Read Mizo Lushai BU HNIHNA CHRONICLES 5 Bible Online

BU HNIHNA CHRONICLES 5 - Mizo Lushai bible

BU HNIHNA CHRONICLES 5

¹ LALPA Tempul hna zawng zawng chu Solomona chuan a thawk zo ta a. A pa Davidan thil a lo serh hran tawh, tangkarua te, rangkachak te leh bungbêl te chu Solomona chuan Tempul sum dahnaah chuan a dah ta a.

²Solomona chuan Israel upa te, hnam hruaitu te, chhûng tin puipa te chu Davida khawpui Zion aṭanga LALPA Thuthlung Bâwm laa, Tempul chhûnga dah tûrin a ko khâwm a.

³Thla sarihna, Bâwkte kûtah chuan, Israel mi zawng zawng chu an lo kal khâwm a.

⁴Israel upate an lo thlen chuan Levia chite chuan Thuthlung Bâwm chu an zâwn a,

⁵Tempul an zâwn thleng a, Puithiamte leh Levia chite chuan Biakbûk leh a hmanrua zawng zawng chu tempul-ah an la lût a.

⁶Israel mi zawng zawng chu lal Solomona hovin Thuthlung Bâwm hmaah chuan an lo kal khâwm a, berâm leh bâwng chhiar sên loh thilhlanah an talh a.

⁷Puithiamho chuan Thuthlung Bâwm chu Tempul chhûngah an zâwn lût a, Hmun Thianghlim Bera Cherub thla zâr hnuaiah chuan an dah a.

⁸An thla zâr chuan bâwm leh a zâwnna chu a khuh a ni.

⁹A zâwnfung hmâwr chu Hmun Thianghlim Ber kawngka zâwn taka din chuan a lang thei, hmun dang aṭang chuan a lang thei lo. A zâwnfung chu tûn thlengin a la invuah a ni.

¹⁰Bâwm chhûngah chuan eng mah dang a awm lo, Aigupta ram aṭanga an lo chhuah laia LALPA thuthlung, Horeb tlânga ziakna lungphêk pahnih Mosia dah chauh kha a awm.

¹¹Eng pâwla tel ṭhîn pawh ni se puithiamho chu an inthian thianghlim sa vek a. Hmun Thianghlim Ber aṭang chuan an lo chhuak a.

¹²Levia chi, zaipâwla tel - Asafa te, Kenana te, Jeduthuna te chu an hote nên puan zai sîn vâr silhfên inbelin dârbenthek te, ṭingṭang te, perhkhuang te an rawn keng a, maichâm bul khawchhak lamah an ding a, tawtawrâwt tum tûr puithiam za leh sawmhnih an tel bawk.

¹³Tawtawrâwt pute leh zaipâwlte chu LALPA fakna hla saa, a hnêna lâwmthu sawina hla sa tûr an ni. Tawtawrâwt te, dârbenthek te leh thil ri thei dangte nên zaipâwl chuan LALPA fakna hla, ‘LALPA chu fak rawh u, a ṭha si a. Kumkhuain min lainat reng a ni’ tih an sa ta tuar tuar a. LALPA in Tempul chhûngah chuan, chhûm a khat ta a.

¹⁴LALPA ropuina chhûm chu Tempul chhûnga a khah tlat avângin puithiamte chuan rawng an bâwl thei lo.