Read Mizo Lushai Estheri 8 Bible Online

Estheri 8 - Mizo Lushai bible

Estheri 8

¹Chumi ni chuan Juda-te hmêlma Hamana in leh lo chu lal Ahasuera chuan lalnu Estheri chu a pe a. Estheri chuan lal hnênah Mordekaia nêna an inchhûngkhat dânte a hrilh a. Chuta chin chu lal hnênah duh duhin Mordekaia chu a kal thei ta a.

²Lal zungbun Hamana bun kha lal chuan a la a, Mordekaia chu a buntîr a. Estheri chuan Hamana in leh lo chu Mordekaia kutah a dah a.

³Estheri chuan lal hnênah sawi tûr a la nei cheu va. A ke bulah a bawkkhup a, Hamana thil tihpawi, Juda-te tihmang a tum chu, sût tûrin mittui nên a ngên a.

⁴Lal chuan Estheri chu a tiang a lekchhuahsak a; tichuan, Estheri chu a tho va, lal hmaah chuan a ding ta a.

⁵“Lalin ṭha a tiha, min khawngaih takzet chuan, lal ram bial tinah Juda awmte that tûra Agag mi Hamadata fapa Hamanan lehkha a thawn kha sût lehna ziak ni teh se.

⁶Ka mite chunga hetiang thil ṭha lo thleng tûr hi ka ngai ngam lo, ka laichîn ngeite an that tûr hi hmuh pawh ka ngam lo vang,” a ti a.

⁷Lal chuan lalnu Estheri leh Juda mi Mordekaia hnênah, “Hamana chu Juda-te chunga kut thlâk a tum avângin ka khai hlum a, a in leh lo pawh lalnu Estheri ka pe bawk a.

⁸Lal thu-a ziak, zungbuna nem hnan tawh chu sût leh mi a ni hlei nêm. In duh ang angin Juda mite hnênah ka hmingin ziak ula, zungbunin nem rawh u,” a ti a.

⁹Thla thumna Sivan thla ni sawmhnih leh pathum ni chuan lal lehkha ziaktute chu a ko va, Juda-te chungchânga a duh ang chu a ziaktîr a. India ram aṭanga Sudan ram thleng, lalram bial za leh sawmhnih leh pasariha lal aiawhtu te, ramawptu te leh bial hotu te chu anmahni ṭawng leh an hawrawpa ziakin a thawn nghâl a.

¹⁰Lal Ahasuera hmingin lehkha chu an ziak a, a zungbun chuan an nem a. Sakawr tlân chak chi, lalin thu thawn darh nâna a vulh chunga chuangte kutah an pe a, an tlânpui ta a.

¹¹Chu lal lehkhaah chuan: Juda-te chu an awmna khua apiangah lo inpun khâwma anmahni leh an nupui fanaute rawn beih tumtute an lo beih lêt ve lal chuan a phalsak a. An awmna bial tina anmahni rawn beitute chu an bei lêtin an that thei ang a, an thahte in leh lo pawh râllâk sum angin an nei thei ang.

¹²Thla sâwm leh pahnihna Adar thla, ni sâwm leh pathum ni chuan lal Ahasuera ram chhûnga bial zawng zawngah, Juda-ho thah tûr tih ni-ah, he thupêk thar hi Juda-te chuan an hmang thei ang.

¹³He thu hi dân ngheta hman tûr leh Juda-te pawh an hmêlmate chungah phuba la tûra an inrâlrin theih nân bial tina mite hnênah puan tûr a ni,” tiin an ziak a.

¹⁴Lal thupêkin sakawr chungchuang mite chu lal sakawr chakah an chuang a, an tlân ta zut zut a. Chu thupêk chu Susa khawpuiah pawh an puang a.

¹⁵Mordekaia chuan puan zai sîn senduk kawrfual a ha a, lal puan bah dumpâwl leh vâr chu a bât a, chawimawina rangkachak lukhum a khum a; lal in ata chu a lo chhuak a, Susa khawpui kawtthlêrah mi tin lâwmin an lo au dur dur a.

¹⁶Juda-te chu an hlim hle a, an ngaih a ṭhain an thla a muang bawk a.

¹⁷Lal thupêk an chhiarna bial leh khua apiangah Juda-te chu an lâwm a, hlim takin ruaite an ṭheh a. Juda-te chu an hlauh ve thung tâk avângin mi tam tak chu Juda-ah an inleh phah ta nghe nghe a.