Read Mizo Lushai Ezra 4 Bible Online

Ezra 4 - Mizo Lushai bible

Ezra 4

¹Juda leh Benjamin thlah ertute chuan, saltâng kîr lehten Israel-te Pathian, LALPA tân Tempul an sa ṭha tih an hriat chuan

²Zerubabelâ leh hnam hruaitute hnênah an lo kal a, “Tempul saknaah hian kan tel ve ang e; in biak Pathian bawk hi kan bia a, Asuria lal Esar-hadonan hêng laia awm tûra min hâwntîr hnuah phei chuan a hnênah hlîr inthawina pawh kan hlân ṭhîn a ni,” an rawn ti a.

³Zerubabela te, Jesua te leh hnam hruaitu te chuan, “Kan Pathian, LALPA Tempul hi min sakpui a ngai lo ve; keimahniin kan sa mai ang. Babulon lal Kuran thu min pêk angin,” tiin an chhâng a.

⁴Chûng lai rama mi lo awmte chuan Juda-te in sa chu an tibuai ta a.

⁵Persia sawrkâr mite chu an hna tibahlah tûrin an tham a. Chutiang chuan Kura lal chhûng zawng Daria a lo lal thleng khân an tibuai a ni.

⁶Ahasuera a lo lal phei kha chuan an hmêlma, Jerusalem leh Judai rama awmte chuan ziak meuhvin an hêk a.

⁷Artazerzia kha Persia rama Babulon lal a lo nih khân Bislama te, Mithredata te leh Tabeela te chuan lal hnênah ziakin an hêk bawk a, an hêkna lehkha chu Aramaik ṭawngin, Aramaik hawrawpa ziak a ni.

⁸Ramawptu Rehuma leh chu ram ziaktu Simsaia pawhin lal Artazerzia chu Jerusalem mite chungchâng hetiangin lehkha an thawn bawk:

⁹Ramawptu Rehuma te, Ziaktu Simsaia te, an hna thawhpui, rorêltute leh sawrkâr hna thawk dang - Babulon bial Erek leh, Elam bial Susa khaw mite leh,

¹⁰Asurbanipal ropuia leh thiltitheian an in leh lo aṭanga Samaria khua leh Eufretis lui khawthlang lama a awmtîrte hminga an lehkha ziak chu hetiang hi a ni:

¹¹“Lal Artazerzia chu, a chhiahhlawh Eufretis lui khawthlang lama awmte chuan chibai kan bûk a che.

¹²Juda-ho, i ram hmun hrang hrang aṭanga lo kal, Jerusalem-a awm tâte chuan khaw luhlul tak leh hel hmang tak chu an din leh dâwn a; a kulh bang an rem tawh a, an sa zo mai dâwn tih i hriat kan duh a ni.

¹³Ka pu, he khua hi din leh a niha, a kulh bangte an rem zawh chuan mite chuan chhiah an pe duh lo vang che a, leiman leh thil dang an chawi duh lo vang a, lal sum tûr a kiam hle ang tih lal chuan hre teh se.

¹⁴Lal zârzotute kan ni a, chutianga lal tâna thil ṭha lo chu thleng lo se tiin lal chu hetianga ti tûrin kan ngên a che.

¹⁵I pate thil hlui chhinchhiahna chu zawn chhuahtîr mah teh, he khawpuia mite hi mi tihmawh tak an ni a, hmânlai aṭang tawhin lal leh ramawptute tân awp an khirh êm êm ṭhîn a ni; chuvângin alâwm khua an chhut chhiat vek ni.

¹⁶He khua hi an sak ṭhat leha, a kulh bangte an rem zawh chuan Eufretis khawthlang lam ram hi lal chuan a thunun thei lo mai ang tih kan ring tlat a ni,” tiin.

¹⁷Lal chuan hetiang hian a chhâng a: “Ramawptu Rehuma te, Ziaktu Simsaia te, an thawhpui Samaria-a awm leh Eufretis lui thlang lama awmte hnênah:

¹⁸Lehkha in rawn thawn chu fiah takin kan hriatah an chhiar a.

¹⁹Chanchin ziaknate chu chhui tûrin ka han ti a; hmânlai aṭang tawhin Jerusalem khua chu an lalte lakah hel an chîng a; khuaah chuan hel chîng, buaina chawk chhuak peih tak tak an awm ṭeuh a ni.

²⁰Lal chak tak takte chuan Eufretis khawthlang lam ramahte chuan ro an rêl a, chhiah te, leiman te an chawitîr ṭhîn.

²¹Thu leh awm hma chu hêng mite hi khaw din hna titâwp tûrin thu pe rawh u.

²²Muangchâng lovin khap vat rawh u, lal tâna thil ṭha lo zual a thlen loh nân.”

²³Rehuma te, Simsaia te leh an thawhpui te hriata lal Artazerzia lehkha an chhiar zawh chuan an kal nghâl a, Juda-ten khaw din an tum chu an han titâwp ta a.

²⁴Persia lal Daria a lo lal kum hnihna thlengin Tempul sak pawh an chawlhsan a.