Read Mizo Lushai BU HNIHNA CHRONICLES 36 Bible Online

BU HNIHNA CHRONICLES 36 - Mizo Lushai bible

BU HNIHNA CHRONICLES 36

¹Judai ram mite chuan Josia fapa Jehoahaza chu lalah an thlang a, Jerusalem-ah hriak an thih a.

²Jehoahaza chu kum sawmhnih leh pathum a nihin Judai ramah a lal ṭan a, thla thum a lal hman a.

³Aigupta lal Nekoa chuan salah a man a, Judai ram chu, chhiah, tangkarua kg. sângthum leh zali leh rangkachak kg. sawmthum leh pali a chawitîr a.

⁴Nekoa chuan Jehoahaza u Eliakima chu Judai ram lalah a dah a, a hmingah Jehoiakima a sak tharsak a, Jehoahaza chu Aigupta ramah a hruai a.

⁵Jehoiakima chu kum sawmhnih leh panga a nihin Judai ramah a lal ṭan a. Jerusalem-ah kum sâwm leh pakhat a lal a. LALPA, a Pathian mit hmuhah thil sual a ti ṭhîn.

⁶Babulon lal Nebukadnezara chuan Judai ram a rûn a, Jehoiakima chu a man a, khaidiata phuar chungin Babulon-ah a hâwn a.

⁷Nebukadnezara chuan Tempula thil hlu ṭhenkhat chu a hâwn bawk a, Babulon khuaa a inah a dah a.

⁸Jehoiakima thil tih zawng zawng, thil tenawm tak tak a tih te leh thil sual a tihte chu Israel leh Juda lalte chanchin ziakna bu-ah a chuang vek a ni; a aiah a fapa Jehoiakina chu a lal ta a.

⁹Jehoiakina chu kum sâwm leh pariat a nihin Judai ramah a lal ṭan a, Jerusalem-ah thla thum leh ni sâwm a lal hman a. Ani pawh LALPA lakah thil sual a ti a.

¹⁰Nipui a thâwk dâwn lai vêl chuan lal Nebukadnezara a lo kal a, Babulon-ah salah a hruai a; Tempula thil hlu zawng zawng pawh a hâwn vek a. Nebukadnezara chuan Jehoiakina nau Zedekia chu Judai ram leh Jerusalem lalah a dah a.

¹¹Zedekia chu kum sâwm leh pariat a nihin Judai ramah a lal a. Jerusalem-ah kum sâwm leh pakhat chhûng a lal a.

¹²LALPA lakah thil sual a ti a; LALPA thu thlentu zâwlnei Jeremia thu lah ngaihthlâk thamah a ngai hek lo.

¹³Zedekia chu Nebukadnezara lakah a hel ta mai a. Pathian hminga thu a tiamtîr, lalah a dah a ni si a. Luhlul a chhuah a, a sim duh lo va, Israel-te Pathian, LALPA lam a hawi duh hek lo.

¹⁴Juda upa te, puithiam te leh mipui te lah chuan an vêla hnam sualho tih dân an la a, LALPA tihthianghlim tawh Tempul chu milem biain an tibawrhbâng a.

¹⁵LALPA an thlahtute Pathian chuan Tempul leh a mite chu chhan a duh avângin mipui zilh tûrin zâwlneite a tîr fo va ni.

¹⁶Mahse, Pathian tirhte chu an lo deusawh a, an thute lah engah mah an ngai hek lo. Zâwlneite chu an nuihzatbûr a, a tâwp a tâwpah chuan LALPA chu pumpelh rual lohvin a thinur ta a.

¹⁷Chuvângin, LALPA chuan anmahni sawisa tûrin Babulon lal chu a rawn tîr a, lal chuan Judai ram tlangvâlte chu Tempul chhûngah meuh pawh a that ta zêl a. Naupang te, tar te, a hmei a pa, hrisêl leh hrisêl lo pawh tu mah lainat a nei lo. Pathianin a kutah a pe vek a ni.

¹⁸Babulon lal chuan Tempul chu a rawk a, thil hlu dah khâwmte chu a la a, lal in leh milian ina thil awm zawng zawng chu Babulon-ah a hâwn vek a.

¹⁹Tempul leh khuaa inte chu a hâl a, khawpui kulh bangte chu a ṭhiat a.

²⁰Thi bâng zawng zawng chu Babulon-ah a hruai haw a, Persia-ho an lo len thleng khân amah leh a hote bawihah an awm a.

²¹Jeremia kâa LALPA thu sawi lâwk, ‘kum sawmsarih chhûng in ram chu a châwl dêr dâwn a ni,’ a tih kha a lo thleng ta a ni.

²²Persia rama lal Kura a lal ṭan tirh kumin, LALPA chuan Jeremia kâa a thu sawi kha a rawn tipuitling ta a. Lal Kura chu a thunun a, hetiang hian thu a pêktîr a, a ram chhûng hmun tina chhiar theih tûrin ziakin thu chu a thawn chhuak a:

²³“Hei hi Persia lal Kura thupêk a ni. LALPA, vân Pathian chuan khawvêl puma rorêltuah mi siam a. Judai ram Jerusalem-ah a tân Tempul sa tûrin min ti bawk a ni. Chuvângin, Pathian mite u, in za-in tah chuan kal rawh u, in Pathian, LALPA chuan awmpui che u rawh se,” tiin.