Read Mizo Lushai BU HNIHNA CHRONICLES 9 Bible Online

BU HNIHNA CHRONICLES 9 - Mizo Lushai bible

BU HNIHNA CHRONICLES 9

¹Seba lalnuin Solomona hmingthanzia a hriat chuan thu har tak tak zâwta fiah tûrin Jerusalem-ah a kal a. Ṭhuihruai tam tak a nei a, mosola phur sanghâwngsei tam tak a hruai a, mosola te, lungmantam te, rangkachak te a keng ṭeuh bawk a. Solomona nên an inhmuh chuan zawh tûr a neih zawng zawng chu a zâwt ta vek a.

²A zawh zawng zawng chu Solomona chuan a chhâng thei vek a, chhan harsa tih rêng a nei lo.

³Seba lalnu chuan Solomona finzia chu a hria a, a in sak ropuizia te chu a hmu a,

⁴Solomona ei tûr an rawn hlui te, a chhiahhlawh awmna in te, lal ina thawktu hna insem dân te, an thawmhnaw hâk mawizia te; chawhlui kîlpuitute leh a viltute inchei mawizia te, Tempula hâlral thilhlan a hlan hnemzia te a han hmuh chuan mak a ti a, awm ngaihna rêng a hre ta lo va.

⁵Lalnu chuan, “I thil tihte leh i finziate kan rama ka hriat kha a lo dik ngei a nih hi.

⁶Ka lo kal a, ka rawn hmuh hma chuan an sawi chu ka awih lo va; mahse, i finziate hi a zâtve pawh an sawi hlei nem, an sawi ai daihin a ropui hi.

⁷I nupuite chu an va nihlawh êm! I chhiahhlawh, ni tina i bula awma, i finzia ngaithla ṭhîntute pawh hi an va nihlawh êm!

⁸I Pathian, LALPA chu fakin awm rawh se, ani chu i chungah a lâwm a, a aia rorêltu, lalah a ruat che a ni. I Pathian chuan Israel-te hi a hmangaih a, an chungah dik taka rorêltu lalah a dah che a nih hi,” a ti a.

⁹Thilpêk tûr a rawn ken rangkachak kg. sângli chuang leh mosola tam tak, lungmantam ṭhahnem tâwk tak nên Solomona chu a pe a. Seba lalnuin Solomona a pêk mosola anga ṭha rêng rêng hi a awm lo.

¹⁰Lal Hirama hote leh Solomona hote chuan Ofir rangkachak an rawn hâwn a, algum thing leh lungmantam pawh an rawn hâwn a.

¹¹Algum thing chuan Tempul pindan chung leh ama in kailâwn a siam a, thing chu perhkhuang leh ṭingṭang siam nân a hmang bawk a, Judai ramah hetiang thing hi an la hmu ngai rêng rêng lo.

¹²Lal Solomona chuan Seba lalnu chu a duh leh a dîl apiang chu a pe a; chu bâkah thilpêk a rawn kensak lo do lêtna a pe tel bawk a; an ram lamah a ṭhuihruaite nên an haw leh ta a.

¹³Solomona chuan kum tin rangkachak kg. sînghnih leh sângthum dâwn lai a dawng ṭhîn a.

¹⁴Sumdâwngte leh dâwrkaiten chhiah an pêk bâkah Arabia lalte leh Israel-te rama bial tin awptute chuan Solomona chu rangkachak leh tangka an rawn pe ṭhîn.

¹⁵Phaw lian pui pui, rangkachak den phêk zahnih a siam a, phaw pakhatah rangkachak kg. sarih vêl zêl a hmang a ni.

¹⁶Phaw tê deuh rangkachak den phêk kg. thuma rita tuam a siam bawk a, ‘Lebanon ngaw in’ an tih pindanah chuan a dah a.

¹⁷Lal chuan saingho lalṭhutthlêng ropui tak a siam a, rangkachak hlîr hlakin a tuam a.

¹⁸Lalṭhutthlêng lâwn chhohna tûr rangkachak rahka paruk, rah chhan tûr nên a siam a. Ṭhutthlêng chuan bân a nei a, a bân sîr tawnah sakeibaknei lem a dintîr a.

¹⁹Sakeibaknei lem sâwm leh pahnih, rahka sîr tawnah chuan a bawhtîr bawk a, chutiang khawpa ropui chu khawi ramah mah a awm lo.

²⁰Solomona no chu rangkachak vek a ni, ‘Lebanon ngaw in’ an tih pindana an thil eina bungbêlte pawh chu rangkachak hlîr hlaka siam a ni. Solomona hun lai chuan tangkaruate hi chu engah mah an ngai lo.

²¹Lawngrual a nei bawk a, lal Hirama lawng rualte nên an inkawp a, Tarsis-ah te kalin kum thum danah an lo haw a, rangkachak te, tangkarua te, saingho te, zâwng te, ârâwn te an rawn hâwn ṭhîn.

²²Lal Solomona chu khawvêl lal dang zawng zawng aiin a hausa a, a fing zâwk bawk a.

²³Solomona hnêna Pathianin finna a pêk chu hre duhin an rawn pan huai huai a.

²⁴Tangkarua leh rangkachaka thil siam te, puan te, râlthuam te, mosola te, sakawr te, sakawr puakphur chi te an rawn pe zut zut a, kum tin hetianga rawn ti hi an awm zêl a ni.

²⁵Lal Solomona chuan sakawr vulhna hmun sângli a nei a, chûngah chuan a sakawr tawlailîr leh a sakawrte chu a dah a, indo sakawr pawh sîngkhat leh sânghnih a nei a, a ṭhen chu Jerusalem-ah a kawl a, a dang chu khaw hrang hrangah a dah a.

²⁶Eufretis luipui leh Filistia ram inkâr, Aigupta lui thleng ram chhûnga lal ber a ni a,

²⁷Solomona lal laiin Jerusalem khuaah chuan tangkarua chu lungtê ang lek a ni a, sidar thing lah tlâng bulṭhut khawthlang phaia theipui thing ang maiin a tam a ni.

²⁸Solomona chuan Aigupta ram leh hmun hrang hrang aṭangin sakawr a tawlh ṭhîn.

²⁹A bul aṭanga a tâwp thlengin Solomona chanchin hi zâwlnei Nathana lehkhabu-ah te, Silo mi Ahiza thu sawi ziakna bu-ah te, Nebata fapa Israel lal Jeroboama chungchânga zâwlnei Idoa inlârna ziakna bu-ah te a chuang.

³⁰Solomona chu Jerusalem-ah Israel zawng zawng chungah kum sawmli a lal a,

³¹a thi a, Davida khawpuiah an phûm a, a fapa Rehoboama chu a lo lal ta a.