Read Mizo Lushai Ezra 9 Bible Online

Ezra 9 - Mizo Lushai bible

Ezra 9

¹Chûng thil chu kan tih zawh chuan Israel hotute chu an lo kal a, “Israel mite hian, puithiam leh Levia chite pawhin an chhehvêl hnam Amon te, Moab te, Aigupta mi te, Kanan mi te, Hit mi te, Periz mi te, Jebus mi te, Amor mite lak aṭanga inthiarfihlîm lovin thil tenawm an tih ṭhin chu an ti ve zêl mai.

²Anmahni leh an fate pawhin, hnam dang an nei a, chi thianghlim chu an tidal ta a. Hnam hruaitute leh hotute hi a ti hmasa sa an ni lehnghâl a,” an rawn ti a.

³Chu thu chu ka han hriat chuan pawi ka ti êm êm a, ka silhfênte ka pawtthlêr a, ka sam leh khabehmul ka tikawlh a, hrilhhai deuhvin ka ṭhu ta reng a.

⁴Lungngai takin tlai hâlral thilhlan an hâl thlengin ka ṭhu a, saltâng kîr lehte khawsak pawlawh êm avânga Israel-te Pathian thu sawi hlau apiang chuan min rawn pan khâwm a.

⁵Tlai lam hâlral thilhlan an hlan lai chuan chaw ngheia ka ṭhu chu ka tho va, ka silhfên thlêrte chu ka la inbel zêl a, ṭawngṭaiin ka ṭhingṭhi a, LALPA, ka Pathian lamah chuan ka bân ka phar a.

⁶“Aw ka Pathian, i lam lo hawi hi ka zak a, ka hmai pawh a sen ṭâwn ṭâwn a ni. Kan sualna intiang khâwm chuan kan lu a khûm a, vân a tawng tâk hial hi.

⁷Kan pate hun aṭanga tûn thlengin i mite hi kan demawm hle a ni. Kan sual avângin kan lalte leh kan puithiamte nên hnam dang lalte kutah min pe a, an duh leh min talh a, an duh leh min rawk a, salahte min man a, vawiin thlengin kan mualpho let dêr a nih hi.

⁸“Aw LALPA kan Pathian, nangin min lainat a, heta awm chhunte hi bawih ata kan chhuah i phal a, rei lo tê chhûng chu i Hmun Thianghlimah hian min awmtîr a, mi tihlimin sala kan awm nun ngui chu mi tihharhsak hi.

⁹Bawih kan ni a; mahse, kan Pathian hian bawiha kan awm reng zawng a phal lo va ni. A zârah Persia lal chuan min khawngaih a, kan Pathian in sa tûrin min tiphûr a, a chhe tawh chu din leh min phalsak a, Judai ram leh Jerusalem-ah him takin min awmtîr ta a ni si a.

¹⁰“Aw Pathian, heti hi a ni si a, eng nge kan sawi tâk ang le? I thupêkte kan zâwm duh lo va,

¹¹i chhiahhlawh zâwlneiten, ‘In ram neih tûr chu a rama awmte bawlhhlawhna avâng leh thil tenawm tak tak an tih ṭhin avângin, a kil tâwp aṭanga a lehlam tâwp thlengin a bawlhhlawh a ni.

¹²Chuvângin, hêng mite nên hian inneih pawlh suh u, in fate pawh nupui pasalah innei suh se; inbe rem suh ula, an ṭhatna tûr eng lai mahin tihsak suh ang che u; tichuan, in chak ang a, rama thil ṭha haw chu in tlân ang a, in thlahten an rochung zêl thei ang’ tiin min hrilh min hrilh a ni.

¹³“Kan sualna avâng leh kan bawhchhiatna avânga hrem kan tuar tawh hnu pawh hian kan phu anga nasain, nang kan Pathian hian, min hrem lo tih kan hria, a ṭhen chu min la zuah a nih hi.

¹⁴I thupêk chu engtin nge kan ngaihthah theih tawh anga, hêng thil tenawm tiho nên hian kan inneih pawlh theih ang? Pakhat mah thi bâng awm lova min tichhe khawpin i thinur hial dâwn lâwm ni?

¹⁵Aw LALPA, Israel-te Pathian, nang chu i dik a; mahse, tlêm zawng min la zuah hrâm hi. Ngai teh, kan sual thupha kan chawi a nih hi, tu mah i hmaa ding tlâk kan awm lo,” ka ti a.