Read Mizo Lushai Ezra 3 Bible Online

Ezra 3 - Mizo Lushai bible

Ezra 3

¹Thla sarih chhûngin Israel-te chu mahni awmna tûr ṭheuhvah an awm fel hman a, Jerusalem-ah an kal khâwm ta vek a.

²Jozadaka fapa Jesua leh a puithiam nihpui Sealtiela fapa Zerubabela leh an unaute chu an tho va; Israel-te Pathian maichâm, Pathian mi Mosia Dân bu-a ziak anga hâlral thilhlan an hlanna tûr an siam a.

³Chu rama mi lo awmte chu saltâng chhuakte chuan hlau bawk mah se, maichâm chu a awm ṭhinnaah khân an din leh ta a; zîngah leh tlaiah hâlral thilhlan an hâl leh ta a.

⁴Bâwkte kût an hmang a, kût chhûng chuan ni tin thilhlan tûr tuk zât, dân bu-a ziak ang chu an hlân a.

⁵Ni tina hâlral thilhlan an hlan bâkah thla thar apianga an thilhlan ṭhin te, LALPA hminga inkhâwmpui urhsûn an neih ṭuma an thilhlan te, an mahni duh thu-a thilhlan te chu an hlân ṭan leh ta a.

⁶Thla sarihna, ni khat ni aṭang chuan LALPA hnênah hâlral thilhlan an hâl leh ṭan a, LALPA Tempul erawh chu a lung pawh an la phûm lo.

⁷Mite chuan an thawhlâwm a, lung chher mi te, thing mistiri te hlawh neiin an ruai a. Lebanon tlânga sidar thing, tuifinriata tawlha, Joppa khua rawn thlen tûrin Sidon leh Tura mite chu buh te, uain te, oliv hriak te an pe bawk a. Chûng chu Persia lal Kura phalna veka tih a ni.

⁸Jerusalem khuaa LALPA in awmna ṭhin an lo thlen kum hnihna, thla hnihnaah chuan Sealtiela fapa Zerubabela leh Jozadaka fapa Jesua chuan Tempul sak leh hna chu an ṭan a; an unau dangte - puithiam te leh Levia chi te, saltâng chhuak zawng zawngte pawh chu Jerusalem-ah an lo kal khâwm a, Levia chi kum sawmhnih chin chung lam chu Tempul sak enkawltuah an ruat a.

⁹Levia chi Jesua chu a fate leh an laichînte nên, Kadmiela leh a fate nên, Hadavia thlahte nên chuan LALPA in satu hotu-ah an ruat a. Levia chi, Henadada leh a fate leh an unaute pawh chuan, an ṭanpui bawk ṭhîn.

¹⁰LALPA Tempul tân lung an phûm dâwn ni chuan, puithiamho chuan an puithiam kawr an inbel a, tawtawrâwt an keng a, Israel lal Davida remruat angin Asafa thlah Levia chite chu LALPA fak hla sa tûrin dârbenthekte nên an lo thawk bawk a.

¹¹LALPA chu an fak a, lâwmthu an hrilh a, hla sa-in an inchhâwn a; “Ani chu a ṭha si a, Israel-te chungah ngîl a nei kumkhua dâwn a ni,” an ti a. LALPA in sakna tûr lung an han phûm chuan LALPA fakin mipui zawng zawng chu an au dur dur a.

¹²Upaho, puithiamte leh Levia chi tam tak leh hnam hruaitute, Tempul a din lai hmu phate erawh chuan Tempul sakna tûr lung an phûm an han hmuh chuan ring takin an ṭap a, mi tam tak erawh chu lâwmin an au va.

¹³Lâwma au thâwm leh lungchhiaa ṭap thâwm chu hriat hran hleih theih pawh a ni lo, an au ring êm a, hla tak aṭang pawhin an thâwm chu a hriat theih a ni.