Read Mizo Lushai Ezra 1 Bible Online

Ezra 1 - Mizo Lushai bible

Ezra 1

¹Persia lal Kura lal ṭan tirh kumin zâwlnei Jeremia kâa LALPA thu lo sawi tawh chu a thlen kim theih nân; LALPA chuan Persia lal Kura rilru chu a tiharh a, a ram pum puiah ziakin thu puan a chhuah a, hetiangin:

²“Persia lal Kura chuan heti hian a ti: Vân Pathian, LALPA chuan khawvêl ram pum pui hi min pe ta a. Judai ram Jerusalem khuaah a tân in sa tûrin min ti a ni.

³Nangni, a mi zawng zawngte hnênah Pathian chu awm rawh se. Judai ram Jerusalem khuaah chuan haw chho ula, Israel-te Pathian, Jerusalem khuaa in biak ṭhin LALPA Tempul chu han sa ṭha rawh u le.

⁴A mi, saltâng tu pawh ṭanpui ngai chu an ṭhenawmten tangka te, rangkachak te leh sabengtung tein ṭanpui rawh se; Jerusalem khuaa Pathian Tempula thilhlan tûr pawh pe rawh se,” tiin.

⁵Juda leh Benjamin hnam hruaitu te, puithiam leh Levia chi te leh mi dang, Pathianin an rilru a tihphûrsak te chu, Jerusalem-a LALPA in sa tûr chuan an insiam ta a.

⁶An vêla awmte chuan tangkaraw bungbêl te, rangkachak te, thawmhnaw te, sabengtung te an pe a, chûng bâkah Tempul sak nâna an thawhlâwmte pawh an pe bawk a.

⁷Nebukadnezaran LALPA in aṭanga bungbêl a lâk zawng zawng kha an pathian inah a dah a; chûngte chu lal Kura chuan,

⁸lal sum enkawltu Mithredata chu a lâk chhuahtîr a, an ziak chhuak a, Juda-ho zînga hotu ber Sesbazara a pe a,

⁹chûngte chu: rangkachak maihûn sawmthum, tangkaraw maihûn sângkhat; chem sawmhnih leh pakua.

¹⁰Rangkachak no sawmthum; tangkaraw no zali leh sâwm; bungbêl chi dang sângkhat.

¹¹A vaiin rangkachak leh tangkaruaa siam no leh thil dang chi hrang chu kg. sângnga leh zali a ni a; Sesbazara leh saltâng dangte chuan chûng chu Babulon aṭangin Jerusalem-ah an chhohpui a.