Read Mizo Lushai Nehemia 12 Bible Online

Nehemia 12 - Mizo Lushai bible

Nehemia 12

¹Sealtiela fapa Zerubabela leh puithiam lalber Jesua ruala saltâng haw vete chu hêng hi an ni: Puithiamho: Seraia, Jeremia, Ezra,

²Amaria, Maluka, Hatusa,

³Sekania, Rehuma, Meremota,

⁴Ido-a, Ginethoia, Abija,

⁵Mijamina, Maadia, Bilga,

⁶Semaia, Joiariba, Jedaia,

⁷Salua, Amoka, Hilkia leh Jedaia. Hêngho hi Jesua hun laia puithiam thlah hrang hotute chu an ni.

⁸Levia chite: Tempula inkhâwmnaah lâwmthu sawina hla hruaitu Levia chite chu hêng hi an ni: Jesua, Binuia, Kadmiela, Serebia, Juda leh Matania te hi.

⁹Hêngho hi zaipâwl hla sak lo chhâwn ṭhîntute chu an ni: Bakbukia te leh Unoa te leh an Levia chipui te.

¹⁰Jesua fa chu Joiakima a ni, chu mi fa chu Eliasiba a ni, ani chu Joiada pa a ni.

¹¹Joiada fa chu Jonathana, Jadua pa a ni.

¹²Joiakima hun laia puithiam thlah hrang hrang hotute chu hêng hi an ni: Seraia thlah zînga hotu chu Meraria a ni a, Jeremia thlah zînga hotu chu Hanania a ni.

¹³Ezra thlah zînga hotu chu Mesulama a ni a, Amaria thlah zînga hotu chu Johanana a ni.

¹⁴Maluka thlah zînga hotu chu Jonathana a ni a, Sebania thlah zînga hotu chu Josefa a ni.

¹⁵Harima thlah zînga hotu chu Adna a ni a, Meraiota thlah zînga hotu chu Helkaia a ni.

¹⁶Ido-a thlah zînga hotu chu Zekaria a ni a, Ginethona thlah zînga hotu chu Mesulama a ni.

¹⁷Abija thlah zînga hotu chu Zikria a ni a, Miniamina thlah zînga hotu chu Moadia thlah zînga hotu chu Piltaia a ni.

¹⁸Bilga thlah zînga hotu chu Samua a ni a, Semaia thlah zînga hotu chu Jehonathana a ni.

¹⁹Joiariba thlah zînga hotu chu Matenaia a ni a, Jedaia thlah zînga hotu chu Uzia a ni.

²⁰Salaia thlah zînga hotu chu Kalaia a ni a, Amoka thlah zînga hotu chu Ebera a ni.

²¹Hilkia thlah zînga hotu chu Hasabia a ni a, Jedaia thlah zînga hotu chu Nethanela a ni.

²²Hêng puithiam lalber Eliasiba te, Joiada te, Johanana te, Jadua te hun lai hian Levia chite leh puithiamhote chu an thlahtute chhui chhuaha, chhinchhiah fel a ni. Daria kha Persia lal a lo nih kha chuan ziak chhuah fel a ni tawh.

²³Eliasiba tupa Johanana hun aṭang chauhvin Levia chite chu an chhûngkaw hotu hming chhui chhuaha ziak fel a ni.

²⁴Hasabia te, Serebia te, Jesua te, Binuia te leh Kadmiela te kaihhruaiin Levia chite hi a pâwl pâwlin an inṭhen a, ṭum khatah pâwl hnihin Pathian fak hla an sa ṭhîn, pâwl khatin an sa phawt a, pâwl dangin an lo chhâwn ṭhîn. Lal Davida remruat ang khân an la ti zêl a ni.

²⁵Hêngho hi Tempul pulis hotu, Tempul kudâm leh kawngkhâr vêngtute chu an ni: Matania te, Bakbukia te, Obadia te, Mesulama te, Talmona leh Akuba te.

²⁶Jesua fapa Joiakima, Jozadaka tupa te, Ramawptu Nehemia te, puithiam leh lehkhathiam Ezra te hun laiin hêng mite hian hna an thawk ṭan a ni.

²⁷Jerusalem khaw kulh bang siam zawh an lawm dâwn chuan dârbenthek te, perhkhuang te nêna lâwm hla sa tûrin Levia chite chu khawia awm pawh an chah khâwm a.

²⁸Levia chi, hla sa mi, Jerusalem leh a chhehvêla awmte leh Netofa khawpui leh a chhehvêla awmte chu an lo pung khâwm a.

²⁹Beth-gilgal aṭang te, Geba aṭang te, Asmavet khua aṭang te pawhin an lo kal a.

³⁰Puithiamte leh Levia chite chu an inthian thianghlim a, mipui te leh kulh bang te pawh an thian thianghlim a.

³¹Judai rama hotute chu kulh bang chung zâwlah chuan ka hruai a, pâwl hnihah an inṭhen a. Khawpui kulh bang chung zâwlah chuan Pathian fak chungin an kal kual a. Pâwl khat chu bang chung zâwla kalin Bawlhhlawh Kawngkhâr lam, ding lam panin an kal a.

³²Zaipâwlin hma an hruai a, Hosaia hovin Judai ram hotu zâtve chuan an zui a.

³³Hêng puithiam - Azaria te, Ezra te, Mesulama te,

³⁴Juda te, Benjamina te, Semaia te leh Jeremia te hian an zui a.

³⁵Tawtawrâwt nên hêng puithiam fapate hian an zui: Jonathana fapa Zekaria, Semaia tupa (Ani hi a pute chu Matania te, Mikaia te leh Zakura te. Asafa thlah an ni) chuan hma a hruai a,

³⁶a chipui Semaia te, Azarela te, Milalaia te, Gilalaia te, Maaia te, Nethanela te, Juda te, Hanania te chuan an zui a. Pathian mi, lal Davida tum ṭhin ang perhkhuang te kha an keng bawk a, lehkhathiam Ezra chuan hma a hruai bawk a.

³⁷Tuikhur Kawngkhâr an thlen chuan Davida khaw chhohna kailâwnah an chho va, Davida in an kal pêl a, khawpui chhak lam dep Meipui Kawngka bulah chuan an lo kal kual a.

³⁸Pâwl dang, lâwm hla saho chu kulh bang chung zâwlah chuan vei lam panin an kal a. Mipui pung khâwm zâtve dangte nên chuan kan zui a. Meichhehna In sâng kan kal pêl a, kulh bang chhah kan thleng a,

³⁹Efraim Kawngkhâr te, Jesina Kawngkhâr te, Sangha Kawngkhâr te, Hananela in sâng te, Hamea in sâng te, Berâm Kawngkhâr te kan kal pêl a, Tempul bul kawngkhâr kan thleng a.

⁴⁰Tichuan, Pathian faka kalhote chu Tempul tualah kan intâwk khâwm ta a. Ka bula kal hruaitute bâkah

⁴¹hêng mite hi ka ruala kal vete chu an ni: puithiam rual tawtawrâwt hâmtute chu Eliakima, Maaseia, Miniamina, Mikaia, Elioenaia, Zekaria leh Hanania.

⁴²Hêng mite hian an rawn dawt a: Maaseia, Semaia, Eleazara, Uzia, Jehohanana, Malkija, Elama leh Ezera. Zaipâwl Jezrahia ho chuan an râwl tâwpin hla an sa a.

⁴³Chumi ni chuan thil tam tak kan hlân a, Pathianin min tihlim a, mipui chu an lâwm êm êm a ni. Hmeichhia leh naupangte pawh a lawmnaah hian an tel a, an thâwm chu hla tak aṭang pawhin a hriat a ni.

⁴⁴Tempul thawhlâwm te, buh leh thei hmin hmasa sâwma pakhat te dah khâwma enkawltu tûrte kan ruat bawk a. Dânin a phût ang, puithiamte leh Levia chite hlawh tûr khaw tina lo leh huan aṭanga khawntu atân chûng mite chu ruat an ni nghâl a. Judai rama mite chu puithiam leh Levia chite chungah an lâwm hle a ni,

⁴⁵inthen thianghlim hnate leh Pathian thupêk anga tih tûr dang taima taka an tih ṭhîn avângin. Tempul zaipâwl te leh Tempul pulis te pawhin lal Davida leh a fapa Solomona dân siam ang khân engkim an ti thlap zêl a.

⁴⁶Hmânlai ata lal Davida leh thil tum thiam Asafa hun aṭang tawh khân thil tum thiam mite hian Tempula lâwmthu sawina leh fakna hla sakte hi an hruai ṭhîn a ni.

⁴⁷Zerubabela leh Nehemia hun aṭangin mipuiin Tempul zaipâwl leh Tempul pulis te hlawh tûr ni tin thawhlâwm an pe ṭhîn, Levia chite tân pawh thilhlan an pe ṭhîn; Levia chite chuan puithiamte chu thilhlan an sem ve ṭhîn.