Read Mizo Lushai Exodus 14 Bible Online

Exodus 14 - Mizo Lushai bible

Exodus 14

¹ LALPA chuan Mosia hnênah,

²“Israel fate chu hrilh rawh; kîr leh sela, Migdol leh Tuipui Sen inkârah Pi-hahirot ep Baal-zefon bulah riahhmun khuar rawh se,

³Farawa chuan, ‘Heti hian Israel fate chu kalna mumal hre lovin thlalêrah an tâng ta,’ a ti rilru dâwn nia.

⁴Farawa chu ka tiluhlul ang a, a ûm ang che u a, Farawa leh a hote chungah ka ropuizia ka tilang ang a, LALPA chu ka ni tih an hria ang,” a ti a. Chutiang chuan an ti ta a.

⁵Israel-te an tlân chhuah tâk thu chu Aigupta lal an hrilh a. Farawa leh a ṭhuihruaite chu Israel-te chungah an thu a khauh ta hle a; “Israel-te tha chhawr lova kan chhuah ta mai hi engtizia nge?” an ti a.

⁶Farawa chuan a sakawrtawlailîr a buatsaihtîr a, a sipaite chu a hruai a.

⁷Sakawrtawlailîr ṭha ṭha zaruk leh Aigupta ram tawlailîr khalh thiam thlante nên an ûm ta a.

⁸LALPA chuan Aigupta lal Farawa chu a tiluhlul a, Israel faten inchhuang taka Aigupta an chhuahsan hum hum chu an ûm ta a.

⁹Farawa sakawr leh a tawlailîr te, a sipai te leh sakawr chungchuang, Aigupta mite chuan Pi-hahiroth ep, Baal-zefon bulah Tuipui kama an awm chu an va ûmphâk a.

¹⁰Israel fate chuan Farawa hoten an rawn ûm pha dâwn ta mai tih an hmuhin an hlau hle a. LALPA chu ṭanpuiah an sâwm ta a.

¹¹Mosia hnênah, “Thlân a awm loh avângin em ni thi tûra thlalêra min hruai chhuah hi? Eng atân nge Aigupta ram aṭang khân min lo hruai chhuah le?”

¹²Kan chhuah hma khân hetiangin thil a awm ang tih kan hrilh lo che em ni? Min nawr lui lo mai rawh, Aigupta mite rawng hi kan bâwl zêl mai ang e; thlalêra thihsâwn ai chuan Aigupta mite bawih nih a ṭha zâwk kan tih kha,” an ti a.

¹³Mosian mipui hnênah, “Hlau suh ula, zâm suh u, vawiina Pathianin a rawn chhanhim dân tûr che u hi thlîr mai rawh u. Vawiina Aigupta mi in hmuhte hi in hmu leh tawh ngai lo vang.

¹⁴Eng mah in tih ve a ngai lo vang, LALPAN a dosak dâwn che u alâwm,” a ti a.

¹⁵ LALPA chuan Mosia hnênah, “Engah nge min auh chûl le? Israel fate chu hma lama kal zêl tûrin hrilh rawh.

¹⁶I tiang kha lek la, tuipui chungah i bân phar la, tui chu tiṭhen rawh, Israel fate chu Tuipui mawng leichârah an kal dâwn nia.

¹⁷Keiin Aigupta mite chu ka tiluhlul ang a, in hnungah an rawn ûmzui ang che u. Tichuan, Farawa leh a sipaite, a tawlailîr leh sakawr chungchuang mite avângin ropuina ka chang dâwn a ni.

¹⁸Farawa te, a tawlailîr te leh a sakawr chungchuang mite chunga ka intihropui hunah chuan kei hi LALPA chu ka ni tih in hria ang,” a ti a.

¹⁹Israel-te hmaa awm ṭhîn LALPA vântirhkoh chu a insawn a, an hnung lamah a awm ta a, an hmaa chhûm ding pawh kha an hnung lamah a insawn a.

²⁰Israel-te leh Aigupta mite awmna inkârah chuan a awm ta a. Israel mite awmna chu a chhun êng a, Aigupta mite awmna erawh chu a tithim a.

²¹Mosia chuan tuipui chungah a bân a phar a, LALPA chuan zankhuain khawchhak thli na tak a tlehtîr a, tuipui chu a chhêm kiang a, tui chu a inṭhen a, tuipui mawng chu leichârah a chang ta a.

²²Israel fate chu tuipui mawng leichârah chuan an kal ta a, an ding lam leh vei lamah tui chu bang angin a ding tawn a.

²³Aigupta mite chuan an ûm zêl a, Farawa sakawr te, a tawlailîr te, a sakawr chungchuang mite chuan tuipui mawngah chuan an ûmzui zêl a.

²⁴A tûk khawfîng chah hmain LALPA chuan Aigupta sipaite chu chhûm ding leh mei ding kârah chuan a zu hmu a, a zuk timangang ta a.

²⁵An tawlailîr ke te chu a titâng a, a lîr ṭha hlei thei ta lo va. Aigupta mite chuan, “LALPAN Israel-te lama ṭangin min do a nih hi; hawh u, i hawsan thuai ang u,” an ti a.

²⁶ LALPA chuan Mosia hnênah, “Tuipui chungah i bân phar rawh, tuite chuan Aigupta mi, an tawlailîrte leh an sakawr chungchuangte chu a chîm dâwn nia,” a ti a.

²⁷Mosia chuan tuipui chungah a bân a phar a, ni a lo chhuah chuan tui chu a insuih zawm leh ta pûng a, Aigupta mite chuan tlânchhiat an tum a; mahse, LALPA chuan anni chu tuiah chuan a paih lût a.

²⁸Tui lo infin leh chuan tawlailîr te, sakawr chungchuang mi te, Farawa sipai zawng zawng, tuipui mawnga ûmzuitute chu a chîm ta vek a, pakhat mah chhuak an awm lo.

²⁹Israel fate erawh chu tuipui mawng leichârah chuan an kal a, bang angin an sîr tuakah chuan tui chu a ding luah a.

³⁰Chumi ni chuan LALPA chuan Israel-te chu Aigupta mite kut ata chu a chhanhim a, Aigupta mi, tuipuia thi ruangte chu an hmu a.

³¹Aigupta mite chunga LALPA thiltih râpthlâk tak chu Israel-te chuan an hmu a; LALPA chu an hlau va. LALPA leh a chhiahhlawh Mosia chu rinpuiah an neih ta a. Mosia leh Israel fate chuan LALPA chawimawi nân he hla hi an sa ta dual dual a: