Read Mizo Lushai Exodus 13 Bible Online

Exodus 13 - Mizo Lushai bible

Exodus 13

¹ LALPA chuan Mosia a bia a.

²“Israel-te zînga fa tîr, mipa, chhûl keu tawh phawt chu, an ran no, a pa, piang hmasa ber nên ka tân serh hrang rawh, ka ta an ni,” a ti a.

³Mosia chuan mipuite hnênah, “Vawiin hi hre reng rawh u, Aigupta ramah bawih in ni a, in chhuak ta a nih hi. He hmun aṭangin LALPA chuan a chakna hmangin a hruai chhuak che u a ni. Chhang dawidim telh in ei hauh tûr a ni lo.

⁴Abib thla, vawiin hian in chhuak a nih hi,

⁵Kanan mite ram, Hit mi te, Amor mi te, Hiv mi te, Jebus mite awmna, khawizu leh hnutetuia luang ram, in pate hnênah pêk che u a lo tiam tawh ram a hruai thlen hunah che u chuan, hemi thlaah hian kût hi in hmang ṭhîn tûr a ni.

⁶Ni sarih chhûng dawidim telh loh chhang in ei tûr a ni a; a ni sarih ni chuan LALPA chawimawi nân ruai ṭheh tûr a ni.

⁷Ni sarih chhûng chu dawidim telh chhang in ei tûr a ni lo, in ramah dawidim pawh, dawidim telh chhang pawh a awm tûr a ni lo.

⁸In fate hnênah, ‘Aigupta ram aṭanga kan chhuah dâwn laia LALPA thiltih avânga hêng hi ti kan ni,’ tiin hrilh ang che u.

⁹“In kuta chhinchhiahna leh in mit kâra hriatrengna thil hrên in hrêng ang hian LALPA dân chu lam nachâng in hriat theih nân in hmang ṭhîn dâwn nia. Aigupta ram aṭangin a thiltihtheihna ropui tak hmangin a hruai chhuak si che u a.

¹⁰Kum tin kût chu a hun takah in hmang ziah tûr a ni.

¹¹“Kanan mite ram, in pate hnêna pêk che u a tiam chu LALPA chuan a hruai thlen che ua, a pêk hunah che u chuan,

¹²in fa tîr apiang, mipa tawh phawt chu, LALPA hnênah in hlân tûr a ni. In rante pawh an no hmasa, a pa tawh phawt chu, LALPA hnênah in hlân tûr a ni.

¹³Sabengtungno hmasa ber erawh chu a aiah berâmno hlânin in tlan tûr a ni. In tlan duh loh chuan a ring elhtliak ang che u. In fa tîr te chu in tlan ngei tûr a ni.

¹⁴“Nakin hnuah in faten, ‘Hei hi eng tihna nge?’ tia an zawh che u chuan, ‘Aigupta rama bawiha kan awm, LALPA chuan a chakna hmangin min hruai chhuak a.

¹⁵Faraw-an kan chhuah a phal loh lai khân, Aigupta rama fa tîr, mihring pawh ran pawh, a tihlum vek a; chuvângin, chhûl keu tawh phawt chu LALPA hnênah kan hlân zêl a ni; keimahni fate erawh chu kan tlan ṭhîn a ni,’ in la ti dâwn nia.

¹⁶Chutia in tih chuan kut emaw, chal emaw hrên angin Aigupta ram aṭangin LALPA chuan a chakna hmangin a hruai chhuak che u a ni tih in hre reng thei ang,” a ti a.

¹⁷Faraw-an mite a chhuah khân kawng hnai zâwk, Filistia mite rama kal tlang kawngah chuan a hruai lo va, miten indona an hmuhin an inchhîr palh ang a, Aigupta ramah an kîr leh mai ang tih a hlau a ni.

¹⁸Thlalêr lam, Tuipui Sen lamah a kual zâwngin a hruai ta zâwk a. Israel fate chu Aigupta ram aṭang chuan hriamhrei nên, a pâwl pâwlin an chhuak ta a.

¹⁹“Pathianin a hre reng ang che u a, ka ruhte hi in zâwn chho dâwn nia,” tia a chah anga tih an tiam tlat angin Mosia chuan Josefa ruhte chu a keng a.

²⁰Sukot aṭang chuan an kal zêl a, thlalêr tâwp Etham-ah bûk an khuar a.

²¹Chhûn leh zâna an kal theih nân LALPA chuan chhûnah chhûm dingin an hma a hruai a, zânah mei dingin an kawng a tieng a.

²²Chhûna chhûm ding leh zâna mei ding chuan mite chu a kalsan ngai lo.