Read Mizo Lushai Exodus 12 Bible Online

Exodus 12 - Mizo Lushai bible

Exodus 12

¹Aigupta ramah LALPA chuan Mosia leh Arona hnênah,

²“Tûn thla hi thla chhiar ṭanna ni sela, kum khat chhûnga thla hmasa ber atân hmang ang che u.

³Israel pungkhâwmho hrilh rawh: Tûn thla ni sâwm ni hian chhûng tin mahni chhûng ei tâwk berâmno emaw, kêltê emaw thlang ṭheuh rawh se.

⁴Berâmno pakhat ei sêng lo khawpa chhûng tlêm an nih chuan an ṭhenawmte nên inthurual sela, an tam dân azir leh an ei theih tûr zât azirin insem rawh se.

⁵Berâm chu a hmêlhem tûr a ni lo, berâm rual emaw, kêl rual zînga mi emaw kum khat aia upa lo, a pa, hmêlhem lo, in duh zâwk zâwk in thlang thei ang.

⁶Ni sâwm leh pali ni thlengin in thlang ang a, chumi ni tlai lamah chuan Israel hnam pum pui chuan an talh tûr a ni.

⁷A thisen chu an la ang a, an eina tûr in kawngka biang tawnah leh kawngka lu chungah an tât tûr a ni.

⁸Chumi zân chuan sa chu an hem hmin ang a, an ei tûr a ni; dawidim telh loh chhang leh lambak nên an ei tûr a ni.

⁹A hela ei tûr a ni lo, chhum tûr a ni hek lo; a lu leh a ke te, a kawchhûngte nên lam meia hem hmin tûr a ni.

¹⁰In ei bâng chu zîng thlengin a awm tûr a ni lo; chutiang ei bâng in neih chuan in rawh ral tûr a ni.

¹¹Pheikhawk bun diamin tiang in keng ang a, inchei fel sa vekin in ei sawk sawk tûr a ni. LALPA chawimawi nâna kalhlên kût a ni e.

¹²Chumi zân chuan Aigupta ram ka fang chhuak ang a, Aigupta mi, fa tîr, mihring pawh ran pawh, a pa chu ka that vek dâwn; Aigupta pathiante pawh ka sawisa ang. LALPA ka nih hi.

¹³Kawngka bianga thisen tah chu in awmna chhinchhiahna a ni ang a, thisen tah chu ka hmu ang a, chu in chu ka kal kân ang a; nangni chuan Aigupta mite angin in tuar ve lo vang.

¹⁴Chumi ni chu in tân ni serh a ni ang a, LALPA thiltih in hriat reng nân in kût ṭhîn tûr a ni, ṭhangthar zêlte pawhin chu ni chu an serh kumkhua tûr a ni.

¹⁵Ni sarih chhûng chu dawidim telh loh chhang chauh in ei tûr a ni; a ni hmasa berah chuan in in chhûng ata dawidim rêng rêng in paih fai vek tûr a ni a, ni khat ni aṭanga a ni sarih ni inkâr chhûnga dawidim telh chhang ei chu Israel mite zînga chhiar tel loh tûr a ni.

¹⁶A ni khat ni leh a ni sarih ni chuan inkhâwmpui urhsûn in nei tûr a ni; chumi chhûng chuan eng hna mah in thawk tûr a ni lo; in ei tûr erawh chu in siam thei ang.

¹⁷Chhang dawidim telh loh kût hi in hmang ṭhîn tûr a ni, hemi ni hian Israel mipui chu Aigupta ram aṭangin ka hruai chhuak a ni; ṭhangthar zêlte pawhin dâna neihin he ni hi an hmang zêl tûr a ni;

¹⁸thla hmasa ber ni sâwm leh pali tlai aṭangin ni sawmhnih leh pakhat tlai thlengin dawidim telh chhang in ei tûr a ni lo.

¹⁹Ni sarih chhûng chu in in chhûngah dawidim pakhat mah a awm tûr a ni lo va. Dawidim telh chhang ei chu, in zînga châm mai a ni emaw, in zînga piang a ni emaw, Israel mipui zînga chhiar tel tûr a ni lo.

²⁰Dawidim tel rêng rêng in ei tûr a ni lo, in awmna apiangah chhang dawidim telh loh in ei tûr a ni,” a ti a.

²¹Mosia chuan Israel upaho chu a ko khâwm vek a, “Berâmno emaw, kêltê emaw thlang thuai ula, in chhûnga ei tûrin kalhlên kût sa atân talh rawh u.

²²Husop têl khâwm ula, maihûna thisenah chuan in hnim ang a, kawngka biang tawnah leh kawngka lu chungah thisen chu in tât dâwn nia; a tûk khua a vâr hma chu tu mah mahni in ata in chhuak tûr a ni lo.

²³Aigupta mite that tûrin LALPA chuan a rawn fang dâwn a ni. Kawngka lu chung leh a biang tawna thisen a hmuh chuan kawngka chu a kal kân ang a, tihlumtu chu nangni that tûrin a lo luh a phal lo vang.

²⁴He thil hi dâna neihin in serh ang a, in fate pawhin an serh kumkhua tûr a ni.

²⁵LALPA thutiam anga ram a pêk tûr che u in thlen hunah pawh hetiang serh leh sâng hi in chhunzawm zêl tûr a ni.

²⁶“In faten, ‘Hetiang serh leh sâng hi eng tihna nge?’ tia an zawh che u chuan,

²⁷‘LALPA chawimawina Kalhlên Kût a nih hi. Ani chuan Aigupta mite a thah lai khân Aigupta rama awm Israel-te in a kal hlên a, min zuah a ni; chumi chawimawina chu a ni,’ in ti dâwn nia,” a ti a. Mipui chu an kûn a, Pathian chibai an bûk a.

²⁸Israel fate chu an tho va, Mosia leh Arona hnêna LALPA thupêk ang chuan an ti ta a.

²⁹Zânlaiah LALPA chuan Aigupta rama an fa tîr zawng zawng chu a tihlum ta a. Farawa fa tîr, lalṭhutthlênga ṭhu tûr aṭanga ripa tâng fa tîr thlengin, ran, a pa piang hmasa ber te nên lam a that ta a.

³⁰Zânlaiah Farawa chu a tho va, a hote zawng zawng leh Aigupta mi zawng zawng chu an tho va, mitthi awm lohna chhûng rêng a awm lo va, Aigupta mite chu ram pum puiah an ṭap ta chuah chuah a.

³¹A zân a zânin Mosia leh Arona chu Farawa chuan a ko va, “Ka mite hi chhuahsan ula, in sawi angin Israel fate nên LALPA rawng chu va bâwl rawh u.

³²In berâm te, in bâwng te pawh in duh angin hruai rawh u; chhuak thuai rawh u. Malsâwmna min dîlsak bawk ang che u,” a ti a.

³³Aigupta mite chuan chhuak thuai thuai tûrin an tur ta sek a. “Kan thi zo mai dâwn alâwm,” an ti a.

³⁴Mite chuan an chhang ur tûr hmeh sa dawidim la telh loh chu an fûn a, chhang hmeh thlêng chu puanin an tuam a, an kokiah an bât a.

³⁵Mosia thu angin Israel fate chuan an ti a, Aigupta mite chu tangkarua leh rangkachak ṭhi leh thawmhnaw dangte an dîl a.

³⁶LALPA chuan mite chu Aigupta mite a khawngaihtîr a, an dîl apiang an pe a. Tichuan, Aigupta mite thil neih chu an rawk a ni ta ngawt a.

³⁷Israel fate chu Ramases aṭangin Sukot an thleng a, kea kal chu an vaiin mi nuairuk an ni.

³⁸Hnam dang tam tak an kal tel ve a, berâm te, kêl te, bâwngte nên an kawi duah mai.

³⁹Aigupta ram aṭanga chhang hmeh sa dawidim telh loh an ken chu an kang a; Aigupta ram ata an hnawh chhuah tâk avângin an ei tûr pawh an siam ṭha hman lo a ni, an chhang hmeh sa pawh dawidim an phul hman lo.

⁴⁰Israel fate Aigupta rama an awm chhûng chu kum zali leh sawmthum a ni.

⁴¹Kum zali leh sawmthum a ral ni ngei chuan LALPA mite chuan Aigupta chu an chhuahsan leh ta a ni.

⁴²Chumi zân chu Aigupta ram aṭanga hruai chhuah zân a ni a, LALPA zân serh a ni. Hemi zân hi Israel fate pawhin ṭhangthar zêl thlenga zân serha an hman kumkhua tûr a ni.

⁴³ LALPA chuan Mosia leh Arona hnênah, “Hei hi Kalhlên Kût hman dân tûr thupêk chu a ni: Hnam dang miten kût sa hi an ei ve tûr a ni lo.

⁴⁴Amaherawhchu, in chhiahhlawh, pawisaa in lei, an serh in tansakte chuan an ei ve thei ang.

⁴⁵Ram dang mi, in zînga awm vete leh in hnêna inhlawhfate pawhin an ei tûr a ni lo.

⁴⁶In khatah in ei tûr a ni, hmun dangah in la ṭhen tûr a ni lo va, a ruh in titliak tûr a ni hek lo.

⁴⁷Israel pungkhâwmho chuan chutiang chuan an ti tûr a ni.

⁴⁸Mikhual, in ina chêngte chuan LALPA tâna kût sa chu an ei ve duh chuan mipa zawng zawng serh chu tansak phawt tûr a ni; chumi hnuah chuan in zînga piang ve ang chiahin en tawh tûr an ni a; kût sa te pawh an ei ve thei tawh ang; serh tan loh erawh chuan an ei tûr a ni lo.

⁴⁹In zînga piang in mite leh hnam dang, in zînga lo pêm lûtte chu angkhatin dân thuhmun in hmantîr tûr a ni,” a ti a.

⁵⁰Mosia leh Arona hnêna Pathian thupêk ang tak chuan Israel fate chuan an ti ta a.

⁵¹Chumi ni ngei chuan Israel fate chu Aigupta ram aṭangin LALPA chuan a hruai chhuak ta vek a ni.