Read Mizo Lushai Estheri 9 Bible Online

Estheri 9 - Mizo Lushai bible

Estheri 9

¹Lal thupêk hman ni tûr Adar thla ni sâwm leh pathum ni chu a lo thleng a. Chumi ni chuan an hmêlmate chuan Juda-te chu tihchimih an tum a nih kha; mahse, Juda-te chan chu a ṭha ta zâwk a.

²Lal Ahasuera ram chhûngkaw tina Juda-te vêngah chuan Juda-te chu an pung khâwm a, anmahni rawn beih tumtu bei lêt tûrin an lo inrâlring a. Tu hnam pawhin Juda-ho chu an hlau va, an khawih ngam ta lo va.

³Bial hotu - lal aiawh te, ramawptu te leh sawrkâr hnathawk dang te chuan Mordekaia an hlauh avângin Juda-te chu an pui ta zâwk a.

⁴Lal inah Mordekaia chuan ngaih ropui a hlawh ta hle mai tih ram pumah a lo thang ta a, thil a tithei ta deuh deuh va.

⁵Chuvângin, Juda-te chuan an hmêlmate chu duh duhin an sawisa thei a, khandaih nên an bei a, an hmêlma zawng zawng an that ta a.

⁶Susa khawpuiah pawh Juda-te chuan mi zanga lai an that a.

⁷Hêng Parsandata te, Dalfona te, Aspata te,

⁸Porata te, Adalia te, Aridata te,

⁹Parmasta te, Arisaia te, Aridaia te, Vaizata te,

¹⁰Juda hmêlma Hamedata fapa Hamana fa sâwmte pawh hi Juda-te chuan an that a; amaherawhchu, tu mah an rawk lo.

¹¹Chumi ni chuan lal khawpui Susa khuaa mi an thah zât chu lal an hrilh a.

¹²Lal chuan lalnu Estheri hnênah, “Lal khawpui Susa-ah pawh Juda-te chuan mi zanga, Hamana fa sâwmte nên an that a, ram chhûng bial dangah eng ang takin che ang maw! Duh dang i la nei em? Min hrilh teh, ka tihsak zêl ang che,” a ti a.

¹³Estheri chuan, “Lalin rem a tih chuan vawiina an tih angin Susa khuaa Juda-te chuan naktûkah pawh ti leh sela, Hamana fa sâwmte chu thinga khai ni rawh se,” a ti a.

¹⁴Chutianga ti tûr chuan lal chuan thu a pe a, Susa khuaah chuan an puang a. Hamana fa sâwmte pawh chu thingah an khai a.

¹⁵Susa khuaa Juda awmte chu Adar thla ni sâwm leh pali ni chuan an pung khâwm leh a, Susa khuaah mi zathum an that leh a; mahse, tu mah an rawk lo.

¹⁶Ram chhûng bial tina Juda-te pawh chu mahni invênghim tûrin an pung khâwm a. Anmahni hawtu, an hmêlma, mi sîngsarih leh sângnga an that a; amaherawhchu, tu mah an rawk lo.

¹⁷Chutiang chuan Adar thla ni sâwm leh pathum ni chuan an ti a. A tûk ni sâwm leh pali ni chuan tu mah an that tawh lo, hlim taka ruai ṭheh ni-ah an hmang a ni.

¹⁸Susa khuaa Juda-te erawh chuan ni sâwm leh panga ni chuan awmni an kham a, ni sâwm leh pathum leh ni sâwm leh pali ni-ah an hmêlmate an that a, ni sâwm leh panga ni chuan an tâwp chauh a ni.

¹⁹Chumi avâng chuan thingtlâng khaw lama Juda-te chuan Adar thla, ni sâwm leh pali ni hian awmni an kham a, hlim takin ruaite an ṭheh a, thilpêkte an inpe tawn ṭhîn.

²⁰Mordekaia chuan hêng thute hi lehkhabu-ah a ziaktîr vek a, Persia ram chhûnga Juda awm zawng zawng, a kilkhâwr bera awmte chenin lehkha a thawn a.

²¹Adar thla ni sâwm leh pali ni leh ni sâwm leh panga ni, kum tin awmni khama, kût tûr a ni.

²²Hêng ni-ahte hian a ni Juda-ten an hmêlmate laka an intihfihlîma, lungngaihna leh manganna thla chu hlimna leh lâwmna thlaa an chantîr ni. Ruaite ṭheha, hlim taka hmangin ei tûr thilte inpe tawn tûrin a hrilh a; mi retheite pawh ei tûr pe ve tûrin a hrilh bawk a.

²³Juda-te chuan Mordekaia thupêk chu an zâwm a, kum tin kûtah an neih ta a.

²⁴Agag mi Hamadata fapa Hamana, Juda-te hmêlma khân Juda-te râwt nân eng ni nge ṭha ber ang tih hriat nân ai a entîr a. Juda-te chu tihchimih a tum a ni.

²⁵Nimahsela, Estheri chu lal hnênah a kal a, lal chuan thupêk a chhuah ta a. Chu thupêk avâng chuan Juda-te tuar tûra a buatsaih chu Hamana chuan a fate nên an tuar ta a, thingah an khai ta a.

²⁶An chunga thil thlengte avâng leh Mordekaia lehkha avâng chuan chu kût chu Purim ‘Aien’ Kût an vuah ta a ni.

²⁷Juda-te chuan an thlah zêlte tân pawh, a hun takah, Mordekaia sawi angin hêng ni hnihahte hian kum tin awmni an kham ziah tûr a ni tih dân an siam ta a.

²⁸Juda chhûngkua tu pawhin, ṭhang lo thar zêlte chuan bial tinah leh khaw tinah Purim kût ni te hi kumkhuain an hmang ṭhîn tûr a ni tih thu an titlu a.

²⁹Lalnu Estheri, Abdaia fanu chuan, Purim kût chungchânga Mordekaia lehkha chu a nemnghet a ni tih thu chu Mordekaia lehkhaah chuan an thawn chhuak tel a.

³⁰Lehkha chu Juda zawng zawng hnêna thawn a ni; Persia ram bial za leh sawmhnih leh pasarih hnênah a kawpi an pe bawk a; Juda-te chu thlamuang tak leh râlmuang taka awm tûrin an chah a.

³¹Juda-te chu, a hun takah, an thlah zêlte nên, chaw nghei leh lusûn tih dân an neih ṭhin angin Purim ni te chu hmang ṭhîn tûrin an chah bawk a.

³²Chu chu Mordekaia leh lalnu Estheri thu a ni; Lalnu Estherin Purim kût chungchâng a nemnghehna thu chu lehkhabu-ah ziak a ni.