Read Mizo Lushai BU HNIHNA CHRONICLES 7 Bible Online

BU HNIHNA CHRONICLES 7 - Mizo Lushai bible

BU HNIHNA CHRONICLES 7

¹Lal Solomona a ṭawngṭai zawh chuan vân aṭangin mei a lo tla a, thilhlante chu a rawn kâng ral ta a; Tempul chhûng chu LALPA ropuina chuan a khat ta tlat a.

²LALPA in chhûng chu a ropuinaa a khah tlat avâng chuan puithiamte chu LALPA Tempulah chuan an lût thei lo.

³Vân aṭanga mei lo tla leh in chhûng LALPA ropuinaa a khat chu, Israel miten an han hmuh chuan tualah an bawkkhup a, Pathian chibai an bûk a, a ṭhatna avâng leh ngil a neih kumkhua ṭhîn avângin an fak a,

⁴Solomona leh mite chuan LALPA hnênah thilhlan an hlân a.

⁵Remna thilhlan atân bâwng sînghnih leh sânghnih, berâm nuaikhat leh sînghnih an hlân a. Chutianga tiin Solomona leh a mite chuan Tempul chu an hawng ta a.

⁶Puithiamho chu an dinna hmun tûra ruatah chuan an ding a, Levia chite chuan Davida pêk thil tum rîk theihte nên LALPA fak hla, ‘Kumkhuaa min hmangaihtu a ni,’ tih hla, Davidan sa tûra a tih ang ngeiin an sa ta tuar tuar a, Puithiamte pawhin mipui ding hmaah tawtawrâwt an hâm ruai ruai a.

⁷A hung chhûng kawtlai pawh chu Solomona chuan a hawng a, hâlral thilhlan te, buhbâl thilhlan te, remna thilhlan ran thau te chu a hâl a, dâr maichâm a siam kha hêng zawng zawng hlan nân a tê lutuk a, a leng lo chu tualah chuan an hâl mai a ni.

⁸Lal Solomona leh mi dangte chuan Bâwkte kût, ni sarih chhûng an hmang zui a, Israel ram hmâr tâwp lam Hamath kalkhân leh chhim lam Aigupta lui inkâra mi zawng zawng chu an lo kal khâwm a, mi an tam hle mai.

⁹Maichâm lawmin ni sarih a awh a, Bâwkte kût hian ni sarih dang a awh leh a, kût ni hnuhnûng berah chuan kût khârna inkhâwm ropui tak an nei a.

¹⁰A tûk leh thla sarihna, ni sawmhnih leh pathum ni chuan Solomona chuan mipuite chu a ṭintîr ta a. LALPA chuan a mi Israel-te mal a sâwm a, Davida te, Solomona te mal a sâwm avâng chuan mipui chu an hlim êm êm a.

¹¹Ruat a nih ang ngeia lal Solomonan Tempul leh lal in a sak zawh fel vek hnu chuan,

¹²zânah LALPA chu a hnênah a rawn inlâr a, “I ṭawngṭaina ka lo hria a, Tempul hi ka hnêna thilhlan in rawn hlanna hmun atân ka thlang ta e.

¹³Khua ka tikhêng emaw, thlai ei chhe tûr khau ka tipuang emaw, hri ka lêntîr hunah emaw,

¹⁴ka hming putu ka mite hian thuhnuairawlh taka ka hnêna an rawn ṭawngṭaia, min rawn pana, an sualna ata an lo hawi kîr chuan vân aṭangin ka lo hria ang a, an sualte chu ka ngaidam ang a, an ramte pawh ka tungding leh ang.

¹⁵Tempul hi ka vil ang a, heta an ṭawngṭai chuan ka beng ka lo chhi ang.

¹⁶Kumkhuaa min biakna hmun atân ka thlang a, ka tihthianghlim tawh avângin ka vil ang a, ka vêng tlat ang.

¹⁷Nang pawh, i pa Davida tih anga i tiha, ka thupêkte i awiha, ka thuruatte i zawma, awm dân tûr ka tih anga i awm chuan,

¹⁸I pa Davida hnêna ka thutiam kha ka hlen ang; a thlahte chu Israel-te lalah an ṭang reng ang tih ka tiam a nih kha.

¹⁹In tâna ka thupêk te, ka thuruat te in ngaihsak lohva, in zâwm duh lohva, pathian dangte in biaka, an rawng in bâwl vaih chuan,

²⁰ka pêk che u ram ata hi ka paih chhuak ang che u a, min biak ṭhinna tûra ka Tempul ka tihthianghlim tawh pawh hi ka rauhsan ang a, mi tinin an nuihzat ang a, an hmusit bawk ang.

²¹“Tûnah chuan he in hi mi tinin an ngaisâng a, chutih hunah chuan a kianga kal apiangin mak an ti ang a, ‘Engtizia nge LALPA hian he ram leh he Tempul hi heti taka a sawisak le!’ an ti ang.

²²Mi ṭhenkhatin, ‘An thlahtute Aigupta ram aṭanga hruai chhuaktu LALPA, an Pathian chu an kalsan atin alâwm maw le; pathian dangte an vuan a, an rawngte an bâwlsan avângin LALPA chuan a sawisa a nih hi,’ tiin an chhâng ang,” a ti a.