Read Mizo Lushai Estheri 1 Bible Online

Estheri 1 - Mizo Lushai bible

Estheri 1

¹Lal Ahasuera India aṭanga Sudan thlenga ram bial za leh sawmhnih leh pasarih chunga rorêltu hun laiin hêng thil hi a lo thleng a ni.

²Hetih lai hian lal chu Susa khawpuiah a awm a,

³a lal kum thum kum chuan a ram milian te, a ṭhuihruai te, Persia leh Media sipai hotu te, bial tina Ramawptu te leh bial tina milian te tân ruai a ṭheh a.

⁴Thla ruk chhûng ngawt a ram ropui tak hausakzia te, a lalzia leh a neihnunzia te a entîr a.

⁵Chûng hnu chuan a chênna khawpui Susa khuaa lo kal, milian leh mitê te tân lal in hual chhûngah ni sarih ruai a ṭheh leh a.

⁶Chutah chuan la zai sîn puan vâr chi te, a dumpâwl chi te, a senduk chite an zâr a, a zârna hruihrual chu sailungvâr bana tangkaraw khângah chuan an thlung a. Rangkachak leh tangkaruaa siam ṭhutthlêng dûp an hûng thluah a; a tualzâwlah chuan sailungvâr te, lungmawi chi hrang hrang - a sen te, a hring te, a dumpâwl te an phah bawk a.

⁷An zu semna no chu rangkachak no a ni a, inang pakhat mah a awm lo; lal chuan uain chu a ren lo hle.

⁸In tâwk chin tuk a awm lo; tu pawh, an duh zât zât intîr tûrin lal chuan a chhiahhlawhte chu a hrilh diam a ni.

⁹Lalnu Vasti pawhin lal Ahasuera in pakhatah a hrangin nuho tân ruai a ṭheh ve bawk a.

¹⁰A ni sarih ni chuan lal chu a rui lungpuam ta deuh va, mi tilreh pasarih - Mehumana te, Biztha te, Harbona te, Bigtha te, Abagtha te, Zethara te, Karkasa te leh ama chhiahhlawh bîkte chu a ko va.

¹¹Lalnu Vasti chu a lallukhum khum chunga rawn hruai tûrin a tîr a. Lalnu chu nu hmêlṭha tak a ni a, lal chuan a chhuang êm êm a, a miliante leh a ruai chhimtute chu a hmêl ṭhatzia entîr a duh a ni.

¹²Lal thupêk an han hrilh chuan lalnu Vasti chu a kal duh ta lo va. Lal chu a thinur êm êm a.

¹³Lalte hian dân leh a kenkawh dân tûr chungchângah dânhremite an râwn ziah ṭhîn a. Lal Ahasuera pawh chuan dânhremite chu a ko va.

¹⁴Chûngte chu Karsena te, Sethara te, Admatha te, Tarsisa te, Meresa te, Marsena te, Memukana te, Persia leh Media rama milian, lal bula awm ṭhîn te an ni.

¹⁵Lal chuan, “Lal Ahasueran a chhiahhlawhte lalnu Vasti a kohtîr a, a thu a lo awih duh lo va. Hetiang chungchânga kan ram dân eng nge ni, engtia tih tûr nge ni ang?” tiin anni chu a zâwt a.

¹⁶Memukana chuan lal leh milian dang hmaah, “Lalnu Vasti hian lal hi a thamlo mai ni lovin a rama miliante leh ram pum chhûnga paho hi a lo thamlo hle tihna a ni.

¹⁷Lalnu thil tih dân hi nuhovin an hriat hunah an pasalte chu an pawisa lo vang a, ‘Lal Ahasueran lalnu Vasti a koh pawhin a kal duh bîk hlei nêm,’ an ti ang.

¹⁸Ni tlâk hmain Persia leh Media ram milian nupuite pawhin lalnu thiltih dân an hriatin an pasalte thu an awih duh bîk lo vang a, paho chu an thin a rim ṭeuh mai ang.

¹⁹Lalin rem a tihzâwng a nih chuan lalnu Vasti hian, ‘lal hmêl a hmu leh tawh lo tûr a ni,’ tiin thupêk chhuah rawh. Sût leh mai mai chi loh Persia leh Media dân bu-ah ziak ni rawh se. Lalnu atân mi dang tha zâwk i nei leh mai dâwn nia.

²⁰Chu thupêk chu i ram zau taka puan a nih hnu chuan nuho chuan an pasalte chu an rethei emaw, an hausa emaw an pawisa ang,” a ti a.

²¹Lal leh miliante chuan chu chu ṭha an tih zâwng tak a ni a. Memukana rawt angin lal chuan a ti ta a.

²²A ram bial tinah, a bial ṭawng leh hawrawp ṭheuh hmangin thu a thawn darh ta a; “Chhûng tinah pa a lal ber ang a, a thu chu awih vek tûr a ni,” tiin.