Read Mizo Lushai BU HNIHNA CHRONICLES 8 Bible Online

BU HNIHNA CHRONICLES 8 - Mizo Lushai bible

BU HNIHNA CHRONICLES 8

¹ LALPA Tempul leh ama in a sak chhûng kum sawmhnih a lo vei chuan Solomonan,

²Hirama pêk khawpuite chu a din ṭha a, Judai rama mite a luahtîr a.

³Solomona chuan Hamath-zoba a bei a, a la a.

⁴Thlalêra Tadmor kulh chu a siam ṭha a, Hamath biala khuate chu kudâm awm nân a siam ṭha bawk a.

⁵Solomona chuan Beth-horon chuanchung leh chuanhnuai kulh bangte chu a rem ṭha a, kawngkhârte pawh a kalhnate nên a siam a.

⁶Baalat khawpui te leh kudâm a dahna khawpui te, a sakawrte leh a tawlailîr a dahna khawpui te pawh a siam ṭha leh vek a. Jerusalem-ah te, Lebanon-ah te leh a ram chhûng rêng rêngah in sak a tum tawh phawt chu a sa vek a.

⁷Israel mi ni lo, Hit mi te, Amor mi te, Periz mi te, Hiv mi te, Jebus mi te, Kanan rama lo awm, Israel-ten Kanan ram an luaha,

⁸an thah bângte thlahte kha Solomona chuan bawih anga chhawr tûrin hnathawk pâwl a din a, chûng chu tûn thlengin an la awm.

⁹Israel mite erawh chu hnathawk tûra phût luih an ni lo; sipaiah te, hotu-ah te, tawlailîr khalhtuah te leh sakawr chungchuang mi atân te an ṭang thung a.

¹⁰In sak hna enkawltu mi zahnih leh sawmnga an awm.

¹¹Solomona chuan a nupui, Aigupta lal fanu tân in a sa a, Davida khawpui aṭang chuan a la chhuak a, a in sakah chuan a awmtîr ta a. “Ka nupui hi Israel lal Davida inah a awm tûr a ni lo. Thuthlung Bâwm awmna apiang hi Hmun Thianghlim a ni si a,” a ti a.

¹²Tempul kawta maichâm a siamah Solomona chuan hâlral thilhlan a hlân a.

¹³Mosia dân bu-a chuang angin ni tina hlan tûr te, sabat nia hlan tûr te, thla thara hlan tûr te leh kum khat chhûnga kût vawi thum chhang dawidim telh loh kût te, Pentikos kût te, Bâwkte kûttea hlan tûr bi tukte chu a hlân a.

¹⁴A pa Davida ruat tawh angin puithiamte ni tin tih tûr a tihfelpui a, puithiamho zaia lo pui tûr Levia chite thawh tûr pawh a tihfelsak a. Tempul pulis-ho ni tin hna tûr te, kawngkhâr an vên tûr te, Pathian mi Davida sawi ang khân a ruat vek a.

¹⁵Kudâm leh thil dang chungchâng puithiamte leh Levia chite hnêna Davida thupêk zawng zawng kha engkim a ti vek a.

¹⁶ LALPA Tempul an sakna tûr lung an phûm ni aṭanga an peih fel thlenga Solomonan tih tûr a ruahman zawng zawng chu an ti ta vek a, LALPA Tempul chu an puitlin ta a.

¹⁷Agaba litengsâwl, Edom rama Ezion-geber leh Eloth khuaah Solomona chu a kal a.

¹⁸Lal Hirama chuan lawng leh lawngpu thiam tak tak a rawn thawn a, Solomona mite nên Ofir ramah an kal a, rangkachak kg. sîngkhat leh sângnga aia tam mah an rawn hâwn a, lal Solomona hnênah an rawn thlen a.