Read Mizo Lushai Ezra 8 Bible Online

Ezra 8 - Mizo Lushai bible

Ezra 8

¹Hêng hi Israel hnam, Babulon sala tâng, lal Artazerzia lal laia Ezra ruala Jerusalem-a hawte chu an ni:

²Finehasa thlahte zînga mi Gersoma te; Ithamara thlahte zînga mi Daniela te, Davida thlahte zînga mi Sekania fa Hatusa te.

³Parosa thlahte zînga mi Zakaria, mi za leh sawmnga nên (an thlah chanchin ziakna bu a awm).

⁴Pahat-moaba thlahte zînga mi Zerahia fa Eliehoenaia, mi zahnih nên.

⁵Zatua thlahte zînga mi Jahaziela fa Sekania, mi zathum nên.

⁶Adina thlahte zînga mi Jonathana fa Ebeda, mi sawmnga nên.

⁷Elama thlahte zînga mi Athalia fapa Jesaia, mi sawmsarih nên.

⁸Sefatia thlahte zînga mi Mikaela fa Zebadia, mi sawmriat nên.

⁹Joaba thlahte zînga mi Zehiela fa Obadia, mi zahnih leh sâwm leh pariat nên.

¹⁰Bania thlahte zînga mi Josifia fa Selomita, mi za leh sawmruk nên.

¹¹Bebaia thlahte zînga mi Bebaia fa Zekaria, mi sawmhnih leh pariat nên.

¹²Azgada thlahte zînga mi Hakatana fa Johanana, mi za leh sâwm nên.

¹³Adonikama thlahte zînga mi: Elifeleta te, Jeuela te, Semaia te, mi sawmruk nên (anniho hi a hnu deuhva lo haw ve an ni).

¹⁴Bigvaia thlahte zînga mi Uthaia leh Zakura, mi sawmsarih nên.

¹⁵Ahava khaw bula tuikawng kamah chuan saltâng lo chhuakte chu ka ko khâwm a, ni thum chhûng kan châm a. Saltâng chhuakho zîngah chuan puithiam chu an lo awm a, Levia chi erawh chu an awm lo.

¹⁶An hotu pakua, Eleazara te, Ariela te, Semaia te, Elnathana te, Jariba te, Elnathana te, Nathana te, Zekaria te, Mesulama te chu ka ko va, zirtîrtu Joiariba leh Elnathana pawh ka ko va.

¹⁷Kasifia hmuna an hotu ber Ido-a leh Tempula a thawhpuite hnênah Pathian rawngbâwl tûr, Tempula che thei tûr mi rawn zawng tûrin chûng mite chu ka tîr a.

¹⁸Pathianin min khawngaih a, mi fel tak Serebia, Levia chi, Mahlia thlah an rawn tîr a; a fate leh a unaute mi sâwm leh pariat an lo kal tel ve a.

¹⁹Meraria thlah Hasabia leh Jesaia pawh an chhûngte mi sawmhnih nên an rawn tîr bawk a.

²⁰Chûng mite bâkah chuan Tempul enkawltu Netin-ho mi zahnih leh sawmhnih an rawn tîr tel bawk a; chûngho thlahtute chu lal Davida leh a hote khân Levia-ho ṭanpuituah an dah a nih kha, an hming ziakna bu pawh a la awm vek a ni.

²¹Ahava khaw bula tuikawng kamah chuan kan zaa tân chaw nghei tûr thu ka puang a; kan Pathian hmaa inphahhniamin kalkawnga min hruaia, kan thil neih leh kan fate nên min vêng tûrin kan ṭawngṭai a.

²²‘Kan Pathian chuan amah ringtu apiangte chu mal a sâwm ṭhîn a, amah hawisantute erawh chu a lâwm lo va, a hrem ṭhîn’ tiin lal chu ka lo hrilh ṭhin avângin kalkawnga râl laka min vêngtu tûr sakawr chungchuang sipai rual ka dîl zak a ni.

²³Tichuan, chaw kan nghei a, min vêng tûrin Pathian hnênah kan ṭawngṭai a, kan ṭawngṭaina chu a rawn chhâng ta rêng a.

²⁴Puithiam zînga hotu deuh deuh Serebia te, Hasabia te leh mi dang sâwm ka thlang chhuak a;

²⁵lal leh a thurâwntute, a miliante leh Israel miten Tempula hman tûr tangkarua te, rangkachak te leh bungbêl an pêkte chu ka bûk chhuak a, puithiamte hnênah chuan ka sem a:

²⁶Tangkarua chu kg. sînghnih leh sânghnih a ni, tangkaraw bungbêl za, kg. sawmsarih bûk, rangkachak chu kg. sângthum leh zali,

²⁷rangkachak maihûn sawmhnih, kg. riat leh tlem a rit; dâr chawhtawlh mawi tak pahnih, rangkachak maihûn tluka hlu a ni.

²⁸An hnênah, “LALPA tâna serh hran in ni, hêng bungbêlte pawh hi bungbêl thianghlim an ni; hêng thil thlâwn pêk tangkarua te, rangkachak te hi LALPA, in Pathian tâna pêk a ni.

²⁹Vêng ula, kawl ṭha rawh u; Jerusalem-a LALPA in pindan pakhata puithiam leh Levia chi hotute leh Israel hnam hotute hnêna in hlan hunah in bûk leh tûr a ni,” ka ti a.

³⁰Tichuan, puithiamte leh Levia chite chuan tangkarua te, rangkachak te leh bungbêl te chu Jerusalem Tempula ken tûr chuan an la ta a.

³¹Thla hmasa ber ni sawmhnih ni chuan Ahava tuikawng chu Jerusalem pan tûrin kan chhuahsan a. Kan kalnaah chuan hmêlma min rawn bei tûr lakah te, min châng rutute lakah te kan Pathian chuan min vêng zêl a.

³²Jerusalem kan thlen chuan ni thum kan hahchâwl a.

³³A ni li ni chuan Tempulah kan kal a, tangkarua te, rangkachak te, leh bungbêl kan ken te chu kan bûk chhuak a, Uria fapa puithiam Meremota kutah kan hlân a. Finehasa fapa Eleazara leh Levia chi mi pahnih, Jesua fapa Jozabada leh Binuia fapa Noadia pawh an awm ve a.

³⁴Engkim kan chhiar a, kan bûk vek a, kan chhinchhiah vek a ni.

³⁵Saltâng lo haw zawng zawng chuan Israel Pathian hnênah hâlral thilhlan an hlân ṭheuh va, Israel hnam hming kimin bâwngpa sâwm leh pahnih, berâmchal sawmkua leh paruk leh berâmno sawmsarih leh pasarih; sual thawi nan kelpa sawm leh pahnih an hlân a. Chûng sa zawng zawng chu LALPA tân hâlral vek a ni.

³⁶Lalin lehkha a kentîr pawh chu Eufretis lui khawthlang bial ram awptu leh mi lian dangte chu an entîr a; anniho chuan Tempul sakna leh Pathian biaknaah mipuite an ṭanpui ta zêl a.