Read Mizo Lushai Exodus 10 Bible Online

Exodus 10 - Mizo Lushai bible

Exodus 10

¹ LALPA chuan Mosia hnênah, “Farawa hnênah kal rawh, ka thiltih makte an zînga ka tih theih nân a hote nên ka tiluhlul a;

²tin, nangnin in fate hnênah te, in tute hnênah te, in tuchhuante hnênah te Aigupta rama ka thiltih hi in inhrilh chhâwng zêl ang a, LALPA hian chûng chu ka tih a ni tih in hriat theih nân,” a ti a.

³Mosia leh Arona chu Farawa hnênah an kal a, “Hebrai mite Pathian LALPA chuan heti hian a ti: ‘Eng chen nge ka hmaah i inphahhniam duh loh dâwn? Ka rawng an bâwl theih nân ka mite hi chhuah rawh.

⁴Ka mite hi i chhuah duh loh chuan naktûkah in ram chhûngah hian khau ka tipuang ang.

⁵Ram chu an bawh khat tlat ang a, lei pawh a hmuh theih lo vang. Rial chhut chhiat loh, thil eng pawh la awm chu, an ei zo vek ang a;

⁶i inah te, i hote inah te leh Aigupta mi zawng zawng inah te an khat ang; in pate leh in pute pawhin, he rama in awm chinah chutiang khawpa tam khau puang chu an la hmu ngai lo vang,’ a ti e, ti rawh min ti,” an ti a. Farawa in ata chu an chhuak ta a.

⁷Farawa hote chuan a hnênah, “He pa hian eng chen nge min tihbuai dâwn le? Chhuah mai rawh, an Pathian LALPA rawng chu va bâwl rawh se. Aigupta ram a chhiat zawh tawh hi i hre lâwm ni?” an ti a.

⁸Mosia leh Arona chu Farawa hnênah an rawn hruai leh a, an hnênah, “Kal ta ula, in Pathian LALPA rawng chu va bâwl rawh u. Tute nge kal ang?” a lo ti a.

⁹Mosia chuan, “A pui a nawiin kan kal ang, kan fanu kan fapate nên, kan berâm leh ran rualte pawh kan hruai ang; LALPA hmaah ruai ṭheh tûr a ni si a,” a ti a.

¹⁰Ani chuan, “In nupui fanaute nêna ka chhuah vek loh tûrzia che u chu LALPA chhâlin ka sawi hi. Hel in tum rilru tih a lang chiang alâwm.

¹¹In duh angin paho chu kal ula, LALPA rawng chu va bâwl rawh u,” a ti a. Farawa in aṭang chuan Mosia leh Arona chu an hnawt chhuak ta a.

¹² LALPA chuan Mosia hnênah, “Aigupta ram chungah i bân phar rawh; Aigupta ramah khau a lo puang ang a, rialin a chhut chhiat bâng kha an ei zo vek dâwn nia,” a ti a.

¹³Mosia chuan Aigupta ram chungah chuan a tiang chu a lek a. LALPA chuan nilêng leh zankhuain khawchhak thli a tlehtîr a, zîngah chuan thli chuan khau chu a rawn lên ta a.

¹⁴Aigupta ramah khau chu a awm ta nuai nuai a, an fu tep tup a, an tam ngei mai! Chutiang khawpa tam chu tûn hma khân a la awm ngai lo, awm pawh a awm leh ngai hek lo vang.

¹⁵Ram pum an dâp a, khua an hliah thim khup a, rial den chhiat bâng thlai chi tinrêng leh thei chi tinrêng an khel fai vek a. Aigupta ram pum puiah hnim hring emaw, thing hring emaw hmuh tûr rêng a awm ta hauh lo va.

¹⁶Hmanhmawh takin Farawa chuan Mosia leh Arona chu a ko va, “In Pathian LALPA chungah leh in chungah ka lo tidik lo a ni.

¹⁷Ka thil tihsual hi tûn ṭum chu min ngaidam teh u. In Pathian LALPA chu thih theihna khawpa min hrem hi titâwp tûrin min ngensak rawh u,” a ti a.

¹⁸Farawa in aṭang chuan an chhuak a. LALPA hnênah an dîlsak a.

¹⁹LALPA chuan khawthlang thli na tak a tlehtîr a, khau chu a lên a, Tuipui Senah a lên lût ta vek a. Aigupta ram chhûngah chuan khau pakhat mah a awm ta lo va.

²⁰LALPA chuan Farawa chu a tiluhlul ta cheu va, Israel fate chu a chhuah duh chuang lo va.

²¹ LALPA chuan Mosia hnênah, “I bân vân lamah phar rawh; tichuan, Aigupta ram pum hi thim chhah mupin a khuh ang a, ai-mit-thlawn ang maiin a awm dâwn nia,” a ti a.

²²Mosia chuan a kut chu a phar a, ni thum chhûng chu Aigupta ram a thim ta tlat a,

²³tu mah an inhmu thei lo va, mahni awmhmun ata ni thum chhûng chu che sawn thei pawh an awm lo. Israel mite awmnaah erawh chuan êng a awm thung a.

²⁴Farawa chuan Mosia chu a ko va, “Kal ula, LALPA rawng chu va bâwl rawh u, in fanaute nên kal ula, in berâm leh bâwng rualte erawh chu hruai suh u,” a ti a.

²⁵Mosia chuan, “Chuti a nih chuan thilhlan tûr leh hâlrala hman tûr ran min tumsak i peih ang emaw chu!

²⁶Kan rante chu pakhat mah hnutchhiah lo zâwk ila a ṭha ang. Keimahni ngeiin kan Pathian LALPA biakna tûr ran chu kan thlang zâwk tûr a ni. A hmun kan va thlen tê tê loh chuan ran eng ang nge hlan tûr kan hre rih si lo va,” a ti a.

²⁷ LALPA chuan Farawa chu a tiluhlul leh a, a chhuah duh chuang ta lo va.

²⁸Farawa chuan a hnênah, “Ka hmuh tûrah awm tawh suh, fîmkhur rawh, mi rawn hmuh tum tawh suh, ka hmuh leh vaih che chuan ka tihlum ngei ang che,” a ti a.

²⁹Mosia chuan, “I sawi dik ang, ka rawn hmu leh tawh lo vang che,” a ti a.