Read Mizo Lushai Nehemia 4 Bible Online

Nehemia 4 - Mizo Lushai bible

Nehemia 4

¹Sanbalatan kulh siam kan tum a hriat chuan a thin a rim nasa mai a, Juda-te chu min sâwt ta a.

²A thawhpuite leh Samaria khuaa sipaite hnênah, “Hêng Juda-ho, pa pawr tak tak hian eng nge maw an hriata Jerusalem khawpui din leh an tum le? Inthawina hlânin ni khat thil thu-ah siam zawh mai an tum em ni? A chim chhe vûm, kâng nek tawh lungte chu siam ṭhat leh theih an inbeisei em ni le!” a ti a.

³Tobia chu a bulah a ding a, “Eng ang kulh bang nge an din theih ang? Sihal pawh lâwn se a chim mai ang!” a lo ti ve a.

⁴Kei chu ka ṭawngṭai ta a, “Aw Pathian, hêng mite min deusawhzia hi lo ngaithla teh, min hmuhsitna chu an chungah lêt teh se. An neih zawng zawng miin rawk sela; ram dang daihah sal atân man ni rawh se.

⁵An thil sual tih hi theihnghilh suh la, an sualna pawh hai suh ang che; kulh bang siamṭhatute hmaah an chêksawlh hle che kha,” ka ti a.

⁶Kulh bang siam ṭhat hna chu ngawrh takin kan thawk a, a zâtve dâwn laia sâng chu kan zo ta mai a.

⁷Sanbalata te, Tobia te, Arabia mi te, Amon mi te leh Asdod mi te chuan Jerusalem kulh chu kan siam ṭha sâwt hle a, a bal chhe laite chu kan thawm leh vek tawh tih an hriat chuan an thinur hle a.

⁸Jerusalem-a lo kala, min rawn beiha, min tihbuai tumin an thurual a.

⁹Pathian hnênah kan ṭawngṭai a, a chhûn a zâna vêngtu tûr kan insiam a.

¹⁰Judai rama mite chuan hla an phuah a, “Rit tak tak kan phur a, kan hah zo ta, A chhe nawi paih tûr a tam êm a, Bang pawh kan rem hman lo!” tiin.

¹¹Kan hmêlmate lah chuan min zuam hle a, “Kan han beiha kan thaha, an hna kan tihtâwpsak hma chu eng mah an hre lo vang, hmuh pawh min hmu lo vang,” an ti a.

¹²Nimahsela, an zînga Juda awm vete chuan an thil tum chu a rûkin min rawn hrilh zêl a.

¹³Chuvângin, mipuite chu khandaih te, fei te, thal te ka pe a; a chi chiin, bang la rem zawh loh bulah vêngtu atân ka sem darh a.

¹⁴Mipuite chu an thlaphâng hle tih ka hriat chuan an hruaitute leh an hotute nên an hnênah, “Anniho hi hlau suh u; LALPA ropuizia leh a hlauhawmzia hre reng rawh u. In unaute hi vêng ula, in nupui fanau leh in in leh lo tân ṭang rawh u,” ka ti a.

¹⁵Kan hmêlmate chuan an thil tih tum chu kan lo hria tih an hriat chuan Pathianin an thiltum chu a tibahlah a ni tih an hria a; keini chuan kan za-in kulh bang siam chu kan chhunzawm leh ta sauh sauh va.

¹⁶Chuta chin chu ka mite zâtve chuan an thawk a, a zâtve chuan fei te, phaw te, thal te an keng a; awmphaw te an ha a. Hnam hruaitute chuan kulh bang siamtute chu theihtâwp chhuahin an pui zêl bawk a.

¹⁷Hnathawktute pawh chuan khingkhatin hna an thawk a, khingkhatin hriam an keng a.

¹⁸Tu pawhin, khandaih a kawm nên an pai ṭheuh va. Tawtawrâwtpu, râlkhêl hâmtu tûr chu ka bulah a awm a.

¹⁹Mipuite chu an hruaitute leh hotute nên, “Kan hna thawh hi hmun hrang hranga thawk kan ni a, kan thawhna lai bang a inhlat hle hlawm a.

²⁰Chuvângin, tawtawrâwt ri in hriat chuan ka awmnaah lo tlân khâwm ang che u, kan Pathian chuan râl chu min dopui dâwn a ni,” tiin ka hrilh a.

²¹Ni tin, khâwvâr aṭanga arsi lan thlengin a zâtve chuan hna kan thawk a, a zâtve chuan fei nên min vêng a.

²²Hnathawk hotute hnênah chuan, “Nangni leh in chhiahhlawhte chu Jerusalem khaw chhûngah riak ve mai ula a ṭha ang,” ka ti a.

²³Ka ṭhian te, ka ṭhuihruai te, ka chhiahhlawh te, kei ngei pawhin, zânah pawh kawr kan hlîp lo va, râlthuam kan dah hek lo.