Read Mizo Lushai Estheri 4 Bible Online

Estheri 4 - Mizo Lushai bible

Estheri 4

¹An thil tih tâk zawng zawng chu Mordekaian a lo hriat chuan a puan a pawtthlêr a, saiip puan a sin a, a lu-ah vaivut a phul a, lungngai takin a ṭap tlawk tlawk a; chuti chung chuan khua chu a fang a,

²Lal in tual luhna kawngka chu a va thleng a; saiip sin tu mah an luhtîr phal loh avângin lal in hung chhûngah chuan a lût lo.

³Ram bial tina lal thupêk an puanna apiangah, Juda-ho chu an ṭap chuah chuah mai; chaw an nghei a, mi tam tak chu saiip puan sinin vaivutah an ṭhu a.

⁴Mordekaia awm dân chu chhiahhlawh nulate leh mitilrehte chuan Estheri chu an rawn hrilh a, lalnu chu a mangang hle a, Mordekaia chu saiip puan hlîpa a sin tûrin puan a pêktîr a; a lo duh lo.

⁵Amah enkawltu tûra lalin mi tilreh pakhat a ruatsak Hathaka chu a ko va, chinchâng zâwt chiang tûrin Mordekaia hnênah chuan a tîr a.

⁶Hathaka chu lal in luhna kawngka tualzâwlah chuan a va chhuak a.

⁷Mordekaia chuan thil awm dân zawng zawng a lo hrilh a, Juda-ho tihchimih an nih phawt chuan lal sum bâwma Hamanan tangka chhûn luh a tum zâtte pawh chu a lo hrilh a.

⁸Juda-te râwt tûr thupêk Susa khawpuia an puan kawpi pawh Hathaka chu a pe a. Mordekaia chuan lehkha chu Estheri pe tûrin a ngên a, thil awm dân zawng zawng chu a hrilhtîr a.

⁹Hathaka chuan thu chu a va thlen a.

¹⁰Estheri chuan hetiang thu hi Mordekaia hrilh tûrin a tîr leh a.

¹¹“Ram chhûng mi tu pawhin, mipa pawh, hmeichhia pawh, koh lohva lal in chhûngrila lûta, lal va hmu chu, a ṭhuihruaite ngei pawh, tihhlum tûr tih mi zawng zawngin an hria, lalin a rangkachak laltiang a lo lekchhuahsakte chauh chuan chu dân chu an pumpelh thei a ni. Ni sawmthum zet chu min la ko leh ta lo a ni,” tiin Mordekaia chu a hrilhtîr a.

¹²Estheri thu chu Mordekaia an hrilh a.

¹³Mordekaia chuan hetianga hrilh tûrin Estheri hnênah chuan a tîr leh a, “Lal in chhûnga i awm avângin nangmah chauh hi him bîk tûrah inngai suh.

¹⁴Tûn hun anga i ngawih mai mai chuan hmun danga Juda awmte chu engtin tin emaw chhan chhuah an nih hlauh pawhin; nang leh i pa chhûngte chu kan thi vek dâwn a ni. Hetiang hun atân ngei hian lalnu-ah i lo ṭang a ni dâwn lâwm ni?” tiin.

¹⁵Estheri chuan Mordekaia hnênah a tîr leh a,

¹⁶“Kal la, Susa khuaa Juda awm zawng zawng ko khâwm la, ka tân a chhûn a zânin chaw ngheiin ni thum chhûng ṭawngṭai teh u. Ka chhiahhlawh nulaho nên keini pawhin chutiangin kan ṭawngṭai ang. Chumi hnuah chuan dân ni lo mah se lal hnênah chuan thih leh thih ka kal ang,” a ti a.

¹⁷Mordekaia chu a hâwng a, Estheri tih ang chuan a ti ta vek a.