Read Mizo Lushai BU HNIHNA CHRONICLES 6 Bible Online

BU HNIHNA CHRONICLES 6 - Mizo Lushai bible

BU HNIHNA CHRONICLES 6

¹Solomona chu a ṭawngṭai a, “Chhûm thim zînga awm i duh a,

²tûnah zawng, Tempul ṭha tak ka siamsak tâk che hi, kumkhuaa i awmna tûr chu,” a ti a.

³Israel mi zawng zawng chu chutah chuan an ding a, Solomona chuan an lam a hawi a, Pathian malsâwmna a dilsak a.

⁴An hnênah chuan, “Israel-te Pathian, LALPA chu fak rawh u, Ani chuan ka pa Davida hnêna a thutiam a rawn tihpuitlin tâk hi.

⁵“LALPA chuan, ‘ka mite Aigupta ram ata ka hruai chhuah aṭanga tûn thlengin Israel khawpui khawiah mah min biakna tûr Tempul sakna hmun ka la thlang lo. Chumi ti tûr chuan ka mi Israel tu mah ka la thlang hek lo.

⁶Tûnah zawng, min biakna hmun atân Jerusalem hi ka thlang ta a, nang David, ka mite chunga lal atân ka ruat a che,’ a ti a.

⁷“Ka pa, Davida khân Israel-te Pathian, LALPA biakna tûr Tempul sak a tum a;

⁸mahse, LALPA chuan ka Pa Davida hnênah, ‘Ka chênna tûr in min siamsak i tum hi i ti ṭha e.

⁹Mahse, nang chuan i sa lo vang, i fapa, i hrin ngeiin a ni Tempul chu sa dâwn ni,’ a ti a.

¹⁰“LALPA chuan a thutiam chu a tipuitling ta a, a tiam angin ka pa Davida aiah lal ka lo ni a, a lalṭhutthlêng mi luahtîr a; he in hi Israel Pathian, LALPA hming awmna atân ka sa zo ta a ni.

¹¹Israel mite nêna thuthlung a siam dahna bâwm pawh a chhûngah ka dah fel ta,” a ti a.

¹²Mipui hmaah Solomona chu maichâm bulah a kal a, bân pharin a ṭawngṭai a.

¹³Solomona khân dâr dawhkân, tawng nga bial, tawng thuma sâng a siam a, Tempul tuallaiah chuan a dah a. Dawhkân chungah chuan a lâwn a, vân lam hawia bân a phar chu mi tinin an hmu thei a ni.

¹⁴A ṭawngṭai a: “Aw LALPA, Israel-te Pathian, lei leh vânah nang ang rêng Pathian an awm lo. I mite nêna i thuthlung chu i vawng ṭhîn a, i thu an awih phawt chuan i hmangaihzia i lantîr ṭhîn.

¹⁵Ka pa, Davida hnêna i thutiam chu i hlen a, vawiin hian i tipuitling ta a ni.

¹⁶Khai le, LALPA, Israel-te Pathian, ka pa Davidan i dânte a pawisaka, a thlahten an pawisak ve phawt chuan ‘a thlah pakhat tal chu Israel lalah an ṭang reng ang,’ tih i tiam pawh kha han hlen teh le.

¹⁷I chhiahhlawh Davida hnêna i tiam zawng zawng kha, aw LALPA, Israel-te Pathian, han tihlawhtling teh le.

¹⁸“Pathian meuh chu lei mihringte zîngah hian i chêng duh ngût dâwn em ni? Vânah pawh i leng si lo va, ka Tempul sakah hian leng rual em i nih?

¹⁹Aw LALPA, ka Pathian, i chhiahhlawhin ka dîl hi lo ngaithla la, ka ngen hi min phalsak ang che.

²⁰I hming awmna tûra i thlan, he in hi a chhûn a zânin vêng la, i lam hawia ka ṭawngṭai hi lo ngaithla ang che.

²¹Ka ṭawngṭaina hi ngaithla la, i mi Israel-te, he Tempul hawia an ṭawngṭai chuan ngaithla la. I in vân sâng aṭang chuan lo hria la, kan sual ngaidam ang che.

²²“Tu pawh, thil sual tia puh, i maichâm hmaa lo kala, tihsual a neih lohzia hriat nân chhia a rawn chham chuan,

²³Aw LALPA, i vân sâng aṭangin lo ngaithla la, i chhiahhlawh chungthu chu dik takin rêlsak la, mi sual chu hrem la, pawi khawih lo chu chhuah ang che.

²⁴“An sual avânga i mi Israel-te chu an hmêlmaten an sawisaka, i lam an lo hawia, i Tempul hawia ngaihdam an rawn dîl chuan,

²⁵I vân sâng aṭangin lo ngaithla la, i mite sual chu ngaidam la, an hnêna i pêk, an thlahtute i pêk ramah chuan hruai kîr leh ang che.

²⁶“I mite sual avângin khua i khêntîr a, an sual sima Tempul hawia an rawn ṭawngṭai chuan,

²⁷aw LALPA, an thu chu ngaihthlâksak la, i chhiahhlawh Israel-te sual chu ngaidam la; thil dik tih zirtîr ang che. Tin, aw LALPA, i mite neih hlen tûra i pêk i ramah chuan ruah sûrtîr ang che.

²⁸“Ṭam tlâk te, hri lên te, thli lumin thlai a chhêm chhiata, khau te a puana, râl an lo lente leh i mite an dam loh hritlân hunah te,

²⁹an ṭawngṭaina chu ngaithla ang che. I mi Israel tu pawh sim takzeta i Tempul lam hawia a ṭawngṭai chuan,

³⁰a dîl chu lo hria la, i vân sâng aṭangin ngaithla la, ngaidam ang che. Nangmah chauh hian mihring thinlung chhûngril chu i hmu thei a,

³¹min thlahtute i pêk rama an awm chhûng chu nang hi an ṭih che a, i thu an awih theih nân an phu tâwk zêlin an chungah ti ang che.

³²“Hnam dang, Israel mi ni lo, ram hla taka awmte pawhin i ropuizia leh i thiltihtheihzia chu an hriata, i ṭanpui peih reng tih hriaa lo kalin he in lam hawia an ṭawngṭai chuan,

³³an dîl chu ngaithla la, i chênna vân sâng aṭang chuan lo ngaithla la, an ngen chu tihsak ang che; khawvêla mi zawng zawngin i mi Israel-te angin an hre dâwn che nia. He ka Tempul sakah hian chibai an rawn bûk che a ni tih an hria ang.

³⁴“An hmêlmate do tûra i mite an chhuaha, khawi aṭang pawhin i thlan he khua emaw, i tâna ka Tempul sak lam emaw hawia an ṭawngṭai chuan

³⁵lo ngaithla la, vân aṭangin lo hria la, an hmêlmate chu hnehpui ngei ang che.

³⁶“I miten i laka thil sual an tiha, thil sual ti lo an awm si lo, i thin an tih-ura, an hmêlmate kuta i pêka, sala an hruaiin, an hruaina ram chu hla hle mah se,

³⁷i mite ṭawngṭai chu ngaithla ang che, chu ramah chuan an sual an sima, an sualna leh an khawlohnaah thupha an chawi chuan, aw LALPA, an ṭawngṭaina chu ngaithla ang che.

³⁸Chûng rama an awm hnuin an sual an sim takzeta, inchhîra an thlahtute hnêna i pêk ram lam te, i tâna i khawpui thlan lam te, i tâna ka sak he Tempul lam hawi tea an ṭawngṭai chuan,

³⁹lo ngaithla la, i vân sâng aṭang chuan lo hria ang che; an chungah ngilnei la, i mite sualna zawng zawng chu ngaidam ang che.

⁴⁰“Aw ka Pathian, min rawn thlîr la, he hmuna kan ṭawngṭai hi ngaithla ang che.

⁴¹Aw LALPA Pathian, lo thawk chhuak la, I chênna tûrah hian lo kal teh, I ropuizia lanna bâwm nên lo lût rawh, Aw LALPA Pathian, i puithiamte chu an thiltih apiangah malsâwm la, I mi thianghlimte chu i thil ṭha tihsakah lâwm rawh se.

⁴²Aw LALPA Pathian, I hriakthiha hi hawisan suh la, I chhiahhlawh Davida thil ṭha tihte hre reng ang che,” a ti a.