Read Mizo Lushai BU HNIHNA CHRONICLES 4 Bible Online

BU HNIHNA CHRONICLES 4 - Mizo Lushai bible

BU HNIHNA CHRONICLES 4

¹Solomona chuan dâr maichâm tawng sawmhnih bial, tawng sâwma sâng a siam a.

²Tuizêm, teh kuala tawng sawmthum, tawng sâwm hawlh tlang, tawng ngaa sâng, dârin a siam a.

³Tuizêm bang pâwn lam chu tlar hnihin an cheimawi a, an cheina chu bâwngchal lem a ni a, zêm chhûn ruala chhûn tel nghâl a ni.

⁴Tuizêm chu bâwngchal lem sâwm leh pahnih chungah a innghat a, pathumin chhim lam an hawi a, chutiang pathum zêl chuan hmâr lam te, chhak lam te, thlang lam te an hawi a, an hnung lam chu a insi a.

⁵Tuizêm bang chu kutphah bawka chhah a ni, a tlâng chu no tlâng arh, lilipâr ang hian a arh a.

⁶Dâr chawhtawlh sâwm a siam bawk a, panga chu Tempul hmâr lama dah tûr a ni, panga dang chu chhim lamah; an kût nia thilhlan sil faina tûr tui dah nân a ni; dâr tuizêma tui chu puithiamho insilna tûr a ni.

⁷A siam dân pangngaia siam khâwnvâr dahna sâwm rangkachakin a siam a;

⁸a hûnna tûr dawhkân sâwm a siam bawk a. Pindan laitaah khân a dah a, a sîr tuakah panga ve vein a hûng a, rangkachak chawhtawlh za a siam bawk.

⁹Puithiamho awmna tûr pindan te leh tualzâwl te a siam a. Pindan kawngkhârte a siam a, dârin a tuam a.

¹⁰Tuizêm chu Tempul chhimchhak kilah an hûng a.

¹¹Hurama chuan bêl te, vutlawh te, chawhtawlh te a siam a. Pathian Tempula hman tûr ṭûl zawng zawng chu Solomona a siamsak ta a. Hêng hi a thil siamte chu a ni:

¹²Dâr ban pahnih, ban lu bâwk nei, no bial anga kûm, khaidiat lem a kuala tlar hniha awm;

¹³ban lu bâwkah chuan theibuhfai lem zali, khaidiat kual chhûng zêlah tlar hnih a awm;

¹⁴chawhtawlh sâwm leh a nawrsawnna tawlailîr sâwm;

¹⁵tuizêm lian, a hûnna bâwngchal lem sâwm leh pahnih nên;

¹⁶bêl te, vutlawh te, dâr thîrkut te a siam a ni. Chûng thil chu Huraman dârin LALPA ina hman atân Solomona chu a siamsak a.

¹⁷Sukot leh Zereda inkâr, Jordan lui phaizâwl bellei khurah chûng chu lal chuan themthiamho chu a chhûntîr a ni.

¹⁸Hêng bungbêl hi a tam êm a, a bûk zât hriat sên a ni lo va;

¹⁹Solomona chuan Pathian Tempul chhûnga thil awm zawng zawng chu a siam a, rangkachak maichâm, chhang serh dahna tûr te,

²⁰Hmun Thianghlima chhit reng tûrin khâwnvâr leh a dahnate rangkachak hlîr hlakin a siam a;

²¹pangpâr lem te, chaicheh te,

²²khâwnvâr huh hlumna te, rimtui hâlna berhbu te, meilawh te, rangkachak vekin a siam a. Tempul luhna kawngkhâr leh Hmun Thianghlim Ber luhna kawngkhâr pawh chu rangkachakin a siam a.