Read Mizo Lushai Estheri 6 Bible Online

Estheri 6 - Mizo Lushai bible

Estheri 6

¹Chumi zân vêk chuan lal chu a muhîl thei lo va, thil hlui chhinchhiahnate chu a lâk chhuahtîr a, an chhiar chu a ngaithla a.

²Lal ina mi tilreh Bigthana leh Teresa te pahnihin lal thah tuma an phiar thute kha an chhiar kher a.

³Lal chuan, “Hemi avâng hian Mordekaia hi chawimawiin lâwmman kan pe em?” a ti a. A chhiahhlawhte chuan, “Eng mah kan tihsak lo,” an ti a.

⁴Lal chuan, “Tu nge lal in tuala awm saw?” a ti a. Hamana chuan Mordekaia khaihlumna tûr ban a siamtîr a, khai hlum dîl tûrin lal in hual chhûngah a lo kal a ni.

⁵Lal chhiahhlawhte chuan, “Biak tum chein Hamana a lo kal a ni,” an ti a. “Lo lût rawh se,” a ti a.

⁶Hamana a lo luh chuan, “Mi pakhat chawimawi ka duh a, engtin nge ka tih ang?” lal chuan a lo ti a. ‘Lal chuan kei lo chu tu dang nge chawimawi a duh ang le,’ a ti rilru a.

⁷Lal hnênah chuan, “Lalin chawimawi a duha tân chuan,

⁸lal hâk ṭhin kawr han la chhuak sela, a chuanna ṭhin sakawr rawn kai sela, a chawimawina lukhum khumtîr ni rawh se.

⁹I miliante zînga ropui ber ko la, ani chuan lal kawrte chu hâktîr sela, sakawrah chuantîr bawk sela, khua fanpui rawh se. An kal pah chuan, ‘Lalin chawimawi a duha chu hetiang hian a chawimawi a ni,’ ti zêl rawh se,” a ti a.

¹⁰Lal chuan Hamana hnênah, “Hmanhmawh la, lal kawrte leh sakawrte chu la la, Juda mi Mordekaia hi i sawi ang chuan chawimawi rawh. I sawi ang zawng zawng khân ti ang che, lal tual luhna kawngka bulah a awm saw,” a ti a.

¹¹Hamana chuan lal kawrte chu a la a, Mordekaia chu a hâktîr a; Mordekaia chu sakawrah chuan a chuang a; khawpui kawtthlêrah chuan Hamanan sakawr chu a kaihsak a, an kal pah chuan mipui hnênah, “Lalin chawimawi a duha chu hetiang hian a chawimawi a ni,” tiin a au luah luah zêl a.

¹²Mordekaia chu lal tual luhna bulah chuan a kal leh a; Hamana erawh chu zaka hmai khuhin inah a hâwng a.

¹³A nupui leh a ṭhiante chu a chunga thil thleng zawng zawng chu a hrilh vek a. A nupui leh a ṭhian fing tak takte chuan, “Mordekaia hi i chelh lo ṭan ta a nih hi. Juda a ni a, i ngam lo vang; i tlâwm zâwk ngei ang maw le,” an ti a.

¹⁴Chûng thu an sawi lai chuan Hamana chu lal ina Estheri ruai chhim tûra hruai nghâl tûrin mi tilrehte an lo kal a.