Read Mizo Lushai Ezra 6 Bible Online

Ezra 6 - Mizo Lushai bible

Ezra 6

¹Lal Daria chuan thu a pe a, Babulon khuaa lal thil hlui dahna chu a zawntîr a.

²Media biala Ekbatan khuaah zâwk chuan he thu chuanna hi an hmu chhuak a:

³“Lal Kura chuan a lal ṭan tirh kumin Jerusalem Tempul chu inthawina leh hâlral thilhlan hâlna hmun atân sak ṭhat tûr thu a pe a ni. Tempul chu tawng sawmruka sâng ni sela, tawng sawmruka zau ni bawk rawh se.

⁴Lung lian pui pui thuah thumin rem ni se, thingphel thara thuah tûr a ni; a senso hi lal sum aṭanga pêk ni rawh se.

⁵Jerusalem Tempul aṭanga rangkachak leh tangkaraw bungbêl zawng zawng, lal Nabukadnezaran Babulon-a a rawn hawnte kha tûn hmaa a awmna ṭhîn Jerusalem Tempulah dah kîr leh tûr,” tiin lal thupêk chu an lo ziak a.

⁶Lal Daria chuan hetiang hian a chhâng a: “Eufretis khawthlang lam ram awptu Tatenaia te, Sethar-bozenaia te leh an thawhpui Eufretis thlang lama awm te u: Tempul chu han hnaih suh u,

⁷an sa ṭha lai chu tibuai hek suh u. Judai ram awptu leh Juda hruaitute chuan Pathian Tempul chu a awmna ngaiah sa ṭha leh rawh se.

⁸Juda hotuten Pathian in an sa ṭha chu nangni pawhin ṭanpui rawh u; an hna hi a bahlah loh nân Eufretis khawthlang lama chhiah lâk, lal chanpual tûr aṭangin an senso tûr lo pe zat zat ang che u.

⁹Ni tina an mamawh bâwngtuai te, berâmchal te, berâmno te vân Pathian tâna hâlral thilhlana an hlan tûr chhangphut te, chi te, uain te, oliv hriakte nên Jerusalem puithiamte sawi apiang chu pe zêl ang che u.

¹⁰Tichuan, an Pathian lâwmzâwng thilhlan an hlân thei ang a, kei leh ka fate tân malsâwmna min dîlsak dâwn nia.

¹¹He thupêk hi awih duh lo an awm chuan a in chung inchhun chu pawh dawha, a hmâwr lehlam zuma, chu chuan a taksa chu chhun tlang tûr a ni; a in chu ṭhiata, bawlhhlawh dah khâwma chantîr tûr thu ka pe nghâl a ni.

¹²He thupêk hi awih lova Tempul chu tihchhiat tum hnamte leh lalte chu, amah chibai bûkna hmuna Jerusalem khua thlangtu chuan paihthla rawh se. Kei Daria hian thu ka pêk tawh hi, zâwm thlap rawh u,” tiin.

¹³Ramawptu Tatenaia te, Sethar-bozenaia te leh an thawhpui te chuan lal thupêk ang thlap chuan engkim an ti a.

¹⁴Zâwlnei Hagaia leh Zakaria chuan an fuih bawk a. Juda hruaitute Tempul sa chu an chak hle mai. Pathianin thu a pêk ang leh Persia lal Kura te, Daria te, Artazerzia te pawhin thu an pêk angin Tempul chu an sa zo ta a.

¹⁵Lal Daria lal kum rukna Adar thla, ni thum niin an sa zo ta a.

¹⁶Israel mi, puithiam te, Levia chi te, saltâng lo kîr leh zawng zawng chuan Tempul chu hlim takin an hawng a.

¹⁷A hawn ni chuan bâwngchal za, berâmchal zahnih, berâmno zali hâlral thilhlanah an hlân a. Israel hnam hming kimin sual thawina kêlpa sâwm leh pahnih an hlân bawk a.

¹⁸Mosia dân bu-a ziak angin puithiamte leh Levia chite chu Tempula an hna tûr an sem felsak bawk a.

¹⁹A kum leh thla tîr, ni sâwm leh pali ni chuan saltâng lo haw lehte chuan Kalhlên kût an hmang a.

²⁰Puithiamte leh Levia chite chu an inthian thianghlim tlâng tawh a, an za chuan an thiang a ni. Saltângte chu Kalhlên kût berâmno an talhsak a, a ṭhen chuan puithiam leh Levia chi dangte chu berâmno an talhsak bawk a.

²¹Saltâng lo haw Israel-te leh chu rama hnam dang bawlhhlawhna ata inthiarfihlîma, LALPA Israel-te Pathian pawmtute chuan an ei ta a.

²²Chhang dawidim telh loh kût ni sarih chu hlim takin an hmang a. LALPA chuan a tilâwm a ni; Asuria lal thinlung pawh a tihmensak a, Israel-te Pathian, an Pathian in sakna pawh nasa takin a pui a ni.