Read Mizo Lushai Nehemia 8 Bible Online

Nehemia 8 - Mizo Lushai bible

Nehemia 8

¹Thla sarihnaah chuan Israel mite chu an awmna tûr khuaah an awm fel hman a; Jerusalem khaw Tuikhur Kawngkhâr bul tualzâwl laiah chuan, chumi thla, ni khat ni chuan an lo pung khâwm a; Israel te zawm tûr, LALPA dân, Mosia hnêna pêk chu hre tak puithiam Ezra chu an ngên a, Dân bu chu an lâktîr a.

²Ezra chuan mipui punkhâwmnaah, mipa leh hmeichhia, naupangte pawh, a hrethiam pha âwm chin hmaah chuan Dân bu chu a rawn keng a.

³Kawngkhâr bul tualzâwl zau laiah chuan khawvâr aṭangin chhûn lai thlengin, Dân bu chu a chhiar a, ngun takin an ngaithla ṭhuap a.

⁴An thingphel dawhkân siamah chuan Dânhremi Ezra chu a ding a, a ding lamah Matithia te, Sema te, Anaia te, Uria te, Hilkia te, Maaseia te an ding a; a vei lamah Pedaia te, Misaela te, Malkija te, Hasuma te, Hasbadana te, Zekaria te, Mesulama te an ding a.

⁵Ezra dinna chu a sâng bîk a, mi zawng zawngin an hmu thei a. Dân bu chu a han phelh chuan mipui chu an ding vek a.

⁶Ezra chuan LALPA, Pathian ropui chu a fak a, mipui chuan, “Amen, Amen,” tiin an lo chhâwn a, an kûn a, LALPA hmaah chuan an bawkkhup a.

⁷An tho va, mahni hmun ṭheuhvah an ding a, Levia chi Jesua te, Bania te, Serebia te, Jamina te, Akuba te, Sebethaia te, Hodia te, Maaseia te, Kelita te, Azaria te, Jozabada te, Hanana te, Pelaia te chuan an lo sawi fiah zêl a.

⁸Dân bu thu chu an tualṭawngin an let chawp a, mipui hriat theih tûrin an sawi fiah a.

⁹An tih tûra Dân bu-in a phût chu mipuiin an han hriat chuan an rilru a khawih hle a, an ṭap ta hlawm a. Tichuan, an Tirsatha Nehemia te, puithiam leh Dânhremi Ezra te, Dân thu sawifiahtu Levia chite chuan mite hnênah, “Vawiin hi LALPA, in Pathianni thianghlim a ni, in ṭap tûr a ni lo va, in ngui tûr a ni hek lo.

¹⁰Haw ula, ruai ṭheh rawh u. In uain leh chaw chu a nei ve lote eipui ang che u. Vawiin hi kan LALPA tân ni serh a ni a, ngui suh u, LALPA-a in lâwmna chu in chakna a ni si a,” an ti a.

¹¹Levia chite chuan mipui chu, “Vawiin ni thianghlim angah hian ṭap teh suh u, a ngui pawh ngui hek suh u,” tiin mipui ṭap chu an thlêm a.

¹²Mite chu an in lamah an haw a, hlim takin an eiin an in a, mi dangte pawh an neih ang chu an pe a, an hnêna Dân thu an chhiar kha an hriat avângin an lâwm a ni.

¹³A tûkah chuan hnam tin hruaitu te, puithiam te leh Levia chi te chu Dânhremi Ezra hnênah Dân thu zir tûrin an kal a.

¹⁴LALPA chuan Mosia hmangin Israel-te zawm tûr Dân a pe a, chu Dân bu-ah chuan Bâwkte kût chhûng chhâwlbûkah an awm ṭhîn tûr a ni tih an hmu chhuak a.

¹⁵Chuvâng chuan, Jerusalem leh khaw dang zawng zawngah hetiang hian thu an pe a; “Tlângahte kal ula, oliv zâr te, umkhal zâr te, lenhmui zâr te, tumkau te leh thingbuk chhah te sât ula, dân bu-a chuang angin chhâwlbûk siam rawh u,” an ti a.

¹⁶Mite chuan chhâwl chu an sât a, an in chung zâwlah te, an tualah te, Tempul tualah te, khawlai zau laiah Tuikhur Kawngkhâr leh Efraim Kawngkhâr bulah te chuan chhâwlbûk an sa ta a.

¹⁷Saltâng lo haw zawng zawng chuan bûk an sa a, tah chuan an riak a, Nuna fapa Josua thih hnu kha chuan hetianga an tih hmasak ber ṭum a ni a; an tha a thovin an phûr hle a.

¹⁸Kût ṭan tirh ni aṭanga a tâwp ni thlengin ni tin Dân bu-a mi an chhiar ziah a ni. Ni sarih chhûng chu kût an hmang a, a ni riat ni chuan inkhâwm urhsûn tak neiin kût chu an ṭiak ṭhîn.