Read Mizo Lushai Estheri 2 Bible Online

Estheri 2 - Mizo Lushai bible

Estheri 2

¹A thinur a daih hnu pawhin lal chuan Vasti thil tih dân leh a chungchânga thupêk chu a ngaihtuah neuh neuh ṭhîn a.

²Lal thurâwntute chuan a hnênah, “Lal tân nula hnahkhat, hmêlṭha tak zawn ni teh se.

³Bial tinah hotu ruat la, chûng chuan an bial nula hmêlṭha zawng chhuak sela, i khawpui Susa khuaah lal inah rawn hruai khâwm teh se, lal ina hmeichhe pindan enkawltu mi tilreh Hegaia hnênah rawn hruai sela, inchei zirtîr rawh se.

⁴I nula duh ber i thlang ang a, Vasti aiah lalnu-ah i dah dâwn nia,” an ti a. Lal chuan ṭha a ti a, chutiang chuan an ti ta a.

⁵Susa khuaah chuan Juda pakhat, Zaira fapa Mordekaia a awm a, Benjamin hnam Kisa fa Simeia thlah a ni.

⁶Babulon lal Nebukadnezaran Jerusalem aṭanga Judai ram lal Jekonia leh a mi mante sala a hruai ṭum khân Mordekaia pawh hi a tel ve a ni.

⁷A pamite nupa chu an thih tawh avângin an fanu Estheri, Hebrai ṭawnga Hadasi an tih chu, a enkawl seilian a, ama fanu ang chiahin a en a ni, nula hmêlṭha tak a ni.

⁸Lal thupêk an puan chhuah hnu chuan Susa khawpuiah Hegaia lo enkawl tûrin nula an rawn hruai zut zut a. Estheri pawh chu lal inah hmeichhe pindan vêngtu Hegaia hnênah chuan an rawn hruai ve a.

⁹Hmêlṭha a lo ti êm êm a, a lo duhsak ta hle a. A incheina tûrte chu a pe zung zung a, ei tûr tuihnai hnai a pe a, a chhiahhlawhah, amah cheitu atân lal ina nula pasarih a ruatsak bawk a. Lal ina hmeichhe awmna pindan nuam berah a chhiahhlawhte nên chuan a awmtîr ta a.

¹⁰Estheri chuan eng hnam nge a niha, tute nge a chhûngte tih a sawi lo; Mordekaia khân sawi a khap tlat a ni.

¹¹Estheri chuan eng nge a tiha, engtin nge a awm zêl tih hre tûrin ni tin lal ina hmeichheho awmna pindan kawtah chuan Mordekaia chu a kal ziah ṭhîn.

¹²Lal nupui tûr an chei chhûng hian kum khat a awh ṭhîn. Thla ruk chhûng chu Mura hriak an chulh a; chumi zawhah thla ruk chhûng bawk rimtui chi dang an chulh leh ṭhîn a ni. Chutia an chei hnu chauh chuan lal hnênah an kal ṭhîn a ni.

¹³Lal hnêna an kal dâwn chuan chhiahhlawh nula, an duh ber pakhat, an hruai thei ṭhîn.

¹⁴Zân lamah lal hnênah chuan an hruai a, zîngah chuan lal nupuiho awmnaah mi tilreh Saazgasa kutah an dah ṭhîn a; lalin a lo duh hlea, a hming lam meuhva a koh loh chuan an kal leh tawh ngai lo.

¹⁵Estheri chu lal hnêna a kal hun a lo thleng ta a, Estheri hi Mordekaia pami fanu a ni a, fanu anga a neih tâk a ni a. Estheri chuan lal hnêna a kal dâwn chuan hmeichhe pindan enkawltu Hegaian tâwk a tih ang chiahin a inchei a, a hmu apiangin hmêlṭha an ti êm êm vek a.

¹⁶Lal Ahasuera lal kum sarihna, thla sâwmna, Tebet thla chuan Estheri chu lal hnênah chuan an hruai a.

¹⁷Lal chuan nula dang zawng zawng ai chuan Estheri chu a lo duh a, a lo duhsakin a ngaina bîk ta hle a; lallukhum a khumtîr a, Vasti aiah lalnu-ah a dah ta a.

¹⁸Estheri lawm nân lal chuan ruai ropui tak a ṭheh a, milian leh lal ṭhuihruai zawng zawng an awm a, chumi ni chu a ram puma chawlhni-ah a puang a. A hausa bawk a, pêk âwm tak tak thilpêk a sem ur ur bawk a.

¹⁹Lal chuan Mordekaia chu hna lian tak a thawhtîr tawh a.

²⁰Estheri pawh chuan Juda mi a nih tu mah a hrilh lo, Mordekaian tu mah hrilh loh tûr a tih kha, a naupan têt aṭanga a thu a zâwm ṭhîn ang khân a zâwm zêl a ni.

²¹Mordekaia chu lal ina hna lian tak lalin a thawhtîr avâng chuan lal in kawngka vêngtu mi tilreh pahnih Bigthana leh Teresa chu lal Ahasuera chungah chuan an thinur a, lal chu thah tumin an phiar ta a.

²²Chu thil chu Mordekaia chuan a lo hre ru a, Estheri chu a hrilh a.

²³Thil awm dân an han chhui chiang a, a lo dik ngei a, an pahnih chuan an khai hlum ta a. Chu thu chu lal thiltih chhinchhiahna bu-ah an ziak lût a.