Read Mizo Lushai Nehemia 5 Bible Online

Nehemia 5 - Mizo Lushai bible

Nehemia 5

¹Rei fe hnuah chuan mipa pawh, hmeichhia pawh, an Juda-puite chungah an vui ta a.

²“Kan chhûng kan rual a, rilṭâma kan thih loh nân ei tûr kan duh a ni,” an ti a.

³A ṭhen chuan, “Kan lo te, kan grep huan te, kan in te, rilṭâma thih ai chuan kan lo ineiba tawh a ni,” an ti a.

⁴A ṭhen chuan, “Kan lo te, grep huan te dahkhamin lal chhiah pêk tûr tangka kan pûk a,

⁵Juda mi ve bawk kan ni si a, kan fate pawh Juda dang fate ang bawk an ni lâwm ni? Nimahsela, hei kan fate chu bawihah kan tântîr a, kan fanute phei chu bawihah kan hralh dêr tawh a ni. Kan lote leh grep huante min neihsak zo tawh a, kan che hlei thei ta hauh lo mai,” an ti a.

⁶An vui thu ka hriatin ka thinur hle a,

⁷Ka rilru ka siam a, mipui hruaitute leh an hotute chu ka khak ta a, “In unaute ngei in lo tiduhdah hle a lo nih hi,” ka ti a. Chumi chungchâng chu ngaihtuah tûrin vântlâng ka ko khâwm a.

⁸“Kan theih ang angin kan Juda-pui, hnam dang hnêna inhralh hialte chu tlan chhuah kan tum hrâm ṭhîn a. In unaute hi anmahni Juda-puite hnênah in inhralhtîr ta hial a nih hi,” ka ti a. Hruaitute chuan min chhâng thei lo va, an ngawi ta reng a.

⁹“In thil tih hi a dik hauh lo, Pathian ṭih ula, thil dik ti rawh u. Tichuan, kan hmêlma, Jentail-ho hian min hmusit lo vang.

¹⁰Kei pawhin mite chu pawisa leh buhte ka lo pûktîr tawh ṭhîn a; chutiangin ka ṭhuihruaite pawhin an ti ṭhîn. Kan leibate chu i ngaidam teh ang u.

¹¹An ba zawng zawng, tangka te, buh te, uain te, oliv hriak te ngaidam vek ila, an lo te, an grep huante leh an oliv hmunte chu pe kîr leh vek rawh u,” ka ti a.

¹²Hruaitute chuan, “I sawi ang chuan kan ti ang e, an thil chu kan pe kîr ang a, an ba chu kan ngaidam ang,” an ti a. Puithiamho chu ka ko va, an hmaah chuan hruaitute chu an sawi ang chuan thu ka tiamtîr a.

¹³Ka puan ven chu ka thing thla a. “In thutiam anga ti duh lo chu Pathianin a thing ang a, a inte leh a neih zawng zawng a thin thlâksak ve ang a, eng mah a nei lo vang,” ka ti a. Chuta awm ve zawng zawng chuan, “Amen” an ti a. LALPA an fak a, hruaitute chuan an tiam ang chuan an ti ta a.

¹⁴Lal Artazerzia lal kum sawmhnihna aṭanga kum sawmthum leh pahnihna, Judai ram awptua kum sâwm leh kum hnih ka ṭan chhûng chuan ka chhûngte nên Ramawptu ei tûr ang kan ei lo.

¹⁵Ka hmaa Ramawptute chu mipui tân an rit hle a, ni tin, tangka sawmli man chaw leh uain an phût ṭhîn a; an chhiahhlawhte pawh rit tham tak an ni. Pathian ka zah avângin chutiang chu ka ti ve lo.

¹⁶Kulh bang chu theihtâwp chhuahin kan siam zêl a, ram lei ve zai pawh ka rêl hman lo. Ka hnuaia thawktute pawhin kulh bang siam ngawt an ngaihtuah a ni.

¹⁷Kan vêla mi, kan mikhual ṭhînte bâkah, Juda hruaitute leh mi dang mi za leh sawmnga vêl chu chaw ka eipui ziah ṭhîn.

¹⁸Ni tin bâwngpa pakhat leh berâm thlan chhuah paruk kan talh a ngai a, ârte pawh min talhsak ṭhîn; ni sâwm danah uain chi tinrêng kan chhawp bawk ṭhîn; mipui tân a rih êm avângin Ramawptu phût theih chin chu ka phût ve ngai lo.

¹⁹“Aw ka Pathian, he mite tâna ka thiltih zawng zawng hi ka chan ṭhat nân hre reng ang che,” ka ti a.