Read Mizo Lushai Estheri 5 Bible Online

Estheri 5 - Mizo Lushai bible

Estheri 5

¹Ni thum chaw a nghei ni chuan Estheri chuan lal thuam a inbel a, lal pindan hual chhûng tual, lalṭhutthlêng awmna kawtah chuan a kal a. Kawngka hawi zâwngin lalṭhutthlêngah chuan lal chu a lo ṭhu a.

²Lalin pâwna lalnu Estheri ding chu a hmu a, a lo khawngaih a, a rangkachak laltiang chu a lekchhuahsak a, Estheri chuan a va pan a, a tiang hmâwr chu a va khawih a,

³“Lalnu Esther, eng nge ni i duh min hrilh teh, ka ram chanve pawh ni se ka pe ang che,” a lo ti a.

⁴Estheri chuan a chhâng a, “Lalin rem i tih chuan zâninah Hamana nên ka ruai siamsak che rawn ei teh u,” a ti a.

⁵Lal chuan Hamana chu lalnu ruai kîl tûra lo kal vat tûrin a chah a, Lal leh Hamana chu lalnu ruai kîl tûr chuan an kal ta a.

⁶Uain an in laiin lal chuan, “Eng nge i duh, ka ram chanve hial pawh ni se ka pe ang che,” a ti leh a.

⁷Estheri chuan,

⁸“Lalin min khawngaiha, ka thil dîl tûr chu i phal dâwn chuan naktûk zânah ruai ka lo buatsaih leh ang a, Hamana nên rawn ei leh ula ka lo hrilh ang che,” a ti a.

⁹Hamana ruai ṭheh zo chu rilru hlim tak leh lâwm takin a haw a; mahse, Mordekaia chu lal in hual chhûng kawngka bulah a hmu a, zah derna lantîr tûrin din pawh a lo ding duh lo va; chu chu a han hmuh chuan Hamana chu a thinur ta hle a.

¹⁰A insûm hrâm hrâm a, a haw ta a. A ṭhiante leh a nupui Zeresi a kohtîr a.

¹¹A hausakzia te, fapa a ngahzia te, lalin a kaisântîr thu te, lalin milian dang zawng zawng aia a ngaihsânzia te sawiin a ina lêng tûra a sâwm a ṭhiante chu a uankhum a.

¹²“Lalnu meuh pawhin lal leh kei chauh a ruai chhim tûrin min sâwm a ni, naktûk zân atân pawh min sâwm dêr tawh.

¹³Amaherawhchu, lal in luhna kawngkaa Mordekaia ṭhu ka hmuh chhûng chu hêng zawng zawng hi engah mah ka ngai lo,” a ti a.

¹⁴A nupui leh a ṭhiante chuan, “Tawng sawmngaa sâng, khaihlumna tûr ban phuntîr la, naktûk zîngah lal hnênah Mordekaia chu khai hlum dîl la, hlim takin ruai chu i kîl thei mai ang chu,” an ti a. Hamana chuan ṭha a ti hle a, inkhai hlumna tûr chu a siamtîr ta a.