Read Mizo Lushai Exodus 1 Bible Online

Exodus 1 - Mizo Lushai bible

Exodus 1

¹Jakoba ruala Aigupta rama Israela fa, mahni nupui fanau nên ṭheuhva chhukte hming chu hêng hi a ni:

²Reubena te, Simeona te, Levia te, Juda te,

³Isakara te, Zebuluna te, Benjamina te,

⁴Dana te, Naftalia te, Gada leh Asera te.

⁵Israela thlahte chu a lu nungin sawmsarih an ni. Josefa chu Aigupta ramah a lo awm tawh sa a.

⁶Josefa leh a unaute chu an thi a, an hun laia mite pawh an thi fai vek a.

⁷Israela fate chu nasa takin an lo pung a, an chak deuh deuh va, ram pumah an khat ta a.

⁸Aigupta ramah Josefa hre lo lal thar a lo awm a.

⁹A mite hnênah, “Israel fate hi kan aiin an tamin an chak zâwk mai dâwn alâwm.

¹⁰Indo awm hlauh se kan hmêlmate an thlâwp ang a, min bei ang a, ram ata hi min chhuahsan mai dah ang e; ti rawh u, finrâwl chhuahin an pun zêl lohna tûr kawng i ngaihtuah teh ang u,” a ti a.

¹¹Tichuan, rim taka chhawrtu tûr mi an ruat a. Farawa kudam hmun atân Pithom te, Ramases khuate an siam a.

¹²An chhawr rim poh leh an pung chak a, an darh zau ting mai a ni. Aigupta mite tân hlauhawm tham an lo ni ta a.

¹³Aigupta mite chuan rim lehzualin an chhawr ta a;

¹⁴hlum an siamtîr a, an rawhchantîr a; lovah te an chhawr a, thawh tûr chi tinrêng hah takin an thawhtîr a.

¹⁵Aigupta lal chuan Hebrai-ho nau chhartu Sifraii leh Puaii hnênah,

¹⁶“Hebrai nuho nau in chharin mipa a nih chuan that ula, hmeichhia a nih erawh chuan zuah ang che u,” a ti a.

¹⁷Nau chhartute chu Pathian ṭih mi tak an lo ni a, Aigupta lal thupêk ang chuan an ti duh lo va, mipa pawh an zuah ta zêl tho va.

¹⁸Nau chhartute chu Aigupta lal chuan a ko va, “engtizia nge hetianga thil in tih, mipate pawh in la zuah zêl hi?” a ti a.

¹⁹Nau chhartuten Farawa hnênah chuan, “Hebrai nuhovin Aigupta mi an ang ve lo, nau an awl bîk a, nau chhartu thlen hmain an hring zêl alâwm,” an ti a.

²⁰Nau chhartute chu Pathianin a tiṭha ta hle a, Israel mite chu an pung chakin an lo tam ta hle a.

²¹Pathian an ṭih avângin nau chhartute pawh chu an chhûngkua an pung ve ta a.

²²Farawa chuan a khua leh tuite chu thu a pe a, “Mipa fa piang hlim apiang Nail luiah paihsak ula, hmeichhe fa erawh chu zuah ang che u,” a ti vek a.