Read Mizo Lushai Ezra 7 Bible Online

Ezra 7 - Mizo Lushai bible

Ezra 7

¹Kum tam fe hnuah Artazerzia chu Persia ram lal a lo nih khân, mi pakhat Seraia fapa, Ezra pawh Jerusalem-ah a lo chho va. Ezra chu Seraia fa, Azaria fa, Hilkia fa,

²Saluma fa, Zadoka fa, Ahituba fa,

³Amaria fa, Azaria fa, Meraiota fa,

⁴Zerahia fa, Uzia fa, Bukia fa,

⁵Abisua fa, Finehasa fa, Eleazara fa, Puithiam lalber Arona fa a ni.

⁶He mi, Ezra hi, Babulon aṭangin Jerusalem-ah a lo chho ve a, Israel-te Pathian, LALPA pêk Mosia Dân hre tak a ni.

⁷LALPA, a Pathian chuan a awmpui avângin a duh apiang lal chuan a phalsak a.

⁸Artazerzia lal kum sarih kum thla khatnaah chuan Israel mi puithiam te, Levia chi te, Tempul pulis te leh Tempul enkawltu Netin-ho te leh mi ṭhenkhat te nên Jerusalem-ah an chho va.

⁹Artazerzia lal kum sarihna, thla khatna ni khat ni-in Babulon an chhuahsan a, Pathianin a awmpui a; thla ngana ni khat ni chuan Jerusalem an thleng a.

¹⁰Ezra chuan Pathian dân chu a dam chhûnga zir tûrin a inpe a, a tiha tihin thuruatte leh awm dân tûrte chu Israel mite zirtîr a châk hle a ni.

¹¹Lal Artazerzia chuan Ezra chu he lehkha hi a kentîr a; Ezra chu lehkha thiam, Israel-te hnêna LALPA thupêkte leh Israel-te tâna a thuruatte hre tak a ni.

¹²“Lalte lal Artazerzia chuan puithiam Ezra, Vân Pathian Dân hretu hnênah:

¹³Ka ram chhûnga Israel mi, puithiamte leh Levia chite nên, a duh apiang Jerusalem khuaa an chhoh ka phal e.

¹⁴Kei leh thu min râwntu pasarihte chuan Jerusalem leh Judai rama thil awm dân en thlithlai tûrin kan tîr che a ni, Pathian Dân i kuta kawltîr chu an zâwm ṭha meuh em tih te i en dâwn nia.

¹⁵Kei leh thu min râwntuten, Israel-te Pathian, Jerusalem-a Tempul neitu tân tangka leh rangkachak kan pêkte hi i keng dâwn nia.

¹⁶Babulon biala tangka leh rangkachak thawhlâwm khawn zawng zawng te, Israel mite leh an puithiamten Jerusalem khuaa an Pathian Tempul sak nâna an thilpêk te pawh i keng dâwn nia.

¹⁷“Tangka chu uluk takin hmang la, bâwngpa te, berâmchal te, berâmno te, chhangphut te, uain te leh oliv hriak te lei la, Jerusalem Tempula awm maichâmah chuan hlân ang che.

¹⁸Tangka leh rangkachak in hman bâng chu, nang leh i chipuite chuan in Pathian duhzâwng anga ṭûl in tihna apiangah hmang ang che u.

¹⁹Tempula hman tûr bungbêl ka pêk zawng zawng che u kha Jerusalem-a in Pathian hnênah chuan hlân ang che.

²⁰Tempula hman tûr thil dang in mamawh chuan a leina tûr chu lal sum aṭangin la mai ṭhîn ang che u.

²¹“Kei, Artazerzia hian, thu ka pe a che u: Eufretis lui thlang lam ram biala lal tangka vawngtu chuan puithiam Ezra, vân Pathian Dân chungchânga mi thiam hi, a dîl apiang lo pe nghâl vat ang che u.

²²Tangkarua kg. sângthum leh zali chin, chhangphut kg. sîngkhat chin, uain litar sânghnih chin, oliv hriak litar sânghnih chin leh chi a ṭûl zât zât in lo pe zêl tûr a ni.

²³Vân Pathianin a Tempul atân a phût ang chiah chu in pe zêl tûr a ni, kan ram leh kan fate chungah a thinur tûr a ni lo.

²⁴Puithiam te, Levia chi te, hla sa mi te, Tempul pulis te, Tempul enkawltu te, Tempula cheho rêng rêng lakah chhiah eng mah la suh u.

²⁵“Tin, nang Ezra, i Pathianin finna a pêk che chu hmang la, Eufretis lui khawthlang lam biala awm, in Pathian dân zâwm duhtute tân rorêltute siam la, anmahni awptu tûr mi ruat ang che, a la hre lo apiangte chu in Pathian Dân chu zirtîr la,

²⁶in Pathian Dân zâwm duh lotu emaw, ram dân zâwm duh lotu emaw tawh phawt chu hrem nat hle zêl tûr a ni; tihhlum emaw, ram ata hnawh chhuah emaw, a thil neih chhuhsak emaw, lung ina khungin emaw hrem tûr a ni,” tiin.

²⁷Ezra chuan, “LALPA, mi thlah lotu chu fak rawh u, Jerusalem-a awm LALPA in chei ropui nân lal thinlung heti tak hian a tithilphal a.

²⁸Lal leh a thurâwntute chu ka chungah ngîl a neihtîr a, hotu lian dangte pawhin min duhsak a; LALPA, ka Pathian chuan min tihuai a, Israel hnam hruaitu tam tak ka ruala haw tûrin ka thlêmthlu thei a ni,” a ti a.