu-a ziak anga an hlan tûrin an sem a.

¹³Levia chite chuan Dân angin Kalhlên kût sa chu an hem hmin a, sa thianghlim ṭhenkhat chu bêlah te, thîrbêlah te, bêlpuiah te an chhûm a, a sa chu mipui an sem a.

¹⁴Chumi hnu chuan anmahni leh Arona thlah puithiamte ei tûr sa an siam leh a, puithiamho khân hâlral thilhlan leh an thilhlan thau hâlna mei chu an vil zânkhua si a.

¹⁵Lal Davida thupêk angin Asafa te, Hemana te leh lal zâwlnei Jeduthuna te chuan thil tum mi Asafa thlahte chu an awmna hmun tûrah an awmtîr a. Tempul vêngtute tân pawh kal sawn a ngai lo, an ṭhian Levia chi, mi dangte khân Kalhlên Kût sa chu an lo buatsaihsak a ni.

¹⁶Lal Josia thu ang chuan LALPA chu an bia a, tih tûr zawng zawng, Kalhlên Kût hman te, maichâma hâlral thilhlan hlan te chu an ti a.

¹⁷Ni ruk chhûng, Kalhlên Kût leh chhang dawidim telh loh kût chu Israel mi zawng zawngin an hmang a.

¹⁸Zâwlnei Samuela thih hnu kha chuan heti taka ropui hian Kalhlên Kût an hmang ngai lo. Lal Josia te, puithiam te, Levia chi te, Juda leh Israel rama awmte leh Jerusalem-a awmten Kalhlên Kût an hman ang hian an la hmang ngai lo.

¹⁹Lal Josia kum sâwm leh pariat a lal kum khân an hmang a ni.

²⁰Lal Josian heti taka Tempul a chei hnu hian Aigupta lal Nekoa chuan Eufretis lui kamah, Karkhemis-ah, indo tûrin a sipaite a hruai a. Josia chuan lo dan a tum a.

²¹Nekoa chuan, “Nang Juda lal, he thilah hian i lo inrawlhna tûr a awm lo. Nang bei tûr chein ka lo kal lo, ka hmêlma bei tûra lo kal ka ni. Pathian chuan hmanhmawh tûrin min ti a ni, ka lamṭang a ni a, mi lo dan tum teh suh, a tichhe palh ang che,” tiin palai a rawn tîr a.

²²Josia chuan lo beih chu a tum ta tlat a, Nekoa hmanga Pathian thu sawi chu a awih duh lo va, a inchei danglam a, Megido phaia an inbeihnaah chuan a kal ve ta a.

²³An inbeih lai chuan Aigupta sipai thal chuan Josia chu a fuh ta a. A tawlailîr khalhtu hnênah, “Min hliam na hle mai, indona hmun ata hi min chhuahpui rawh,” a ti a.

²⁴Ama tawlailîr ata chu an zâwn chhuak a, tawlailîr dang a hruaiah chuan an dah a; Jerusalem-ah an hâwn ta a. A thi a, lal thlânah an phûm a, Judai ram leh Jerusalem mite chuan an ui a, an sûn a.

²⁵Zâwlnei Jeremia chuan Josia sûnna hla a phuah a, Israel zîngah chuan hla sa mi, mipa leh hmeichhiaten lal sûn hlaah an sa ṭhîn. Sûnna hla ziak khâwmna bu-ah chu hla chu a chuang.

²⁶Josia thil tih zawng zawng, LALPA a ngainatzia te, Dân thu a awihzia te,

²⁷a bul aṭanga a tâwp thleng chanchin chu Israel leh Juda lalte chanchin ziakna bu-ah a chuang vek a ni.