Read Mizo Lushai Nehemia 1 Bible Online

Nehemia 1 - Mizo Lushai bible

Nehemia 1

¹Hei hi Nehemia thiltih chanchin ziakna bu a ni. Lal Artazerzia lal kum sawmhnihna, Kislev thla chuan lal khawpui Susa khuaah ka awm a.

²Ka unau zînga mi Hanania leh mi dang ṭhenkhat Jerusalem aṭangin an lo kal a, Juda saltâng, Babulon aṭanga hâwng chanchin leh Jerusalem khaw chanchin ka lo zâwt a.

³“Judai rama haw, saltâng chhuakho chu an rethei hle mai; an vêla awm hnam dangte chuan an hmusit êm êm a ni. Jerusalem kulh bang pawh a chim chhe vek a, a kawngkhârte pawh a kâng zo,” an ti a.

⁴An thu ka hriat chuan ka ṭhu a, ka ṭap a, lungngai takin ni tam fe chu ka awm a, chaw ngheiin vân Pathian hnênah ka ṭawngṭai a.

⁵“Aw LALPA, Pathian ropui leh hlauhawm, nangmah hmangaihtu leh i thupêk zâwmtute tân i thuthlung chu i vuan tlat ṭhîn.

⁶Min rawn en la, ka lamah i beng han chhi teh; i chhiahhlawh, i mi Israel-te tân a chhun a zân i hnênah ka rawn ṭawngṭai hi. Keini Israel-te hian i lakah thil kan tisual a ni. Kei leh min thlahtute hi kan sual a ni.

⁷I lakah khawlo takin kan khawsa a, Mosia hnêna i hrilh, i thupêk te, i thuruatte, awm dân tûr i tih te kan zâwm duh lo va.

⁸I chhiahhlawh Mosia hetiang thu i hrilh kha hre reng ang che, ‘Khawlo taka in awm chuan hnam tinrêng zîngah ka tidarh ang che u.

⁹Ka hnêna in lo kîr duha, ka thupêkte in pawma in zawm chuan vân tâwp daihah pawh kal darh ula, chuta ṭang chuan ka hruai ang che u a, ka hming awmna tûra ka thlan ramah chuan ka hruai khâwm leh ang che u,’ i tih kha.

¹⁰Hêng i chhiahhlawhte hi i mite chu an ni, ropui taka i bân tha chaka i tlanchhuahte an nih kha.

¹¹Aw LALPA, i chhiahhlawh ṭawngṭaina hi lo ngaithla teh, nangmah ṭihtu i chhiahhlawhte dîlna hi lo ngaihven ang che. Vawiinah pawh hian lal chuan min lo khawngaih teh se,” ka ti a. Chûng lai chuan lal no petu ka ni.