Read Mizo Lushai Estheri 3 Bible Online

Estheri 3 - Mizo Lushai bible

Estheri 3

¹Chumi hnu chuan Agag mi Hamedata fapa Hamana chu lal Ahasuera chuan a kaisântîr a, hotu dang zawng zawng chungah a dah a.

²Lal thupêk angin lal ina thawk zawng zawng chuan Hamana chu a lo kalin ṭhingṭhiin chibai an bûk ṭhîn tûr a ni. Mordekaia erawh chuan a ti ve duh lo.

³Lal ina thawktute chuan Mordekaia hnênah, “Lal thupêk engtizia nge i zawm duh loh le?” an ti a.

⁴Lal thu chu zâwm ve mai tûrin an hrilh ṭhîn a; mahse, Mordekaia chuan, “Juda ka ni a, Hamana hmaah ka kûn thei lo,” a ti a. Tichuan, Mordekaia awm dân chu a ngaithei dâwn nge dâwn lo hriat nân Hamana chu an hrilh ta a.

⁵Mordekaia chu a hmaah a kûn duh lo va, chibai pawh a bûk duh lo tih a han hriat chuan a thinur hle a.

⁶Tin, Mordekaia chu Juda mi a ni tih a han hriat chuan Mordekaia mai sawisa lovin Persia rama Juda awm zawng zawng chu tihmang vek a tum ta a.

⁷Ahasuera lal kum sâwm leh pahnihna, thla hmasa ber, Nisan thla chuan a thiltum tihhlawhtlin nân eng ni leh eng thla nge ṭha ber ang tih hriat nân ai a entîr a; chu aien ni chu ‘Purim’ an ti ta a ni. Thla sâwm leh pahnih, ni sâwm leh pathum ni chu ni remchâng berah an ngai ta a.

⁸Hamana chuan lal hnênah, “I ram pum hmun hrang hranga awm zîngah hian hnam pakhat inzep an awm a, bial tinah an awm darh a ni. Hnam dang dân ang ni lo, anmahni dân bîk an nei a, ram dân pawh an zâwm ve duh lo. Hetianga i awmtîr zêl chuan i tân a ṭha lo hle ang.

⁹Lalin rem a tih chuan tihhlumtîr vek mai teh. Chutianga i tih chuan ram awp nân lal sumah tangkarua kg. nuaithum leh sîngli ka rawn chhûng thei ngei ang,” a ti a.

¹⁰Thupuan nemnghehna zungbun chu lal chuan a phawi a, Juda-ho hmêlmapa Agag mi Hamedata fapa Hamana chu a pe a.

¹¹“Mipuite leh an tangka chu i kutah ka pe a che, i duh duhin ti rawh,” a ti a.

¹²Thla hmasa ber ni sâwm leh pathum ni chuan lal lehkhaziaktute chu Hamana chuan a ko va, lal thupuan chu a ziaktîr a, ram chhûnga ṭawng chi hrang hrang leh an hawrawp hmangin a ziaktîr nghâl a. Lal aiawhtu te, ramawptu te leh rorêltu te hnênah lal zungbuna nem chu thawn chhuah tûrin a buatsaih ta a.

¹³Ram puma bial tinah, lal thupêk chu an tlânpui a. Chûng thupêk chu ni thuhmun, thla sâwm leh pahnih, Adar thla, ni sâwm leh pali niin hman tûr a ni - Juda zawng zawng, ṭhalai leh tar te, naupang leh hmeichhiate lam pawh thah vek tûr thu a ni; an thil neihte pawh râllâk sum anga neihsak vek tûr a ni.

¹⁴Bial tinah chu thupêk chu an chhiar chhuak tûr a ni, a hun takah, thupêk angin mi an chêt theih nân.

¹⁵Susa khawpuiah pawh thupêk chu lal chuan a puantîr a; bial hrang hrangah erawh chuan lehkha chu an tlânpui a. Lal leh Hamana te chuan zu an in veng veng lai chuan Susa khuaa mite chu an mangangin an chiai hle a.