Read Mizo Lushai Nehemia 7 Bible Online

Nehemia 7 - Mizo Lushai bible

Nehemia 7

¹Kulh bang chu an siam zo va, kulh kawngkhârte pawh chu an vuah fel vek a, Tempul pulis te, zaipâwl te leh Levia chi te chu an tih tûr an ruat fel vek a.

²Jerusalem khaw awptu tûr mi pahnih ka ruat a, pakhat chu ka nau Hanania a ni a, pakhat chu sipai pâwl hotu Hananaia, tu ma tluk loh, mi rin tlâk tak, Pathian ṭih mi a ni.

³Jerusalem kulh kawngkhârte chu zîngah, ni chhuah hnu chauhva hawng tûrin ka ti a; tlaiah pawh ni tlâk, vêngtuho ṭina khâr tûrin ka ti a. Jerusalem khuaa mi ṭhenkhat pawh kawngkhâr vên bîk nei tûr leh khawlai vênga fang ṭhîntu ruat tûrin ka ti bawk a.

⁴Jerusalem hi khaw zau tak a ni a, mi an tam lo va, in pawh an la sa ṭan leh lo.

⁵Mipui chu an hruaitute leh an hotute nên ka khâwm a, an chhûngkaw chanchin ziakna chhui feltîr tûrin Pathianin min ti a. Saltâng chhuak hmasate hming ziakna ka zawng chhuak a, hei hi ka hmuh dân chu a ni.

⁶Saltâng tam tak chu Babulon bial aṭangin Jerusalem leh Judai ramah mahni awmna ṭhin khuaah an haw a. An chhûngkuain lal Nebukadnezaran sala a man aṭang khân Babulon-ah an tâng reng a ni.

⁷An hruaitute chu Zerubabela te, Jesua te, Nehemia te, Azaria te, Raamia te, Nahamania te, Mordekaia te, Bilsana te, Mispereta te, Bigvaia te, Nehuma te leh Baana te an ni. Israel mi, chi hrang hrang lo kîr zât chu hetiang hi a ni:

⁸Paros chi aṭangin mi sânghnih leh za leh sawmsarih leh pahnih.

⁹Sefatia chi aṭangin mi zathum leh sawmsarih leh pahnih.

¹⁰Ara chi aṭangin mi zaruk leh sawmnga leh pahnih,

¹¹Pahat-moab chi, Jesua leh Joaba thlah aṭangin mi sânghnih leh zariat leh sâwm leh pariat.

¹²Elam chi aṭangin mi sângkhat leh zahnih leh sawmnga leh pali.

¹³Zatu chi aṭangin mi zariat leh sawmli leh panga.

¹⁴Zakai chi aṭangin mi zasarih leh sawmruk.

¹⁵Binui chi aṭangin mi zaruk leh sawmli leh pariat.

¹⁶Bebai chi aṭangin mi zaruk leh sawmhnih leh pariat.

¹⁷Azgad chi aṭangin mi sânghnih leh zathum leh sawmhnih leh pahnih.

¹⁸Adonikam chi aṭangin mi zaruk leh sawmruk leh pasarih.

¹⁹Bigvai chi aṭangin mi sânghnih leh sawmruk leh pasarih.

²⁰Adin chi aṭangin mi zaruk leh sawmnga leh panga.

²¹Ater (Hezekia an ti bawk) chi aṭangin mi sawmkua leh pariat.

²²Hasum chi aṭangin mi zathum leh sawmhnih leh pariat.

²³Bezai chi aṭangin mi zathum leh sawmhnih leh pali.

²⁴Harif chi aṭangin mi za leh sâwm leh pahnih.

²⁵Gibeon chi aṭangin mi sawmkua leh panga.

²⁶Bethlehem leh Netofa khaw chhuak mi za leh sawmriat leh pariat.

²⁷Anathot khaw chhuak mi za leh sawmhnih leh pariat.

²⁸Beth-azmavet khaw chhuak mi sawmli leh pahnih.

²⁹Kiriat-jearim te, Kafira te leh Beerot khaw chhuak mi zasarih leh sawmli leh pathum.

³⁰Rama leh Geba khaw chhuak mi zaruk leh sawmhnih leh pakhat.

³¹Mikmas khaw chhuak mi za leh sawmhnih leh pahnih.

³²Bethel leh Ai khaw chhuak mi za leh sawmhnih leh pathum.

³³Nebo khaw dang chhuak mi sawmnga leh pahnih.

³⁴Elam khaw dang chhuak mi sângkhat leh zahnih leh sawmnga leh pali.

³⁵Harim khaw chhuak mi zathum leh sawmhnih.

³⁶Jeriko khaw chhuak mi zathum leh sawmli leh panga.

³⁷Lod te, Hadid te leh Ono khaw chhuak mi zasarih leh sawmhnih leh pakhat.

³⁸Sena khaw chhuak mi sângthum leh zakua leh sawmthum.

³⁹Puithiamho lo kîr vete chu heti hi an ni: Jesua chhûng, Jedaia thlah mi zakua leh sawmsarih leh pathum.

⁴⁰Imera thlahte mi sângkhat leh sawmnga leh pahnih.

⁴¹Pasura thlahte mi sângkhat leh zahnih leh sawmli leh pasarih.

⁴²Harima thlahte mi sângkhat leh sâwm leh pasarih.

⁴³Levia chi saltâng lo kîrte chu heti hi an ni Jesua te, Kadmiela te, Hodavia thlahte, mi sawmsarih leh pali.

⁴⁴Tempula hla sa mi: Asafa thlahte mi za leh sawmli leh pariat.

⁴⁵Tempul pulis: Saluma te, Atera te, Talmona te, Akuba te, Hatita te leh Sobaia te thlah mi za leh sawmthum leh pariat.

⁴⁶Tempul enkawltute: Ziha te, Hasufa te, Tabaota te,

⁴⁷Kerosa te, Sia te, Padona te,

⁴⁸Lebana te, Hagaba te, Salmaia te,

⁴⁹Hanana te, Gidela te, Gahara te,

⁵⁰Reaia te, Rezina te, Nekoda te,

⁵¹Gazama te, Uza te, Pasea te,

⁵²Besaia te, Meunima te, Nefusesima te,

⁵³Bakbuka te, Hakufa te, Harhura te,

⁵⁴Bazlita te, Mehida te, Harsa te,

⁵⁵Barkosa te, Sisera te, Tema te,

⁵⁶Nezia te leh Hatifa te hi an ni.

⁵⁷Solomona chhiahhlawh thlahte: Sotaia te, Sofereta te, Perida te,

⁵⁸Jaala te, Darkona te, Gidela te,

⁵⁹Sefatia te, Hatila te, Pokeret-hazebaima te, Amona te hi an ni.

⁶⁰Tempul enkawltu leh Solomona chhiahhlawh, saltâng haw zawng zawng mi zathum leh sawmkua leh pahnih an ni.

⁶¹Tel-mela khua aṭang te, Tel-harsa khua aṭang te, Kerub khua aṭang te, Adoa khua aṭang te, Imer khua aṭang tea lo kal chho vete chu heti hi an ni. Hêngho hian Israel thlah an nihna chiang leh an chi leh kuang an chhui thei lo:

⁶²Chûng chu Delaia thlah te, Tobia thlah te, Nekoda thlah te, an vaiin mi zaruk leh sawmli leh pahnih.

⁶³Hêng puithiamho hian an thlahtu tak an chhui thei lo: Hobaia fate, Hakosa fate, Barzilaia fate. Puithiam Barzilaia fate thlahtu Barzilaia hian Gilead mi Barzilai hmeichhia a nei a, a puzawn chhûng hnam hming chu an pu zawm ta a ni.

⁶⁴An thlahtu tak an chhui chhuah theih loh avângin puithiamah pawm an ni ta lo va.

⁶⁵Juda zînga an hotu ber, Tirsatha chuan, “Urim leh Thumim kawltu puithiam a awm hma chu Pathian hnêna thilhlan hi lo ei ve suh u,” a ti a.

⁶⁶Saltâng haw chu an vaiin mi sîngli leh sânghnih leh zathum leh sawmruk an ni.

⁶⁷An chhiahhlawh, mipa leh hmeichhia sângsarih leh zathum leh sawmthum leh pasarih. Hla sa mi, mipa leh hmeichhia zahnih leh sawmli leh panga;

⁶⁸Sakawr zasarih leh sawmthum leh paruk; sakawr puakphur zahnih leh sawmli leh panga;

⁶⁹sanghâwngsei zali leh sawmthum leh panga, sabengtung sângruk leh zasarih leh sawmhnih an rawn hruai bawk.

⁷⁰Hnam tin hruaitute chuan Tempul sakna thawhlâwm an pe ṭheuh va. An Tirsatha chuan rangkachak kg. riat, maihûn sawmnga, puithiam kawr tûr puan zanga leh sawmthum a pe a.

⁷¹Israel hnam hruaitute chuan rangkachak kg. za leh sawmruk leh pariat, tangkarua kg. Sângkhat leh zahnih leh sawmnga an pe a.

⁷²Mipuite chuan: Rangkachak kg. za leh sawmruk leh pariat, tangkarua kg. za leh sawmli, puithiam kawr tûr puan sawmruk leh pasarih an pe bawk.

⁷³Puithiam te, Levia chi te, Tempul pulis te, hla sa mite leh mi dang leh Tempul enkawltute - Israel mi zawng zawng chuan Judai ram khuaahte chuan awmhmun an bêngbel ta a.