Read Mizo Lushai Estheri 7 Bible Online

Estheri 7 - Mizo Lushai bible

Estheri 7

¹Lal leh Hamana chu Estheri ruai buatsaih ei tûr chuan an kal a.

²Uain an in lai vêkin lal chuan, “Lalnu Esther, eng nge i duh min hrilh tawh teh le, ka ram chanve hial pawh ni se, min hrilh la, ka pe ang che,” a ti a.

³Lalnu chuan a chhâng a, “Aw LALPA, lalin min khawngaiha ṭha i tih zâwng a nih chuan ka nunna zuah tûrin ka dîl a che; ka mite nunna pawh zuah tûrin ka ngên a che.

⁴Tihhluma tihboral vek tûrin kei leh ka mite chu tih kan ni tawh. A hmei a pain bawihah min hralh ni lek sela chu ka ngawi thei ang a, ka tibuai lo vang che; tûnah zawng, kan hmêlmate hian min that chimit vek dâwn a ni,” a ti a.

⁵Lal Ahasuera chuan Estheri hnênah, “Chutianga lo ti ngam ta mai chu tu nge a nih a, khawia awm nge a nih?” a ti a.

⁶Estheri chuan, “Kan hmêlma leh min ertu chu he misualpa Hamana hi a ni alâwm,” a ti a. Hamana chu lalnu hmaah chuan a khûr chhe ta mai a.

⁷Uain an in lai chuan lal thinur chu a tho va, lal huanah chuan a kal chhuak a, Hamana erawh chu lalnu hnêna a nunna zuah ngên tûrin in chhûngah chuan a awm a, lal hmêl a hmuhin a tân a hlauhawm tih a hria a ni.

⁸Lal chu huan aṭang chuan uain an inna pindanah chuan a lo lût leh a, Estheri ṭhutnaa Hamana lo bawk chu a hmu a, “Ka inah, ka mit hmuh ngeiah pawh lalnu hi sual a tum vei a ni maw?” a ti a. Lal a han ṭawng chhuah chuan Hamana hmai chu an khuhsak a.

⁹Lal bula awm ṭhînte zînga mi tilreh pakhat Harbona chuan, “Lal tâna thil ṭha titu Mordekaia khai hlum nân tawng sawmngaa sâng Hamana hian a in bulah ban a phun asin,” a ti a.

¹⁰Lal chuan, “Chutah chuan va khai hlum rawh u,” a ti a. Mordekaia khai hlumna tûra a siamah chuan Hamana chu an khai hlum a, lal thinur chu a dai ta a.