Read Mizo Lushai Nehemia 9 Bible Online

Nehemia 9 - Mizo Lushai bible

Nehemia 9

¹Chumi thla, ni sawmhnih leh pali ni chuan Israel mite chu an kal khâwm a, saiip puan sinin chaw an nghei a, an lu-ah lei an phul a,

²Israel mite chu hnam dang lakah an inthiarfihlîm tawh a, an ding a, anmahni sualna leh an thlahtute khawlohna avângin thupha an chawi a.

³LALPA, an Pathian Dân chu dârkâr thum vêl an chhiar a, dârkâr thum dang an sual thupha chawi nân an hmang a, LALPA an Pathian chu chibai an bûk a.

⁴Levia chite tâna an dawhkân siamah chuan Jesua te Bania te Kadmiela te Sebania te Bunia te Serebia te Bania te Kenania te pawh an ding ve a. LALPA, an Pathian hnênah ring takin an au va.

⁵Levia chi Jesua te, Kadmiela te, Bania te, Hasabneia te, Serebia te, Hodia te, Sebania te, Pethahia te chuan mipui chu Pathian be tûrin an sâwm a: “Ding ula, LALPA, in Pathian chu kumkhuain fak rawh u. Fak sên rual ni lo mah se, a hming ropui chu mi tinin fak rawh se,” an ti a.

⁶Israel mite chu hetiang hian an ṭawngṭai a: “Aw LALPA, nang chauh hi LALPA chu i ni, Vânte leh a chhûnga awm zawng zawngte, Lei leh tuifinriatte leh a chhûnga awm zawng zawng te hi i siam vek a ni; An za-in i vawng ṭha ṭhîn a. Vâna awmhote chuan chibai an bûk ṭhîn che a.

⁷Aw LALPA, nang Pathian chuan Abrama i ko va, Kaldai ram Ur khua ata i hruai chhuak a, A hmingah Abrahama i sa ta a.

⁸A zui tlat che avângin thuthlung i siamsak ta a, Kanan ram chu pêk i tiam a, Hit mi leh Amor mite awmna ram Periz-ho te, Jebus-ho te, Girgas-ho te awmna ram chu, A thlahte awm nân i pêk kha. I rinawm a, i thutiam i hlen ta a.

⁹Min thlahtute Aigupta rama an retheihzia i hria a, Tuipui Senah an mangang au i ngaihthlâk kha.

¹⁰An lal leh hotute chungah, an ram chungah nên Thil mak tak tak i ti ṭeuh va, I mite an tihduhdahzia i hria a ni, Tûn thlengin i hmingthan phah ta a ni.

¹¹I mite tân tuipui laiah kawng i siam a, Leichârah i hruai kai kha. Ûmtute chu tui thûkah an pil a, Tuipui fâwn vêla lungtum pil ang vang vang an ni.

¹²Chhûnah chhûm dingin i hruai a, Zânah mei êngin.

¹³Vân ata i lo chhuk a, Sinai tlângah khân, I mite chu i rawn bia a, Awm dân tûr thuruat ṭha te, Thupêk leh Dân nghet te i pe.

¹⁴Sabat ni chu serh ṭha tûrin i ti a, I chhiahhlawh Mosia hmangin i dân chu i hrilh.

¹⁵An rilṭâm khân vân chaw i pe a, An tuihâl khân lungpui ata in tûr i pe. An hnêna pêk i tiam ram chu nei tûrin thu i pêk kha.

¹⁶Min thlahtute chu an inchhuang a, an luhlul hle, I thupêkte chu an awih duh ta lo va.

¹⁷I thu an awih lo va, thil mak i tihsakte an hre duh lo, Luhlul an chhuah a, an hel ta a. Aigupta bawiha hruai lût leh tûr hotu an thlang. Lainatnaa khat thinnel i ni a, I ngaidam peih zêl a, i thlahthlam lo.

¹⁸Milem, bâwngno lem an siam a, “Hei hi Aigupta ram ata min hruaichhuaktu, Thil mak tam tak min tihsaktu kha a ni,” an ti. Aw LALPA, an va tinawmnah che êm!

¹⁹Ngil i neih êm avângin Thlalêrah khân i thlahthlam lo. Chhûn leh zâna hruai ṭhîntu chhûm ding leh mei chu i la bo lo.

²⁰Dawhthei takin i zirtîr hrâm hrâm a, Mana-in i châwm a, in tûr i pe bawk a.

²¹Kum sawmli chhûng thlalêrah khân An mamawh zawng zawng i tumsak a, An silhfênte lah a chul thei lo, An keruh pawh a na ngai lo.

²²Hnamte i hnehtîr a, an ram te i pe a, Hesbon lal Sihona ram an neihsak a, Basan lal Oga ram pawh an nei.

²³Vâna arsi zâtin an fate i tipung a, An pate hnêna pêk i tiam ram chu An la a, an awm ta a.

²⁴Kanan ram chu an la a, Chûnga awmte chu i tihtlâwmsak a, Kanan mi leh an lalte chu An duh tâwkin i sawisaktîr ta a.

²⁵I mite chuan kulh nei khuate an la a, Ram ṭha ṭha chu an nei ta a, In nuam tak takte chu an luah zêl a. Tuizêm siam sa an ring a, Thei tinrêng, oliv leh grep rah sa an tlân. An duh tâwk tâwk an ei, an sa a mâm thul mai. I thilpêk, thil ṭhate chu an tlân a ni.

²⁶I mite chuan i thu an awih duh ta lo va, An hel a, i Dân an pawisa lo. I lam hawi tûra fuihtu zâwlneite chu An that zêl a, an thamlo hle reng che.

²⁷Chuvâng chuan, an hmêlmate kutah i pe a, An lo timangang êm êm a, An rawn au che a, vân aṭangin i lo chhâng ṭhîn, I khawngaih a, hruaitute i pe a, Hmêlma lakah an vêng him ṭhîn.

²⁸Râlmuanga an awm chuan thil sual an ti leh mai ṭhîn a, An hmêlmate kutah i pe leh ṭhîn. An sima ṭanpui an dîl che chuan I lo khawngaih a, vân aṭangin i lo ngaithla a, I chhan chhuak leh mai ṭhîn.

²⁹I Dânte chu zâwm tûrin i hrilh ṭhîn a, An inchhuan êm avângin I thupêkte an zâwm duh lo. Mihring nun theih nâna awm dân tûr i ruatte chu An tihmawh leh luhlul avângin an zâwm duh lo.

³⁰A kum a têlin i zilh fo va, I zâwlneite thu i sawitîr ṭhîn, I mite chuan an beng an chhungawng a, An hmêlmate kutah i pe leh ṭhîn.

³¹I lainat êm avângin i thlahthlam lo va, I tiboral mai hek lo. Pathian ngilnei tak leh Mi khawngaih thei tak zawng i lo nih hi.

³²Nang zawng kan Pathian, Pathian ropui, Thil i titheiin i va hlauhawm êm!” I thuthlung chu i chelh tlat a, Asuria lalten min rawn lâk ata Tûn thlengin kan va rethei tak êm! Kan lal te, hruaitu te, puithiam te, zâwlnei te, Min thlahtute nên kan tuar tlâng a, Kan retheihzia hi ngainêp teh suh.

³³Nang chuan dik takin thil i ti a, Min hrem pawh hi i tidik e, Kan sual a ni.

³⁴Min thlahtu te, kan lal te, Puithiam te leh hruaitu te chuan I Dân chu an zâwm duh lo. I thupêkte leh i thuruatte an pawisa lo.

³⁵I pêk ram zau tak leh ṭha takah chuan an awm a, I duhsak a, lalte i pe a, Mahse, an sual an sim duh lo, I rawng an bâwl duh bawk hek lo.

³⁶Tûnah pawh hian i ram min pêkah chuan bawih kan ni a, He ram ṭha tak, ei tûr tamna ramah hian.

³⁷Kan sual vânga kan chunga lal i dahte chuan Rama thil haw apiang an hui a, An duh duhin min sawisak hi, kan rante nên; Kan mangang êm êm mai.”

³⁸Kan chunga thil lo thlengte avâng chuan min hruaitu te, Levia chi te, Puithiam te leh keini Israel mi te hian thu nghet takin kan tiam a, hming kan ziak a ni.